នេប៉ាល់​តែងតាំង​នាយក​រដ្ឋមន្ត្រី​ស្ត្រី​ជា​លើក​ដំបូង ​ខណៈ​សភា​ត្រូវ​រំលាយ ​ចំពេល​មាន​ការ​តវ៉ា​ដ៏​​សាហាវ

ប្រធានាធិបតីនេប៉ាល់ កាលពីថ្ងៃសុក្រ​ទី​១២​ខែ​កញ្ញា​ឆ្នាំ​២០២៥ បានតែងតាំងអតីតប្រធានតុលាការកំពូលលោកស្រី Sushila Karki ជានាយករដ្ឋមន្ត្រីបណ្តោះអាសន្ន ដោយធ្វើ​ឲ្យលោកស្រីក្លាយជាស្ត្រីដំបូងគេដែលដឹកនាំរដ្ឋាភិបាលរបស់​ប្រទេស​អាស៊ី​ខាង​ត្បូង​មួយ​នេះ បន្ទាប់ពីភាពចលាចលដ៏ហិង្សាបានបង្ខំ​ឲ្យ​នាយករដ្ឋមន្ត្រី Khadga Prasad Oli លាលែងពីតំណែង។

លោកប្រធានាធិបតី Ram Chandra Poudel បានរំលាយសភា និងកំណត់ការបោះឆ្នោតថ្មីសម្រាប់ថ្ងៃទី​៥​ខែមីនា​ឆ្នាំ​២០២៦ តាមអនុសាសន៍របស់លោកស្រី Karki។

លោកស្រី Karki អាយុ​៧៣ឆ្នាំ ដែលជា​ស្ត្រី​ដំបូង​គេ​បម្រើការជាប្រធានតុលាការ​កំពូល​​​របស់​នេប៉ាល់​ក្នុងឆ្នាំ​២០១៦-២០១៧ ទទួលបានកេរ្តិ៍ឈ្មោះ​ល្បី​ សម្រាប់ជំហរដ៏តឹងរឹងរបស់លោកស្រី​ប្រឆាំងនឹងអំពើពុករលួយ។ លោកស្រី​បាន​ស្បថ​ចូល​កាន់​តំណែង​ក្នុង​ពិធី​ខ្លី​មួយ​ដែល​ផ្សាយ​តាម​ទូរទស្សន៍​រដ្ឋ។

ការតែងតាំង​លោកស្រី​ ធ្វើឡើងបន្ទាប់ពីមានការតវ៉ាដោយហិង្សាជាច្រើនថ្ងៃនៅក្នុងទីក្រុង Kathmandu ដែលផ្ទុះឡើងបន្ទាប់ពីរដ្ឋាភិបាលបានដាក់ចេញ​ការហាមឃាត់លើវេទិកាប្រព័ន្ធផ្សព្វផ្សាយសង្គមរួមមាន Facebook, X និង YouTube។ ភាពចលាចលដែលត្រូវបានគេហៅថា «ការតវ៉ារបស់ Gen Z» បានកើនឡើងទៅជាកំហឹងយ៉ាងខ្លាំងក្លា​ជុំវិញវិសមភាព និងសិទ្ធិនយោបាយ ដោយក្រុមបាតុករបានដុតអគារសភា លំនៅដ្ឋានប្រធានាធិបតី និងអាជីវកម្ម។

យោងតាមប៉ូលិស យ៉ាងហោចណាស់មនុស្ស ៥១​នាក់ត្រូវបានសម្លាប់ ក្នុងអំឡុងពេលការប៉ះទង្គិចគ្នា ក្នុង​នោះ​មាន​​ក្រុមអ្នកតវ៉ាដែលត្រូវបានបាញ់ដោយកងកម្លាំងសន្តិសុខ មន្ត្រីប៉ូលិស និងអ្នកទោសដែលបានស្លាប់ក្នុងអំឡុងពេលការហែក​គុកដែលមិនបានសម្រេច។

លោក Oli បានលាលែងពីតំណែងកាលពីថ្ងៃអង្គារ ហើយបានភៀសខ្លួនចេញពីលំនៅដ្ឋានរបស់គាត់ ខណៈដែលកងទ័ពបានកាន់កាប់រដ្ឋធានីក្រោមបម្រាមគោចរយ៉ាងតឹងរ៉ឹង។ អ្នកស្រុកត្រូវបានអនុញ្ញាតឲ្យ​ចេញក្រៅតែតាម​ម៉ោងកំណត់ប៉ុណ្ណោះ ដើម្បីទិញអាហារ និងសម្ភារៈចាំបាច់ ខណៈដែលទាហានដើរល្បាតតាមដងផ្លូវ។

រដ្ឋាភិបាលបណ្តោះអាសន្នថ្មីរបស់ប្រទេសនេប៉ាល់ឥឡូវនេះប្រឈមមុខនឹងបញ្ហា​ចម្បង​ចំនួន​ពីរ គឺការស្តារសណ្តាប់ធ្នាប់ឡើងវិញ និង​ការ​រៀបចំប្រទេសសម្រាប់ការបោះឆ្នោតថ្មីក្នុងខែមីនា៕

ដោយ៖ ឈាង