នេប៉ាល់ដាក់បម្រាមលើការធ្វើដំណើររបស់អតីតនាយករដ្ឋមន្ត្រី KP Sharma Oli ដើម្បីស៊ើបអង្កេត

យោងតាមការចេញផ្សាយរបស់សារព័ត៌មាន CNA នៅថ្ងៃទី២៩ខែ កញ្ញា ប្រទេសនេប៉ាល់បានដាក់បម្រាមលើការធ្វើដំណើររបស់អតីតនាយករដ្ឋមន្ត្រី KP Sharma Oli និងមន្ត្រីជាន់ខ្ពស់បួននាក់ទៀតដែលជាផ្នែកមួយនៃការស៊ើបអង្កេតលើការតវ៉ាយ៉ាងហិង្សាកាលពីដើមខែនេះ។

គួររម្លឹកថាភាពចលាចលបានកើតឡើងកាលពីថ្ងៃទី ៨ ខែកញ្ញាដោយមានកំហឹងចំពោះការបិទខ្ទប់លើប្រព័ន្ធផ្សព្វផ្សាយសង្គម អំពើពុករលួយ និងបញ្ហាសេដ្ឋកិច្ច បង្កជាការប៉ះទង្គិចគ្នាទូទាំងប្រទេសសម្លាប់មនុស្សយ៉ាងហោចណាស់ ៧៣នាក់។ លើសពីនេះសភា និងការិយាល័យរដ្ឋាភិបាលត្រូវបានដុតបំផ្លាញដោយក្រុមបាតុករ និងនាំទៅដល់ការដួលរលំរដ្ឋាភិបាល។

នាយក​រដ្ឋមន្ត្រី​បណ្តោះអាសន្ន​លោកស្រី Sushila Karki បាន​បង្កើត​គណៈកម្មការ​ពិសេស​មួយ​ដើម្បី​ស៊ើបអង្កេត​អំពើ​ហិង្សា​នាពេល​ថ្មីៗ​នេះ​។ គណៈកម្មាការនេះបានស្នើឱ្យមានការហាមឃាត់ការធ្វើដំណើររបស់មន្ត្រីមួយចំនួដូចជាអតីតរដ្ឋមន្ត្រីក្រសួងមហាផ្ទៃ និងអតីតប្រធានសន្តិសុខ មិនឲ្យចាកចេញពីទីក្រុង Kathmandu ដោយគ្មានការអនុញ្ញាតឡើយ។

សហគមន៍ធុរកិច្ចរបស់ប្រទេសនេប៉ាល់និយាយថាក្រុមហ៊ុននៅក្នុងតំបន់ដូចជាសណ្ឋាគារ ហាង និងការលក់រថយន្តបានខាតបង់ប្រហែល ៦០០ លានដុល្លារដោយសារតែការតវ៉ា និងអំពើហិង្សា។ ទន្ទឹមនឹងនេះ អតីតនាយករដ្ឋមន្ត្រី KP Sharma Oli និយាយថា លោកមិនទទួលខុសត្រូវចំពោះអ្វីដែលបានកើតឡើងនោះទេ។ ផ្ទុយទៅវិញ លោកប្រកែកថា អ្នកជ្រៀតជ្រែកខាងក្រៅបានបង្កការតវ៉ា៕

អត្ថបទ៖ ប៊ុន សុភាព