អគ្គិភ័យ​យ៉ាងសន្ធោសន្ធៅឆាបឆេះរោងចក្រ​គីមី ដែលមិនអាចប្រើទឹកពន្លត់បាននៅ​បាងកក​

យោងតាមការចេញផ្សាយរបស់សារព័ត៌មាន Khaosod នៅព្រឹកថ្ងៃទី១៥ កញ្ញានេះ អគ្គីភ័យដ៏សន្ធោសន្ធៅបានឆាបឆេះរោងចក្រគ្រប់គ្រង​កាក​សំណល់​គីមី​ក្នុងតំបន់ឧស្សាហកម្មមួយកន្លែងនៅ Soi Samae Dam 17 សង្កាត់ Samae Dam ខណ្ឌ Bang Khun Thian ទីក្រុងបាងកកប្រទេសថៃ ដោយបានបញ្ចេញផ្សែងខ្មៅក្រាស់ទៅលើអាកាស។

អគ្គិភ័យដ៏សាហាវនេះ ត្រូវបានគេរាយការណ៍ នៅវេលាម៉ោង ៦ និង៣៥នាទីព្រឹក ចាប់ផ្តើមឆេះចេញពីក្នុងបន្ទប់មួយមានផ្ទុកសារធាតុម៉ាញេស្យូម និងអាស៊ីតស៊ុលហ្វួរីក ដែលជាសារធាតុដែលមិនអាចពន្លត់ជាមួយទឹកបានទេ។ អ្នក​ពន្លត់​អគ្គិភ័យ​ជំនួស​វិញ​បាន​បាញ់​ទឹក​ជុំវិញ​តំបន់​នោះ​ដើម្បី​ការពារ​កុំ​ឲ្យ​ភ្លើង​ឆេះ​រាលដាលកន្លែងផ្សេង ខណៈបុគ្គលិក​រោងចក្រ​​បាន​ប្រើ​អេស្កាវ៉ាទ័រ​ដើម្បីកាយខ្សាច់ និង​ស៊ីម៉ងត៍​ពន្លត់ភ្លើងជំនួសទឹក។

ទោះយ៉ាងណាភ្លើង​ត្រូវ​បាន​គ្រប់គ្រងបាន​ក្នុង​រយៈពេល​៣០​នាទី​ក្រោយមក​ និងមិនទាន់​មាន​អ្នក​រង​របួស​ត្រូវ​បាន​គេ​រាយការណ៍​ភ្លាមៗ​នោះ​ទេ។

ការិយាល័យបរិស្ថាន និងសង្កាត់នៃទីក្រុងបាងកក កំពុងចាប់ផ្តើមការត្រួតពិនិត្យ ដើម្បីកំណត់ពីមូលហេតុនៃការឆេះនិងវាយតម្លៃការខូចខាតសរុប៕

អត្ថបទ៖ ប៊ុន សុភាព