ជនជាតិប៉ាឡេស្ទីន៦០នាក់ទៀតត្រូវបានសម្លាប់ ខណៈលោក ណេតាន់យ៉ាហ៊ូ ប្តេជ្ញា «បញ្ចប់ការងារ» នៅហ្គាហ្សា

យោងតាមការចេញផ្សាយរបស់សារព័ត៌មាន Al Jazeera ការវាយប្រហារចុងក្រោយរបស់អ៊ីស្រាអែលនៅទូទាំងតំបន់ហ្គាហ្សាបានសម្លាប់ជនជាតិប៉ាឡេស្ទីនយ៉ាងតិច ៦០ នាក់កាលពីថ្ងៃទី ២៦ ខែកញ្ញា ខណៈដែលនាយករដ្ឋមន្រ្តីអ៊ីស្រាអែល លោក បេនចាមីន ណេតាន់យ៉ាហ៊ូ បាននិយាយសុន្ទរកថាមិនសមរម្យនៅឯមហាសន្និបាតអង្គការសហប្រជាជាតិដោយសន្យាថានឹង «បញ្ចប់ការងារ» ប្រឆាំងនឹងក្រុមហាម៉ាស។

ប្រភពគ្រូពេទ្យបានឲ្យដឹងថាមនុស្ស ៣០ នាក់បានស្លាប់នៅក្នុងទីក្រុង ហ្គាហ្សា និងមនុស្ស ១៣នាក់ផ្សេងទៀតត្រូវបានសម្លាប់ ខណៈពេលដែលព្យាយាមមកទទួលជំនួយពីកន្លែងផ្ដល់ជំនួយនានារបស់អ៊ីស្រាអែល និង GHF ដែលគាំទ្រដោយសហរដ្ឋអាមេរិក។

យោងតាមអង្គការសហប្រជាជាតិ អ៊ីស្រាអែលបានធ្វើការវាយប្រហារតាមអាកាសរៀងរាល់ ៨-៩ នាទីដោយបន្សល់ទុកនូវ ផលវិបាកដ៏អាក្រក់សម្រាប់ជនស៊ីវិល។ ក្នុងពេលជាមួយគ្នានោះ វិបត្តិមនុស្សធម៌កាន់តែធ្ងន់ធ្ងរដោយ ក្មេងប្រុសអាយុ១៧នាំម្នាក់បានស្លាប់ដោយសារការអត់ឃ្លាន និងកង្វះការព្យាបាលនៅ Deir el-Balah ដែលជាផ្នែកមួយនៃការស្លាប់ទាក់ទងនឹងកង្វះអាហារូបត្ថម្ភយ៉ាងហោចណាស់ ៤៤០ នាក់ រួមទាំងកុមារ១៤៧នាក់។ មន្ទីរពេទ្យនៅតែមានអ្នកជំងឺច្រើនលើសលប់ ខ្វះបុគ្គលិក និងការផ្គត់ផ្គង់ ។

គួរបញ្ជាក់ថាសុន្ទរកថារបស់លោក ណាតាន់យ៉ាហ៊ូ នៅឯមហាសន្និបាតអង្គការសហប្រជាជាតិបានធ្វើឲ្យគណៈប្រតិភូជាច្រើនរូបដែលតវ៉ាចំពោះសកម្មភាពរបស់អ៊ីស្រាអែលនៅតំបន់ហ្គាហ្សាដើរចេញ ទោះលោកបានអះអាងថា សុន្ទរកថារបស់លោកកំពុងត្រូវបានចាក់ផ្សាយដោយផ្ទាល់ទៅកាន់តំបន់ហ្គាហ្សា ជាការព្រមានដល់ក្រុមហាម៉ាស ក៏ដោយ។

ក្នុងពេលជាមួយគ្នានេះ ប្រធានាធិបតីអាមេរិក លោក ដូណាល់ ត្រាំ បានប្រកាសថា លោកជិតដល់កិច្ចព្រមព្រៀងមួយ ដែលនឹងធានាបាននូវការដោះលែងចំណាប់ខ្មាំង និងបញ្ចប់សង្រ្គាម ទោះបីជាលោកមិនបានផ្តល់ព័ត៌មានលម្អិត ឬពេលវេលាកំណត់ក៏ដោយ ដោយបន្សល់ទុកការសង្ស័យអំពីការទាមទារនេះ។

អង្គការសហប្រជាជាតិ និងក្រុមជំនួយបានព្រមានថា ស្ថានភាពកាន់តែអាក្រក់ទៅៗ ជាមួយនឹងការស្រេកឃ្លានរីករាលដាល ការចែកចាយជំនួយត្រូវបានរារាំង និងការដួលរលំនៃប្រព័ន្ទថែទាំសុខភាពដែលគំរាមកំហែងដល់ជីវិតមនុស្សរាប់ពាន់នាក់នៅហ្គហ្សា៕

អត្ថបទ៖ ប៊ុន សុភាព