សិស្សនិងគ្រូ៩០នាក់ទៀតនៅតែជាប់ក្រោមគំនរបាក់បែកបន្ទាប់ពីបាក់រលំសាលារៀននៅឥណ្ឌូណេស៊ី

ឧបទ្ទវហេតុដ៏សោកនាដកម្មបាក់រលំសាលាបង្រៀនសាសនាអ៊ីស្លាម Al Khoziny ក្នុងទីក្រុង Sidoarjo ខេត្ត​ East Java ប្រទេសឥណ្ឌូណេស៊ី កាលពីរសៀលថ្ងៃច័ន្ទក្នុងពេលដែលសិស្សានុសិស្ស និងគ្រូបង្រៀនកំពុងអធិស្ឋានបានសង្កត់សិស្សនិងគ្រូរាប់រយនាក់ ខណៈ៩១នាក់ទៀតនៅតែជាប់នៅក្រោមអគារនៅឡើយ។ នេះបើយោងតាមការចេញផ្សាយសារព័ត៌មាន Al Jazeera នៅថ្ងៃទី០១ខែតុលា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទីភ្នាក់ងារគ្រោះមហន្តរាយរបស់ប្រទេសឥណ្ឌូណេស៊ី (BNPB) យ៉ាងហោចណាស់មនុស្ស ៩១ នាក់នៅតែជាប់នៅក្រោមគំនរបាក់បែក។ ក្រុមអ្នកជួយសង្គ្រោះបានរកឃើញសញ្ញានៃអ្នកនៅរស់រានមានជីវិតចំនួន ៦ នាក់ហើយតាមរយៈចន្លោះតូចៗ ពួកគេត្រូវបានបញ្ចូនអាហារ និងទឹកដើម្បីទ្រទ្រង់ជីវិត។ ទោះបីជាយ៉ាងណាក៏ដោយ ក្រុមអ្នកជួយសង្គ្រោះ មិនទាន់អាចប្រើប្រាស់ម៉ាស៊ីនធុនធ្ងន់នៅឡើយទេ ព្រោះវាអាចធ្វើឱ្យអគារកាន់តែបាក់រលំ។

ការបាក់រលំដ៏រន្ធត់នេះត្រូវបានសនិដ្ឋានថាបណ្ដាលមកពីសរសរគ្រិះជាន់ខាងលើមិនរាំងមាំនិងសាងសង់ដោយគ្មានការអនុញ្ញាត្ត។ មក​ទល់​ពេល​នេះ​ចំនួន​អ្នក​ស្លាប់​ជា​ផ្លូវ​ការ​មាន​ចំនួន​បី​នាក់ ហើយ​មនុស្ស​ជិត​១០០​នាក់​បាន​រង​របួស។ ជាការឆ្លើយបុគ្គលិកសង្គ្រោះជាង ៣០០នាក់ មកពីក្រុមប៉ូលិស យោធា និងក្រុមឆ្លើយតបគ្រោះមហន្តរាយ កំពុងជីកកកាយដោយដៃ ដើម្បីស្វែងរកអ្នកនៅរស់រានមានជីវិត។

ក្រុមមន្ត្រីឥណ្ឌូណេស៊ីបាននិយាយថា ប្រសិនបើគេបញ្ជាក់ថា គ្មានមនុស្សនៅរស់ទេនោះ ពួកគេនឹងប្រើឧបករណ៍ធុនធ្ងន់ ដើម្បីយកកម្ទេចថ្ម និងយកសាកសពអ្នកស្លាប់ចេញ៕

អត្ថបទ៖ ប៊ុន សុភាព