មនុស្សជាង២លាននាក់ទូទាំងប្រទេសអ៊ីតាលីចូលរួមធ្វើបាតុកម្មជុំវិញ​សង្គ្រាមអ៊ីស្រាអែលលើ​តំបន់ហ្គាហ្សា

យោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី០៣ខែ តុលា មនុស្សជាងពីរលាននាក់នៅទូទាំងប្រទេសអ៊ីតាលីបានចូលរួមធ្វើបាតុកម្មទូទាំងប្រទេស ដើម្បីទាមទាររកការគាំទ្រសម្រាប់តំបន់ហ្គាហ្សា និងបេសកកម្មជំនួយមនុស្សធម៌។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វាគឺជាបាតុកម្មដ៏ធំបំផុត បន្ទាប់ពីកងកម្លាំងអ៊ីស្រាអែលបានស្ទាក់ចាប់កងនាវា Global Sumud Flotilla ដែលដឹកជំនួយនិងសកម្មជនរាប់រយនាក់ទៅតំបន់ហ្គាហ្សា កាលពីដើមសប្តាហ៍។ បាតុកម្មទ្រង់ទ្រាយធំនេះបែបនេះបានរំខានដល់សេវាកម្មសំខាន់ៗរួមទាំងការដឹកជញ្ជូន និងសេវាសាធារណៈផ្សេងទៀត។

នៅទីក្រុង Rome មានមនុស្សប្រហែល ៣០ ម៉ឺននាក់បានចូលរួមការតវ៉ា ខណៈដែលនៅទីក្រុង Milan មនុស្ស ១០ ម៉ឺននាក់ បានប្រមូលផ្តុំគ្នា និងមានការប៉ះទង្គិចគ្នាបន្តិចបន្តួចជាមួយប៉ូលិសបន្ទាប់ពីអ្នកតវ៉ាបានបិទផ្លូវហាយវេ។ ការប៉ះទង្គិចគ្នាបន្តិចបន្តួចក៏ត្រូវបានរាយការណ៍ផងដែរនៅក្នុងទីក្រុង Turin, Bologna និង Naples ប៉ុន្តែការតវ៉ាភាគច្រើននៅទូទាំងប្រទេសអ៊ីតាលីបានរក្សាសន្តិភាព។

ចំណែកនៅទីក្រុង Florence ក្រុមបាតុករបានទៅមជ្ឈមណ្ឌលហ្វឹកហ្វឺនរបស់ក្រុមបាល់ទាត់ជម្រើសជាតិអ៊ីតាលី ដើម្បីទាមទារឱ្យការប្រកួត World Cup ជាមួយអ៊ីស្រាអែលនៅថ្ងៃទី ១៤ ខែតុលានៅទីក្រុង Udine ត្រូវបានលុបចោល។ UEFA ដែល​ជា​អាជ្ញាធរ​បាល់ទាត់​របស់​អឺរ៉ុប​កំពុង​ពិចារណា​ព្យួរ​អ៊ីស្រាអែល​រួច​ហើយ​ដោយ​សារ​តែ​សង្គ្រាមជាមួយប៉ាឡេស្ទីន។

ពាក់ព័ន្ធបញ្ហានេះ នាយករដ្ឋមន្ត្រីអ៊ីតាលីលោកស្រី Giorgia Meloni បានរិះគន់ការធ្វើបាតុកម្មនេះ ថា ជាការជំរុញផ្នែកនយោបាយ ហើយនឹងបង្កើតបញ្ហាសម្រាប់ប្រជាជនអ៊ីតាលី ដោយមិនបានជួយប៉ាឡេស្ទីនពិតប្រាកដនោះទេ។ ទោះបីជាយ៉ាងណាក៏ដោយ លោកស្រីកំពុងស្ថិតនៅក្រោមសម្ពាធកាន់តែខ្លាំងឡើងទាំងក្នុងប្រទេសអ៊ីតាលី និងពីបរទេស ដើម្បីពិចារណាឡើងវិញនូវការគាំទ្រដ៏យូរអង្វែងរបស់អ៊ីតាលីចំពោះអ៊ីស្រាអែល ខណៈដែលវិបត្តិមនុស្សធម៌នៅតំបន់ហ្គាហ្សាកាន់តែអាក្រក់ទៅៗ៕

អត្ថបទ៖ ប៊ុន សុភាព