សុខភាព

ហូបតែបៃតង៣ដង ក្នុង១សប្តាហ៍បង្ការជំងឺបានច្រើន ហើយជួយខួរក្បាលទៀត

បានផុស

៥ years មុន

នៅ

ថ្ងៃពុធ ១៦ មិថុនា ២០២១

ដោយ

Sonya

គ្នាយើងប្រាកដបានដឹងខ្លះៗពីប្រយោជន៍ជាច្រើននៃតែបៃតង ហើយកន្លងទៅថ្មីៗនេះ លទ្ធផលស្រាវជ្រាវពីវិទ្យាស្ថានស្រាវជ្រាវវេជ្ជសាស្រ្តប៉េកាំងប្រទេសចិន បានបង្ហាញពីគុណប្រយោជន៍ជាវិជ្ជមានមួយចំនួនទៀត នៃទម្លាប់ញ៉ាំតែបៃតង ប្រហែល៣ដង ឬច្រើនក្នុង១សប្តាហ៍។

Coffee, Green Tea May Help Against Type 2 Diabetes

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វិទ្យាស្ថានខាងលើបានសិក្សាលើប្រជាពលរដ្ឋចិនប្រមាណ ជិត១សែននាក់ ក្នុងរយៈពេល៧ឆ្នាំ ដោយតាមដានលើទម្លាប់ញ៉ាំតែជាប្រចាំរបស់អ្នកទាំងនោះ។ ជាលទ្ធផលបានឃើញថា អ្នកដែលឧស្សាហ៍ញ៉ាំតែបៃតង ជាមធ្យម៣ដងក្នុង១សប្តាហ៍ ឬច្រើនជាងនេះ គឺមានអាយុវែងប្រហែល១,៤ឆ្នាំ ច្រើនជាង អ្នកមិនដែលញ៉ាំ។

ការសិក្សាបានរកឃើញដែរថា ក្នុងតែបៃតង មានសារធាតុប្រឆាំងអុកស៊ីដកម្ម ដែលជួយកាត់បន្ថយហានិភ័យជំងឺបេះដូង និងជំងឺដាច់សរសៃឈាម ប្រមាណ២៥ភាគរយ។ តែទោះយ៉ាងណា អ្នកវិទ្យាសាស្រ្តបានរកឃើញពីប្រសិទ្ធភាពនោះពីតែបៃតងប៉ុណ្ណោះ ពោលគឺនៅក្នុងការសិក្សាពីប្រជាពលរដ្ឋខាងលើ មាន៨ភាគរយ បានញ៉ាំប្រភេទតែខ្មៅ តែពុំឃើញមានពីប្រសិទ្ធភាពដូចតែបៃតងនោះទេ។

លោកវេជ្ជបណ្ឌិត Xinyan Wang អ្នកដឹកនាំការស្រាវជ្រាវបានបន្ថែមថា នៅក្នុងតែបៃតង មានសមាសធាតុគីមីប្រមាណ៥០០ប្រភេទ ក្នុងនោះមានសារធាតុល្អជាច្រើនដូចជា Polyphenols ដែលជួយជួសជុលកោសិកា គ្រប់គ្រងជាតិស្ករក្នុងរាងកាយ ព្រមទាំងមានសារធាតុ Epigallocatechin Gallate (EGCG) ជួយអភិវឌ្ឍកោសិកាប្រសាទ ជួយមុខងារវិនិច្ឆ័យរបស់ខួរក្បាល និងបង្កើនស្មារតីផងដែរ។

A green tea compound shows anti-SARS-CoV-2 properties in vitro

តែយ៉ាងណាមិញ វេជ្ជបណ្ឌិតជនជាតិចិន ខាងលើបានបញ្ជាក់ថា តែបៃតងពិតជាផ្តល់អត្ថប្រយោជន៍ទាំងនោះមែន ប៉ុន្តែពុំមែនមានន័យថា ទម្លាប់រស់នៅមិនល្អសម្រាប់សុខភាព ហើយអាចរំពឹងពីគុណប្រយោជន៍ពីតែបៃតងមកទូទាត់សងគ្នានោះទេ។

សម្រាប់លទ្ធផលស្រាវជ្រាវខាងលើក៏បានចុះផ្សាយលើ ព្រឹត្តបត្រវេជ្ជសាស្រ្តពាក់ព័ន្ធជំងឺបេះដូងរបស់សហភាពអឺរ៉ុបផងដែរ៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ តែបៃតងផ្ដល់សុខភាព តែបើផឹក៤ពេលនេះ អាចបង្កជាគ្រោះថ្នាក់

ចុចអាន៖ តែបៃតងពិត មិនឆុងចេញពណ៌បៃតងទេ ព្រោះថា…..

Related Topics:តែបៃតង