Omicron ឆ្លងខ្លាំងជាង Delta ៧០ដង តែមិនសូវឈឺធ្ងន់ទេ

វីរុសបំប្លែងខ្លួន Omicron ឆ្លងលឿនជាងមេរោគប្រភេទ Delta ប្រហែល៧០ដង បើទោះបីជាភាពធ្ងន់ធ្ងរនៃជំងឺនេះ ទំនងជាទាបជាងក៏ដោយ។ នេះបើយោងតាមការសិក្សារបស់សាកលវិទ្យាល័យហុងកុង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីថ្លែងការណ៍ពីសាកលវិទ្យាល័យកាលពីថ្ងៃពុធ បានឲ្យដឹងថា ល្បឿននៃការរីករាលដាលរបស់ Omicron នៅក្នុងទងសួតរបស់មនុស្ស ត្រូវបានរកឃើញក្នុងរយៈពេល២៤ម៉ោងបន្ទាប់ពីការឆ្លង។

ការសិក្សាដែលធ្វើឡើងដោយក្រុមអ្នកស្រាវជ្រាវដឹកនាំដោយលោក Michael Chan Chi-wai បានរកឃើញថា វីរុសបំប្លែងខ្លួនដែលគួរឲ្យព្រួយបារម្ភថ្មីបំផុតនេះ បានបំបែកខ្លួននៅក្នុងជាលិកាសួតរបស់មនុស្សតិចជាងមេរោគប្រភេទដើម១០ដង ដែលនេះអាចជាសញ្ញាធ្វើឲ្យអ្នកឆ្លងមិនសូវមានជំងឺធ្ងន់ធ្ងរ។

ការសិក្សាបង្ហាញថា Omicron ពិតជាឆ្លងលឿនពីមនុស្សម្នាក់ទៅមនុស្សម្នាក់ទៀតមែន ប៉ុន្តែមិនធ្វើឲ្យខូចជាលិកាសួតដូចវីរុសប្រភេទមុនៗទេ។

គិតត្រឹមពេលនេះ វីរុសបំប្លែងខ្លួន Omicron បានវាយលុកប្រទេសចំនួន៧៧រួចទៅហើយ ក្នុងរយៈពេល៣សប្តាហ៍ បន្ទាប់ពីការរកឃើញដំបូងនៅអាហ្វ្រិកខាងត្បូង។

ការស្រាវជ្រាវថ្មីចេញពីទីក្រុងហុងកុង គឺដូចទៅនឹងការពិពណ៌នាដោយគ្រូពេទ្យមួយចំនួនដែរ ដែលថា អ្នកឆ្លង Omicron ភាគច្រើនរហូតមកដល់ពេលនេះ គឺស្រាល ហើយមិនតម្រូវឲ្យសម្រាកនៅមន្ទីរពេទ្យឡើយ។

ការសង្កេតដំបូងបានបង្ហាញថា អ្នកជំងឺភាគច្រើនមិនត្រូវការអុកស៊ីសែន ឬចូលសង្គ្រោះបន្ទាន់នោះទេ ប៉ុន្តែក្រុមអ្នកជំនាញ និងស្ថាប័នសុខភាពសាធារណៈជាច្រើន រួមទាំងអង្គការសុខភាពពិភពលោកផងដែរ បានជំរុញឲ្យមានការប្រុងប្រយ័ត្ន។ ករណីឆ្លងទម្លុះ និងការឆ្លងឡើងវិញជាច្រើន ត្រូវបានរកឃើញ៕

ប្រែសម្រួល៖ Vann Vann

ប្រភព៖ Bloomberg

ចុចអាន៖ ថៃ ព្រមានផ្ទុះ អូមីក្រុង ខ្លាំងក្លាក្រោយការប្រារព្ធពិធីឆ្លងឆ្នាំ