សុខភាព

អ្នកទើបកើតជំងឺផ្ដាសាយ ទំនងមានប្រព័ន្ធការពាររាងកាយប្រឆាំងកូវីដ-១៩ ខ្លះ

បានផុស

២ years មុន

នៅ

ថ្ងៃអាទិត្យ ២៣ មករា ២០២២

ដោយ

ការសិក្សាមួយបានលើកឡើងថាអ្នកទើបកើតជំងឺផ្ដាសាយធម្មតាថ្មីៗ ប្រព័ន្ធការពាររាងកាយទំនងជាអាចប្រឆាំងនឹងវីរុសកូវីដ-១៩ បានខ្លះដែរ ដោយថាវីរុសបង្កជំងឺផ្ដាសាយធម្មតាមានមួយចំនួនបង្កឡើងដោយអម្បូរវីរុសកូរ៉ូណា ដូចវីរុសកូវីដ-១៩ ដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន BBC បានផ្សាយការសិក្សាមួយកាលពីថ្ងៃទី១១ ខែមករា ឆ្នាំ២០២២ ពីការសិក្សាទ្រង់ទ្រាយតូចមួយលើមនុស្សចំនួន ៥២នាក់បានរស់នៅជាមួយអ្នកទើបឆ្លងកូវីដ-១៩ និងមានបោះពុម្ពផ្សាយក្នុងNature Communications ។

ការសិក្សាបានរកឃើញថា អ្នកដែលទើបបានឆ្លងជំងឺផ្ដាសាយធម្មតា គឺមានកោសិកាប្រព័ន្ធភាពស៊ាំច្បាស់លាស់មួយ ដែលអាចការពារការឆ្លងនៅលើកក្រោយទៀត ដែលគេជឿថាក៏ទំនងជាអាចជួយបានខ្លះក្នុងការប្រឆាំងនឹងការឆ្លងជំងឺកូវីដ-១៩។

ប៉ុន្តែអ្នកជំនាញក៏ព្រមានដែរថា អ្នកធ្លាប់កើតជំងឺផ្ដាសាយធម្មតាមិនត្រូវរំពឹងលើកោសិកាប្រព័ន្ធភាពស៊ាំនេះទេ គឺត្រូវតែចាក់វ៉ាក់សាំងបង្ការកូវីដ-១៩ ជាចាំបាច់។

វីរុសកូវីដ-១៩ បង្កឡើងដោយពពួកវីរុសអម្បូរកូរ៉ូណា ហើយវីរុសបង្កជំងឺផ្ដាសាយមួយចំនួនក៏បង្កឡើងដោយអម្បូរវីរុសកូរ៉ូណាដែរ។ ដូចនេះហើយបានជាអ្នកវិទ្យាសាស្ត្រចង់ដឹងថាប្រព័ន្ធការពាររាងកាយយើងដែលអាចប្រឆាំងនឹងវីរុសផ្ដាសាយធម្មតាបាន តើអាចនឹងប្រឆាំងនឹងវីរុសកូរ៉ូណាផ្សេងទៀតបានដែរឬយ៉ាងណា។

បើទោះជា អ្នកជំនាញបញ្ជាក់ថា វាអាចជាកំហុសធំមួយ បើគ្រប់គ្នាគិតថាអ្នកទើបឆ្លងជំងឺផ្ដាសាយធម្មតា អាចមានប្រព័ន្ធការពារដោយស្វ័យប្រវត្តិ ប្រឆាំងនឹងវីរុសកូវីដ-១៩ នោះ ព្រោះថាជំងឺផ្ដាសាយធម្មតាដែលបង្កដោយវីរុសអម្បូរកូរ៉ូណាមានប្រហែលពី ១០ ទៅ១៥ភាគរយប៉ុណ្ណោះ ក្រៅពីនោះជាអម្បូរផ្សេងទៀត។

ហេតុអ្វីអ្នកបានឆ្លងជំងឺផ្ដាសាយធម្មតាទំនងអាចការពារពីកូវីដ-១៩ បាន?

ក្រុមអ្នកស្រាវជ្រាវបានសិក្សាទៅលើផ្នែកសំខាន់នៃកោសិកា T-Cell របស់ប្រព័ន្ធភាពស៊ាំ។ អ្នកសិក្សាបានរកឃើញថា កោសិកា T-Cells ខ្លះបានសម្លាប់វីរុសជាក់លាក់មួយចំនួន ដូចជាវីរុសផ្ដាសាយ ហើយពេលជំងឺផ្ដាសាយជាសះស្បើយឡើងវិញ កោសិកា T-Cells ទាំងនោះនៅបន្តមានវត្តមានក្នុងរាងកាយរបស់យើង និងបានត្រៀមខ្លួនជាស្រេចក្នុងការប្រឆាំងនឹងវីរុសដែលចូលមកថ្មីទៀត។

កាលពីខែកញ្ញា ឆ្នាំ២០២០ ក្រុមអ្នកស្រាវជ្រាវបានសិក្សាលើមនុស្សចំនួន ៥២នាក់ ដែលមិនទាន់បានចាក់វ៉ាក់សាំង និងបានរស់នៅជាមួយទើបឆ្លងវីរុសកូវីដ-១៩។ ពាក់កណ្ដាលនៃ អ្នកទាំងនោះបានឆ្លងកូវីដ-១៩ និងពាក់កណ្ដាលទៀតមិនមានឆ្លងនោះទេ ក្នុងរយៈពេលសិក្សាចំនួន ២៨ថ្ងៃ។

មួយភាគបីនៃអ្នកមិនឆ្លងកូវីដ-១៩ នោះត្រូវបានគេរកឃើញថាមានកោសិកាT-Cells ជាក់លាក់មួយចំនួនក្នុងឈាម។ ការសិក្សាបញ្ជាក់ទៀតថា អ្នកទាំងនោះទំនងជាមានកោសិកាT-Cells ក្នុងរាងកាយក្រោយពីបានឆ្លងវីរុសអម្បូរកូរ៉ូណាញឹកញាប់ គឺវីរុសបង្កជំងឺផ្ដាសាយធម្មតា។

យ៉ាងណា អ្នកជំនាញព្រមានថា ទោះជាមានការសិក្សាបែបនេះក្ដី តែការចាក់វ៉ាក់សាំងបង្ការកូវីដ-១៩ នៅតែជារឿងសំខាន់ដែលគ្រប់គ្នាត្រូវធ្វើ៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ អូមីក្រុង គ្រុនផ្ដាសាយ និងអាឡ័កស៊ី មានរោគសញ្ញាខុសគ្នាយ៉ាងម៉េចខ្លះ?

ចុចអាន៖ ស្ត្រីពពោះមិនទាន់ចាក់វ៉ាក់សាំងកូវីដ បង្កជាក្ដីបារម្ភ ពេលអូមីក្រុងរាតត្បាត