តើស្ត្រីដែលកើតជំងឺទឹកនោមផ្អែម អាចមានផ្ទៃពោះបានទេ? ត្រូវរៀបចំខ្លួនបែបណាខ្លះ?

ជំងឺទឹកនោមផ្អែម គឺកើតឡើងទាំងបុរស និងស្ត្រី មិនត្រឹមតែមនុស្សចាស់ឡើយ សូម្បីតែកុមារក៏មានកើតជំងឺនេះដែរ។ សម្រាប់ស្ត្រីដែលមានជំងឺទឹកនោមផ្អែម ឬសាធារណជនមួយចំនួនច្បាស់ជាចង់ដឹងថា តើស្ត្រីដែលមានជំងឺទឹកនោមផ្អែមអាចមានផ្ទៃពោះបានទេ? តើគួររៀបចំខ្លួនបែបណាមុននឹងមានផ្ទៃពោះ?

ពាក់ព័ន្ធនឹងករណីនេះ វេជ្ជបណ្ឌិតនៅមន្ទីរពេទ្យកាល់ម៉ែតបានលើកឡើងលើទំព័រហ្វេសប៊ុកថា ជំងឺទឹកនោមផ្អែមដែលកើតលើស្ត្រីមានផ្ទៃពោះមាន៣ប្រភេទ គឺប្រភេទទី១ ប្រភេទទី២ និងប្រភេទទីបី។ ចំពោះស្រ្តីដែលកើតជំងឺទឹកនោមផ្អែម ហើយប្រាថ្នាចង់បានបុត្រតើគាត់អាចមានបុត្របានដែរឬទេ? ពិតណា គឺ គាត់នៅតែអាចមានបុត្របាន ប៉ុន្តែគាត់ត្រូវតែរៀបចំខ្លួនឱ្យបានល្អដើម្បីជៀសវាងផលវិបាកទាំងម្តាយ និងទារក។ ស្រ្តីដែលមានជំងឺទឹកនោមផ្អែមប្រភេទទី១ ឬ ប្រភេទទី២ នៅពេលដែលប្រាថ្នាចង់បានបុត្រ គួរគប្បីរៀបចំខ្លួនដូចខាងក្រោម៖

• ពិនិត្យហើយតាមដានជាតិស្ករឱ្យមានលំនឹងមុននឹងប្រាថ្នាយកបុត្រ (A1C< ៧%)។
• ប្រឹក្សាជាមួយគ្រូពេទ្យឯកទេសជំងឺទឹកនោមផ្អែម ចំពោះអ្នកជំងឺដែលមានជំងឺទឹកនោមផ្អែមប្រភេទទី១ ត្រូវបន្តអាំងស៊ុយលីន។

រីឯ អ្នកជំងឺទឹកនោមផ្អែម ប្រភេទទី២ ដែលប្រើថ្នាំគ្រាប់ក្នុងការព្យាបាល ហើយប្រាថ្នាយកបុត្រ គឺត្រូវប្រឹក្សាជាមួយគ្រូពេទ្យដើម្បីធ្វើការផ្លាស់ប្តូរថ្នាំគ្រាប់មួយចំនួន ចៀសវាងអាចប៉ះពាល់ទៅលើទារកក្នុងករណីចាំបាច់ត្រូវធ្វើការផ្លាស់មកប្រើថ្នាំចាក់ អាងស៊ុយលីនវិញ។

• អ្នកជំងឺទឹកនោមផ្អែមជាស្រ្តីដែលប្រាថ្នាចង់បានបុត្រគួរគប្បីទៅពិនិត្យភ្នែក ពិនិត្យបេះដូង និង ពិនិត្យតម្រងនោម។
• បើកំពុងប្រើថ្នាំបញ្ចុះឈាម រឺថ្នាំបញ្ចុះខ្លាញ់ ត្រូវប្រឹក្សារជាមុនដើម្បីបានការជំនួស ឬ បញ្ឈប់។
• អ្នកជំងឺគួរគប្បីប្រឹក្សាជាមួយគ្រូពេទ្យ ឬ អ្នកឯកទេសខាងជំនាញម្ហូបអាហារ។

យ៉ាងណាមិញ ស្រ្តីត្រូវថែរក្សាកម្រិតជាតិស្ករឱ្យបានល្អ និងតឹងរឹងបំផុត គឺមុនពេលទទួលទានបាយជាតិស្ករ ៩០-១០០mg/dL និងក្រោយពេលទទួលទានបាយពីរម៉ោងតិចជាង១២០mg/dL (ឬ មួយម៉ោងក្រោយបាយតិចជាង១៤០mg/dL)៕

ប្រភព៖ មន្ទីរពេទ្យកាល់ម៉ែត