កម្ពុជា ប្តេជ្ញាក្នុងការកាត់បន្ថយហានិភ័យនៃជំងឺទឹកនោមផ្អែម

កម្ពុជា តាមរយៈក្រសួងសុខាភិបាល ប្តេជ្ញាក្នុងការកាត់បន្ថយហានិភ័យនៃជំងឺទឹកនោមផ្អែម និងបានណែនាំដល់ប្រជាពលរដ្ឋដែលមានជំងឺទឹកនោមផ្អែមត្រូវជ្រើសរើសសេវាព្យាបាលឱ្យបានត្រឹមត្រូវ និងលើកទឹកចិត្តឱ្យកាត់បន្ថយជាតិផ្អែម និងជាតិប្រៃពេក នៅពេលបរិភោគអាហារ។

ក្នុងឱកាស ទិវាទឹកនោមផ្អែមពិភពលោក ២០២៤ ដែលធ្វើឡើងក្រោមប្រធានបទ ‟ជម្នះឧបសគ្គដោះស្រាយបញ្ហាជំងឺទឹកនោមផ្អែម និងសុខុមាលភាព” វេជ្ជបណ្ឌិត ង៉ូវ កាង រដ្ឋលេខាធិការក្រសួងសុខាភិបាល នៅថ្ងៃទី ២៣ ខែវិច្ឆិកានេះ បានរៀបចំពិធីនេះនៅក្នុងទឹកដីខេត្តតាកែវ។ ក្រៅពីខេត្តនេះ ក្រសួងសុខាភិបាលរៀបចំកម្មវិធីនេះទៅទីតាំងផ្សេងៗទៀត ដើម្បីផ្សព្វផ្សាយ និងបញ្ជ្រាបហានិភ័យនៃជំងឺទឹកនោមផ្អែម។

ទិវានេះមានគោលបំណងគាំទ្រការប្តេជ្ញាចិត្តរបស់កម្ពុជា ក្នុងការកាត់បន្ថយហានិភ័យនៃជំងឺទឹកនោមផ្អែម និងធានាថាមនុស្សទាំងអស់ដែលត្រូវបានធ្វើរោគវិនិច្ឆ័យថាមានជំងឺទឹកនោមផ្អែមអាចទទួលបានការព្យាបាល និងការថែទាំប្រកបដោយសមធម៌ ទូលំទូលាយ តម្លៃសមរម្យ និងប្រកបដោយគុណភាព។

ក្នុងឱកាសនោះដែរ លោក​ ង៉ូវ កាង បានណែនាំដល់ប្រជាពលរដ្ឋដែលមានជំងឺទឹកនោមផ្អែមត្រូវជ្រើសរើសសេវាព្យាបាលឱ្យបានត្រឹមត្រូវ ពោលត្រូវមកកាន់មន្ទីរពេទ្យឬមណ្ឌលសុខភាពដែលនៅជិតដើម្បីទទួលការព្យាបាលបានទាន់ពេលវេលា ដែលធ្វើឱ្យចំណេញទាំងពេលវេលា ថវិកា និងធានាបាននូវសុខភាពល្អបន្តបំពេញការងារប្រចាំថ្ងៃដូចប្រជាពលរដ្ឋទូទៅ។

ក្រសួងសុខាភិបាល អំពាវនាវឱ្យចូលរួមទាំងអស់គ្នា ក្នុងការលើកកម្ពស់ការយល់ដឹង ផ្សព្វផ្សាយចំណេះដឹង ការផ្លាស់ប្ដូរឥរិយាបថរបៀបរបបនៃការរស់នៅដើម្បីកាត់បន្ថយការកើតនៃជំងឺទឹកនោមផ្អែម ដោយបង្កើនសកម្មភាពរាងកាយដូចជាការធ្វើលំហាត់ប្រាណឱ្យបានទៀងទាត់ ការបរិភោគចំណីអាហារប្រកបដោយសុខភាពដោយកាត់បន្ថយអាហារដែលមានជាតិ ប្រៃ ផ្អែម និងជាតិខ្លាញ់ ចៀសវាងការពិសាគ្រឿងស្រវឹង និងបារី។

រាជរដ្ឋាភិបាលក្រោមការដឹកនាំ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្រសួងសុខាភិបាល បានយកចិត្តទុកដាក់ខ្ពស់លើបញ្ហាជំងឺទឹកនោមផ្អែម ដោយបានផ្គត់ផ្គង់ឱសថ និងសម្ភារតេស្តរកជំងឺ​ទឹក​នោមផ្អែមនៅគ្រប់មន្ទីរពេទ្យបង្អែក និងមណ្ឌលសុខភាពទាំងអស់ដើម្បីធ្វើយ៉ាងណាការពារសុខភាព និងអាយុជីវិតរបស់ប្រជាពលរដ្ឋឱ្យកាន់តែល្អប្រសើរឡើង៕