សុខភាព

ឆមាសទី ១ ឆ្នាំនេះ កុមារ និងស្ត្រីមានផ្ទៃពោះជាង ៦៦ ម៉ឺននាក់ ទៅពិគ្រោះព្យាបាលជំងឺនៅមន្ទីរពេទ្យគន្ធបុប្ផា

បានផុស

១ year មុន

នៅ

ថ្ងៃព្រហស្បតិ៍ ៣ កក្កដា ២០២៥

ដោយ

លោក គី សន់ទី ប្រធានមន្ទីរពេទ្យគន្ធបុប្ផា បានមានប្រសាសន៍នៅព្រឹកថ្ងៃទី ៣ កក្កដា នេះថា ក្នុងរយៈពេល ៦ ខែ ឆ្នាំ ២០២៥ នេះ មានទារក កុមារ និងស្ត្រីមានផ្ទៃពោះ ចំនួន ៦៦០ ៧៣៨ នាក់ បានទៅពិនិត្យក្រៅ សម្រាកពេទ្យ និងសម្រាលកូន នៅមន្ទីរពេទ្យគន្ធបុប្ផាភ្នំពេញ និងជ័យវរ្ម័នទី ៧ (គន្ធបុប្ផាទី ៣) ក្នុងខេត្តសៀមរាប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបន្តទៀតថា ក្នុងនោះ មានទារក កុមារ និងស្ត្រីមានផ្ទៃពោះចំនួន ៥០៣ ២៣៣ នាក់ បានទៅពិគ្រោះ ពិនិត្យ និងព្យាបាលជំងឺ កើនឡើង ១៨% បើធៀបទៅរយៈពេល ៦ ខែ ដូចគ្នា កាលពីឆ្នាំ ២០២៤។ ចំណែកកុមារសម្រាកព្យាបាលក្នុងមន្ទីរពេទ្យចំនួន ៩៦ ២៣៧ នាក់ កើន ១៧% ធៀបនឹងឆ្នាំ ២០២៤។ ករណីជំងឺគ្រុនឈាម សម្រាកក្នុងមន្ទីរពេទ្យ ចំនួន ៣ ៤៧១ នាក់។ ស្ត្រីមានផ្ទៃពោះពិនិត្យតាមដានផ្ទៃពោះ ចំនួន ៥១ ៩៧៩ ករណី សម្រាលកូនចំនួន ៩ ៤៧១ នាក់ ការវះកាត់ទូទៅ ចំនួន ១៦ ១១៨ នាក់ វះកាត់ជំងឺបេះដូងពីកំណើតចំនួន ៥៥០ នាក់។

លោកបានបន្តទៀតថា បច្ចុប្បន្នមន្ទីរពេទ្យមានគ្រែសរុបចំនួន ២ ០៨៧ គ្រែ ក្នុងនោះ ផ្នែកសម្ភពមានចំនួន ២២៧ គ្រែ ដែលមានបុគ្គលិកសរុបចំនួន ២ ៦០០ នាក់។

គួរបញ្ជាក់ថា ដើម្បីជួយទ្រទ្រង់ដល់ដំណើរការផ្តល់សេវាពិនិត្យ និងព្យាបាលជំងឺជូនកុមារ និងស្ត្រីមានផ្ទៃពោះ កាលពីរសៀលថ្ងៃទី ៣ ខែមិថុនា ឆ្នាំ ២០២៥ កាកបាទក្រហមកម្ពុជា បានផ្តល់ថវិកាចំនួន ១ លានដុល្លារ ជូនមូលនិធិគន្ធបុប្ផាកម្ពុជា ក្រោមអធិបតីភាព លោកជំទាវបណ្ឌិត ពេជ ចន្ទមុនី្ន ហ៊ុន ម៉ាណែត អនុប្រធានអចិន្ត្រៃយ៍ កាកបាទក្រហមកម្ពុជា នៅទីស្នាក់ការកណ្តាលកាកបាទក្រហមកម្ពុជា ខណៈក្នុងមួយឆ្នាំៗ មន្ទីរពេទ្យគន្ធបុប្ផា បានចំណាយថវិកាប្រមាណ ៤៣ លានដុល្លារអាមេរិក សម្រាប់ដំណើរការផ្តល់សេវាពិនិត្យ និងព្យាបាលជំងឺដល់កុមារ និងស្ត្រីមានផ្ទៃពោះកម្ពុជា៕

អត្ថបទ ៖ សំអឿន