រឿងពិតមួយ! ព្រះរាជបុត្រា អារ៉ាប់រួម ក៏ចិញ្ចឹមតោ និងជាអ្នកស្រឡាញ់សត្វជាទីបំផុត

ខណៈដែលអ្នកមានៗនិងមហាសេដ្ឋីច្រើននាក់លើលោក មិនធ្លាប់បញ្ចេញប្រភេទសត្វព្រៃណាមួយថាជាសត្វចិញ្ចឹមរបស់ខ្លួន គេបានដឹងថា ព្រះរាជបុត្រានៃទីក្រុង ឌូបៃ មានតោមួយក្បាលជាសត្វចិញ្ចឹម។

ព្រះរាជបុត្រស្នងបល្ល័ង្ក ព្រះអង្គម្ចាស់ Sheikh Hamdan bin Mohammed នៃប្រទេសអារ៉ាប់រួម ហើយក៏ជាមហាសេដ្ឋីមួយរូបផងនោះ ត្រូវបានសាធារណជនដឹងរឿងពិតមួយដែលថា ទ្រង់ជាមនុស្សស្រឡាញ់សត្វជាទីបំផុត។ ក្នុងនោះទ្រង់បានយកតោមួយក្បាលឈ្មោះ Moochi ទុកជាសត្វចិញ្ចឹមរបស់ទ្រង់ទៀតផង។

ដោយសាររាជបុត្រាអង្គនេះតែងតែបង្ហោះរូបថតដំណើរទស្សនកិច្ចតាមទីកន្លែងផ្សេងៗជាមួយសត្វជារឿយៗ ដូច្នេះវាមិនចម្លែកឡើយ ដែលគេដឹងច្បាស់ថាទ្រង់ស្រឡាញ់សត្វប៉ុនណា។ ទ្រង់ជាមនុស្សចូលចិត្តកីឡាច្រើនប្រភេទ ក៏ដូចជាការប្រណាំងសេះជាដើម។ ជាពិសេស ទ្រង់ជាសកម្មជនអភិរក្សសត្វយ៉ាងលេចធ្លោមិនថានៅក្នុងប្រទេស​ ឬលើឆាកអន្តរជាតិឡើយ។

តាមប្រភពពីគណនី IG របស់ទ្រង់ គេអាចឃើញរូបថតស្និទ្ធស្នាល​ជាមួយសត្វតោ ដំរី សេះ អូដ្ឋ ឥន្ទ្រី អូទ្រីស កូនឆ្កែ និងសត្វបក្សីជាច្រើនប្រភេទទៀត។

ព្រះអង្គម្ចាស់ Sheikh Hamdan ក៏ត្រូវគេទម្លាយដែរថា ​ជា​ម្ចាស់​សេះ​ប្រហែល ១,០០០ ក្បាលនៅទូទាំងពិភពលោក។ មិនតែប៉ុណ្ណោះ ទ្រង់​ក៏​ជា​ម្ចាស់​មហោស្រព Camel​ ដែល​មាន​សត្វ​អូដ្ឋ​ជាង ១២០ ក្បាល​ ហើយក៏មាន​កសិដ្ឋាន​ចិញ្ចឹម​សត្វ​ខ្លា​ធំៗ ដែល​ទ្រង់តែងឆ្លៀតពេល​ទៅលេង​ជាមួយពួកវា។

ចំពោះតោរបស់ទ្រង់ពុំមាននរណាបង្ហើបព័ត៌មានលម្អិតអំពីវាឡើយ។  យ៉ាងណាមិញគេបានឃើញវីដេអូឃ្លីបមួយដែលព្រះអង្គម្ចាស់អង្គនេះបានបង្ហោះនៅលើបណ្ដាញសង្គម IG កាលពីឆ្នាំ ២០១៩។ ​ប៉ុន្តែមកទល់បច្ចុប្នន្ន មិនមានព័ត៌មានបន្ថែមពីសត្វតោ Moochi  នោះទេ៕

ប្រែសម្រួល៖ សន្យា

ចុចអាន៖ រឿង​រ៉ាវ​ដ៏​​មាន​ឥទ្ធិពល​អំពី​ព្រះរាជបុត្រាឌូបៃ SHEIKH HAMDAN

ចុចអាន៖ បង្ហាញមុខប្រធានាធិបតីស្ត្រីដំបូងរបស់ប្រទេស ៤ នៅទ្វីបអាស៊ី