វិធីសាស្ត្រត្រឹមត្រូវ ជួយកូនៗឱ្យគេចផុតពីសម្ពាធ ដោយសារកូវីដ-១៩

ទិន្នន័យត្រឹមពាក់កណ្ដាលឆ្នាំ ២០២១ ​កុមារ​ប្រមាណជាង ១.៤ ពាន់​លាន​នាក់​នៅ​ទូទាំង​ពិភពលោក​ កំពុង​រស់នៅ​ក្រោម​ការ​បិទខ្ទប់​ ព្រោះតែជំងឺ​រាតត្បាត។ តួលេខ​ដែល​ប្រមូល​បាន​ពី NEU របស់អង់គ្លេសបង្ហាញ​ថា​ ក្មេងៗ​អាយុ​ពី ៥ ទៅ ១១ ឆ្នាំ​កំពុងមាន​អារម្មណ៍​ឯកោ​ ហើយប្រមាណ ២៨ ភាគរយក្នុងចំណោមនោះកំពុងរងសម្ពាធផ្លូវចិត្ត។

ស្របពេលដែលសាលារៀនត្រូវបានបិទទទ្វារជាបណ្ដោះអាសន្ន ក្មេងៗក៏ត្រូវនៅផ្ទះជាមួយប៉ាម៉ាក់​ឬសាច់ញាតិ ដែលនាំឱ្យពួកគេកើតរោគធុញទ្រាន់ ឯកោ និងរងសម្ពាធ ព្រោះថាមិនបានចេញក្រៅដូចមុន។

ដូច្នេះ ដើម្បីកុំឱ្យកុមារប៉ះពាល់ផ្លូវចិត្ត អាណាព្យាបាលអាច​បង្កើត​ភាព​រីករាយ​ជាមួយ​សកម្មភាពសាមញ្ញៗនៅផ្ទះដោយ រៀនចម្អិន​អាហារជាមួយកូនៗ នាំកូនធ្វើលំហាត់​ប្រាណ បង្កើតសួនដាំដំណាំជាមួយគ្នា នាំពួកគេអានសៀវភៅ ឬមើល​រឿងអប់រំជាដើម។

មួយវិញទៀត ឪពុកម្ដាយក៏គួរទុកឱកាសឱ្យកូនៗបានជជែកលេងជាមួយមិត្តភក្តិតាមរយៈអនឡាញផងដែរ។

ជា​រឿយ​ៗ​ឪពុកម្ដាយតែង​ព្រួយបារម្ភ​អំពី​ជជែកគ្នាលេង​ជាមួយ​​មិត្ត​ក្នុង​អ៊ីនធើណិត។ តាមពិតទៅក្មេងតូចៗនិងពួក​វ័យ​ជំទង់​រីករាយ​នឹង​ការ​ហៅ​វីដេអូ​ណាស់។ ក្នុងន័យនេះ ​ប្រព័ន្ធ​ផ្សព្វផ្សាយ​សង្គម​អាច​ជួយ​រក្សា​មិត្តភាព ​និង​ផ្ដល់​នូវ​អារម្មណ៍​នៃ​ការ​ភ្ជាប់​ទំនាក់ទំនង​រវាងគ្នាបានល្អ។ ប្រសិនបើប្រើត្រឹមត្រូវ បច្ចេកវិទ្យា គឺ​ជាបណ្ដាញដ៏ល្អសម្រាប់​កុមារ​និង​ក្មេង​ជំទង់ដើម្បីអភិវឌ្ឍទំនាក់ទំនងជាមួយសង្គម និងបង្កើនចំណេះដឹងដល់ពួកគេ។

យ៉ាងណាមិញ សម្រាប់​កុមារ​តូចៗ​ ការ​ប្រើ​បច្ចេកវិទ្យា​ដើម្បី​រក្សា​ទំនាក់ទំនង​ជាមួយ​មិត្តភក្ដិ​​ អាច​មាន​ការ​ពិបាក ​និង​ហានិភ័យ​ផ្សេងៗ។ ជាការល្អ ឪពុកម្ដាយ​និង​បងៗ​គួរ​តែ​គាំទ្រ​ក្មេងៗ ​ដោយ​លេង​ជាមួយ​ពួកគេ​ជំនួស​ឱ្យការបណ្ដោយឱ្យពួកគេលេងជាមួយមិត្តតែម្នាក់ឯង៕

ប្រែសម្រួល៖ សន្យា

ចុចអាន៖ បង្កើតទម្លាប់ល្អៗ ៣នេះសម្រាប់កូន ទើបជួយពួកគេឱ្យមានសុខភាពល្អនិងឆ្លាតវៃ

ចុចអាន៖ ស្រីៗអាយុតិច មានកូនឆ្លាតជាងអ្នក​អាយុច្រើន ព្រោះហេតុផលបែបនេះ