ព័ត៌មានជាតិ

អ្នកជំនាញណែនាំឱ្យតាមដានព័ត៌មានពីប្រភពផ្លូវការដើម្បីបញ្ជៀសជំងឺថប់បារម្ភ

បានផុស

៨ ខែ មុន

នៅ

ថ្ងៃអង្គារ ១៩ សីហា ២០២៥

ដោយ

អ្នកជំនាញផ្នែកចិត្តសាស្ត្របានណែនាំឱ្យពលរដ្ឋតាមដានព័ត៌មានពីប្រភពផ្លូវការដើម្បីបញ្ជៀសនូវជំងឺថប់បារម្ភដោយសារការបំពុលព័ត៌មានពីប្រទេសថៃ និងព័ត៌មានក្លែងក្លាយក្នុងស្រុកមួយចំនួន។ លោកថាជំងឺថប់បារម្ភនេះអាចប៉ះពាល់ធ្ងន់ធ្ងរប្រសិនបើយើងមិនបានដឹងខ្លួននិងបន្តបំភ័យខ្លួនតាមរយៈព័ត៌មានក្លែងក្លាយទាំងនោះ។

បន្ទាប់ពីមានបញ្ហាព្រំដែនជាមួយកម្ពុជាសារព័ត៌មានថៃជាបន្តបន្ទាប់បានធ្វើសេចក្ដីរាយការណ៍ជាច្រើនវាយប្រហារមកលើរដ្ឋាភិបាលកម្ពុជាក្នុងសង្គ្រាមព័ត៌មាន បូករួមទាំងការផ្សព្វផ្សាយបែបញុះញង់បន្ថែមដោយក្រុមដែលមាននិន្នាការប្រឆាំងផងដែរ។ រដ្ឋមន្ត្រីព័ត៌មានកម្ពុជាធ្លាប់បញ្ជាក់ហើយថា ប្រភពព័ត៌មានផ្លូវការអំពីជម្លោះព្រំដែន គឺមានតែក្រសួងការពារជាតិ ក្រសួងការបរទេស រដ្ឋាភិបាល សារលើទំព័រហ្វេសប៊ុកសម្ដេចតេជោ និងសម្ដេចធិបតី។

អ្នកជំនាញផ្នែកចិត្តសាស្ត្រលោក ស៊ាង លាប បានលើកឡើងក្នុងវេទិកាអ្នកជំនាញកម្ពុជាថ្មីកាលពីថ្ងៃទី១៦ ខែសីហា ថា ក្នុងស្ថានភាពប្រឈមមុខផ្នែកប្រដាប់អាវុធជាមួយថៃបច្ចុប្បន្ននេះការទទួលព័ត៌មានពីប្រភពច្បាស់លាស់ និងពីរដ្ឋាភិបាលអាចការពារពីបញ្ហាផ្លូវចិត្តថប់បារម្ភបាន។ ដោយឡែកសម្រាប់អ្នកដែលមានសុខភាពផ្លូវចិត្តទន់ខ្សោយសូមនៅឱ្យឆ្ងាយពីទូរស័ព្ទមួយរយៈសិន។

លោកថា៖ «សូមតាមដានព័ត៌មានផ្លូវការព្រោះនៅតាមបណ្ដាញសង្គមព័ត៌មានក្លែងក្លាយច្រើនណាស់! អ៊ីចឹងសូមពិនិត្យមើល ហើយសូមពិនិត្យមើលថាបុគ្គលហ្នឹង(អ្នកអត្ថាធិប្បាយតាមបណ្ដាញសង្គម)មានផ្លូវចិត្តយ៉ាងមិច? បើគាត់មានផ្លូវចិត្តទន់ខ្សោយអ្វីដែលគាត់និយាយមិនមែនជាចេតនារបស់គាត់ទេ តែផ្លូវចិត្តរបស់គាត់(មានបញ្ហា)។ អ៉ីចឹងអ្វីដែលត្រូវតាមដានសូមតាមដានអ្វីដែលជាព័ត៌មានផ្លូវការ យល់ល្អប្រសិនជាយើងយល់ថាផ្លូវចិត្តយើងអត់រឹងមាំទេ! សូមនៅឱ្យឆ្ងាយពីទូរស័ព្ទខ្លះទៅ»។

យោងតាមការបង្ហោះរបស់មន្ទីរពេទ្យកាល់ម៉ែត ជំងឺថប់បារម្ភគឺជាការព្រួយបារម្មណ៍ហួសហេតុ និងមិនសមហេតុផលអំពីបញ្ហាប្រចាំថ្ងៃ អ្នកជំងឺតែងតែពិបាកក្នុងការគ្រប់គ្រងអារម្មណ៍ឬមានការលំបាកក្នុងការស្ងប់ស្ងាត់ដែលមានរយៈពេលលើសពី៦ខែ។ វាមានរោគសញ្ញាដូចជា ឆាប់ភ័យ ឆាប់ខឹងមួរម៉ៅ ចុករោយពេញខ្លួន ល្ហិតល្ហៃ អស់កម្លាំង ពិបាកផ្តោតអារម្មណ៍ ឬឆាប់ភ្លេច និងប៉ះពាល់់ដល់ការគេង។

លោក ស៊ាង លាប ឱ្យជាយោបល់ឱ្យពលរដ្ឋតាមសង្កេតមើលប្រតិកម្មរបស់ខ្លួនប្រាណទៅនឹងអាការៈខាងលើ និងអាចរកមធ្យោបាយដើម្បីដោះស្រាយបាន។ ប្រសិនជាពលរដ្ឋមានអារម្មណ៍ដូចអាការៈខាងលើអាចកែប្រែឥរិយាបថដោយងាកមកធ្វើលំហាត់ប្រាណ ធ្វើសម្មាធិ គេងឱ្យបានគ្រប់គ្រាន់ និងចំណាយពេលលើអ្វីដែលខ្លួនចូលចិត្ត៕