ព័ត៌មានជាតិ

មន្ត្រីជាន់ខ្ពស់ក្រសួងសុខាភិបាលជំរុញឱ្យមានការយកចិត្តទុកដាក់លើបញ្ហានៃការធ្វើអត្តឃាត

បានផុស

៧ ខែ មុន

នៅ

ថ្ងៃព្រហស្បតិ៍ ២៥ ធ្នូ ២០២៥

ដោយ

រដ្ឋលេខាធិការក្រសួងសុខាភិបាលលោក ឈី ហុង បានជំរុញឱ្យមានការយកចិត្តទុកដាក់លើបញ្ហានៃការធ្វើអត្តឃាតនៅកម្ពុជាដោយជំរុញឱ្យមានការផ្សព្វផ្សាយ និងលើកកម្ពស់ផ្លូវចិត្ត ព្រមទាំងណែនាំដល់សេវាជំនួយសមស្របសម្រាប់សាធារណជន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីបើកវគ្គបណ្ដុះបណ្ដាលស្ដីពីការរាយការណ៍ព័ត៌មានប្រកបដោយការទទួលខុសត្រូវសម្រាប់អ្នកប្រកបវិជ្ជាជីវៈសារព័ត៌មាននឹងការធ្វើអត្តឃាត នៅថ្ងៃទី២៤ ខែធ្នូ ឆ្នាំ២០២៥ លោក ឈី ហុង បានជំរុញឱ្យប្រព័ន្ធផ្សព្វផ្សាយមានការយកចិត្តទុកដាក់លើបញ្ហានេះ ដោយថាពេលខ្លះការផ្សព្វផ្សាយរបស់ប្រព័ន្ធផ្សព្វផ្សាយគឺដូចជាការជំរុញឱ្យមានការធ្វើអត្តឃាតដូច្នោះ។

លោកថា៖ «ការរាយការណ៍ព័ត៌មានប្រកបដោយសីលធម៌ មនុស្សធម៌ និងគោរពតាមភស្តុតាងអាចរួមចំណែកយ៉ាងសំខាន់ក្នុងការកាត់បន្ថយការមាក់ងាយ លើកទឹកចិត្តឱ្យប្រជាពលរដ្ឋស្វែងរកជំនួយ និងការពារអាយុជីវិតមនុស្ស»។

បើតាមអង្គការសុខភាពពិភពលោកបានបញ្ជាក់ថា អត្តឃាតជាមូលហេតុនាំមុខមួយនៃការស្លាប់នៅលើពិភពលោក ដោយរៀងរាល់ប្រហែល៤០វិនាទីម្តងមានមនុស្សម្នាក់បាត់បង់ជីវិតដោយសារការធ្វើអត្តឃាត។ ដោយឡែកសម្រាប់ប្រទេសកម្ពុជាអត្រានៃការធ្វើអត្តឃាតក្រោមហេតុផលផ្សេងៗក៏មានច្រើន គួរសម និងគួរឱ្យព្រួយបារម្ភផងដែរ ដោយអ្នកធ្វើអត្តឃាតភាគច្រើនបានជ្រើសរើសការសម្លាប់ខ្លួនដោយការលោតពីលើស្ពាន លោតពីលើអគារ លេបថ្នាំពុល និងចងកជាដើម។

បច្ចុប្បន្នកម្ពុជាកំពុងពិនិត្យរៀបចំផែនការសកម្មភាពពហុវិស័យសម្រាប់បង្ការការធ្វើអត្តឃាតឆ្នាំ២០២៦-២០២៨ ដោយមានគោលបំណងធ្វើឱ្យប្រសើរឡើងនូវព័ត៌មានឃ្លាំងមើល ស្រាវជ្រាវ បង្ការការធ្វើអត្តឃាត គាំទ្រអ្នកដែលរងការប៉ះពាល់ដោយការធ្វើអត្តឃាត។ ការបង្កើនចំណេះដឹងដល់ប្រព័ន្ធផ្សព្វផ្សាយដើម្បីរាយការណ៍ស្តីពីការធ្វើអត្តឃាតប្រកបដោយការទទួលខុសត្រូវ និងកែលម្អសេវាសុខភាពផ្លូវចិត្តជូនពលរដ្ឋ៕