ជីវិតហ៊ឺហាររបស់ព្រះចៅ ស៊ុលតង់ ព្រុយណេ គ្មានស្តេចអង្គណាហ៊ានធ្វើដូច

ស្តេច Sultan Hassanal Bolkiah នៃប្រទេសព្រុយណេ​ជាមហាសេដ្ឋីមួយរូប ក្នុងចំណោមស្ដេចដែលមានទ្រព្យសម្បត្តិច្រើនជាងគេលើលោក។ ថ្វីត្បិតព្រះរាជាអង្គនេះ មិនឈរលំដាប់ទី១ នៃបញ្ជីស្ដេចមានបំផុតក៏ពិតមែន ប៉ុន្តែទ្រង់ជាស្ដេចមួយអង្គដែលចាយជីវិតហ៊ឺហារលើសស្ដេចណាៗទាំងអស់ ដោយសារការសម្ញែងទ្រព្យសម្បត្តិរបស់ទ្រង់ទៅកាន់ពិភពលោក។

យោងតាមទស្សនាវដ្ដី Forbes នៅឆ្នាំ២០២២ នេះ ស្តេច Sultan Hassanal Bolkiah មានទ្រព្យសម្បត្តិប៉ាន់ស្មានរហូតដល់ ២៨ពាន់លានដុល្លារអាមេរិក ហើយទ្រង់មានកេរ្តិ៍ឈ្មោះល្បីល្បាញជាងគេដោយសារព្រះអង្គជាស្តេចដែលនិយមចាយវាយកប់ពពក ទៅលើសម្ភារថ្លៃៗ និងវត្ថុប្រើប្រាស់ប្រណីតៗ។

ប្រភពពីគេហទំព័រ GQ India បានរាយការណ៍ថា ស្ដេច Sultan ជាម្ចាស់រថយន្តដ៏កម្របំផុតនៅលើពិភពលោក។ ជាពិសេសព្រះអង្គជាម្ចាស់រថយន្ត Rolls-Royces ចំនួន ៦០០គ្រឿង រថយន្ត Ferraris ចំនួន ៤០០គ្រឿង និងរថយន្ត Bentleys ចំនួន ៣៨០គ្រឿង។ សរុបមកទ្រង់មានរថយន្តជាង ៧០០០គ្រឿងឯណោះ ដែលមានតម្លៃប៉ាន់ស្មាន ៥ពាន់លានដុល្លារអាមេរិក។

ក្រៅពីរថយន្តទំនើបៗ ស្តេច Sultan ក៏មានយន្តហោះប្រណីតៗផងដែរដូចជា យន្តហោះ Boeing 747-400 ស្រោបមាស ប៊ូអ៊ីង 767-200 និងយន្តហោះ Airbus A340-200 ជាដើម។ ផ្នែកខាងក្នុងនៃយន្តហោះទាំងនេះសុទ្ធសឹងបិទភ្ជាប់គ្រាប់គ្រីស្តាល់ ឬមាសដ៏ប្រណីតបំផុត ដែលនេះបង្ហាញយ៉ាងច្បាស់ថា ព្រះអង្គជាព្រះរាជាសម្បូរទ្រព្យស្ដុកស្ដម្ភ នៅលើភពផែនដី។

ដោយឡែក វាំងដែលទ្រង់គង់នៅបច្ចុប្បន្ន មានទំហំរហូតដល់ ២០ម៉ឺនម៉ែត្រការ៉េ ដែលវាំងនេះមានឈ្មោះថា Istana Nurul Iman បានបញ្ចប់ការសាងសង់កាលពីឆ្នាំ ១៩៨៤ ខណៈខ្ទង់ចំណាយអស់ចំនួន ១.៤ពាន់លានដុល្លារអាមេរិក។ វាំងដ៏ស្កឹមស្កៃមួយនេះ មានបន្ទប់សម្រាកចំនួន ១,៧៧៨បន្ទប់ បន្ទប់ទឹក ២៥៧បន្ទប់ និងអាងហែលទឹកចំនួន ៥។ ហើយដោយសារ​ស្តេច Sultan ជាម្ចាស់​រថយន្ត​ទំនើប​រាប់សិបគ្រឿង ដូច្នេះ​វាំង Istana Nurul Iman មានកន្លែងចតរថយន្តដល់ទៅ ១១០ទីតាំង។

មិនតែប៉ុណ្ណោះ កាសែត The Times ​បាន​ធ្វើ​ឲ្យ​សាធារណជន​ភ្ញាក់​ផ្អើលទ្វេដង ​ពេល​រាយការណ៍​អំពី​ទម្លាប់តុបតែងខ្លួនមួយចំនួន​​របស់​ព្រះមហាក្សត្រអង្គនេះ។ ជាទូទៅទ្រង់តែងតែចំណាយប្រាក់រហូតដល់ ២ម៉ឺនដុល្លារសម្រាប់ការកាត់សក់ម្ដងៗ។ តាមពិតទៅតម្លៃនេះ មិនមែនជាតម្លៃពិសេសម្រាប់ស្តេច Sultan នោះទេ ប៉ុន្តែការចំណាយដ៏សន្ធឹកសន្ធាប់បែបនេះ គឺដោយសារព្រះអង្គសព្វព្រះទ័យប្រទានលុយធីបទៅជាងកាត់សក់។

ក្រៅពីនោះ ​ស្តេច​ព្រុយណេអង្គនេះ ​​ក៏​សព្វព្រះទ័យប្រមូល​ស្នាដៃ​សិល្បៈ​ផ្សេងៗដែរ។ ទ្រង់ធ្លាប់ចំណាយប្រាក់រហូតដល់ ៧០លានដុល្លារអាមេរិក ដើម្បីទិញគំនូរប្រេង Two Young Girls at the Piano របស់វិចិត្រករជនជាតិបារាំងដ៏ល្បីល្បាញលោក Pierre-Auguste Renoir មកតាំងក្នុងវាំងរបស់ទ្រង់។

តាមរយៈការរស់នៅ និងទ្រព្យសម្បត្តិទាំងអស់នេះហើយ ទើបបានជាស្តេច Sultan ជាប់ឈ្មោះជាព្រះរាជាហ៊ឺហារជាងគេលើលោក និងជាព្រះរាជាដែលហ៊ានចំណាយប្រាក់រាប់សិបលានដុល្លារ មិនស្ដាយស្រណោះ ឱ្យតែទ្រង់ពេញព្រះទ័យ៕

ប្រែសម្រួល៖ សន្យា

ចុចអាន៖ មកដឹងសាវតាខ្លះៗរបស់បុត្រីស្ដេច ប្រ៊ុយណេ

ចុចអាន៖ ស្ដេច ៥អង្គ មានទ្រព្យសម្បត្តិច្រើនបំផុតលើលោក នាឆ្នាំ២០២២