មុខរបរចម្លែក ៤ប្រភេទ អាចរកចំណូលបានខ្ពស់ សឹងមិនគួរឱ្យជឿ

ស្តាប់ហាក់ដូចជាអស់សំណើចបន្តិច ប៉ុន្តែតម្រូវការរបស់សង្គមសម័យទំនើប ពិតជាមានការងារចម្លែកៗមួយចំនួន ដែលប្រិយមិត្តទំនងមិនធ្លាប់ដឹងនៅឡើយ ខណៈការងារទាំងនោះអាចរកចំណូលបានរហូតដល់រាប់រយដុល្លារឯណោះ។

១. ស៊ីឈ្នួលឱប

ការឱបគឺជាឱសថដ៏កក់ក្តៅអាចព្យាបាលចិត្តឯកោ និងមនុស្សរងសម្ពាធច្រើនក្នុងជីវិតប្រចាំថ្ងៃ។ នៅប្រទេសជប៉ុន សេវាកម្មនេះបានកើតយូរឆ្នាំមកហើយ ដោយកូនឈ្នួលត្រូវផ្តល់ការឱបដើម្បីលួងលោម សម្ដែងការយល់ចិត្ត និងចែករំលែកទុក្ខវិបត្តិជាមួយអតិថិជន។ តម្លៃនៃសេវាឱបអាចឡើងដល់ជាង ៨០ដុល្លារ ក្នុងមួយម៉ោង។ យ៉ាងណាមិញ ទាំង​អតិថិជន និង​អ្នកស៊ីឈ្នួលឱប ​ត្រូវ​គោរព​តាម​បទប្បញ្ញត្តិ​នៃ​កិច្ចសន្យាដែលបានចែង ​ហាមលើស​ពី​ការ​កំណត់ ពុំនោះនឹងកើតបញ្ហាជាមួយគ្នា។

២. ស៊ីឈ្នួលយំ

នៅពេលប្រិយមិត្តឮអំពីអាជីពនេះលើកដំបូង ប្រិយមិត្តប្រហែលជាមានអារម្មណ៍អស់សំណើចបន្តិច តើហេតុអ្វីបានជាត្រូវចំណាយលុយដើម្បីធ្វើឱ្យអ្នកដទៃយំទៅវិញ? ទោះមុខរបរនេះហាក់ចម្លែក ប៉ុន្តែវាបានកើតឡើងនៅក្នុងប្រទេសចិន និងឥណ្ឌារួចមកហើយ។ ជាទូទៅ ពេលម្ចាស់ដើមបុណ្យចង់រៀបចំពិធីបុណ្យសពដ៏ធំ ប៉ុន្តែមិនសូវមានសាច់ញាតិ ពួកគេនឹងជួលមនុស្សមកកាន់ទុក្ខ និងក្លែងធ្វើជាយំឱ្យអឺងកងពេញរោងបុណ្យ។

ការងារនេះអាចប្រាក់ចំណូលខ្ពស់គួរសម ដែលតម្លៃប៉ាន់ស្មានមានប្រហែល ២៥,០០០ដុល្លារ ក្នុងមួយឆ្នាំ ប៉ុន្តែមិនមែនគ្រប់គ្នាអាចធ្វើការងារនេះប្រកបដោយវិជ្ជាជីវៈនោះទេ ព្រោះអ្នកខ្លះសម្ដែងកើតទុក្ខមិនបានល្អ ក៏ពុំមានគេជួលដែរ។ ​

៣. ស៊ីឈ្នួលធ្វើជនទីបី

ប្រិយមិត្តប្រហែលជាធ្លាប់តែឮថា ស្នេហាមានអ្នកទី៣ជ្រៀតជ្រែក ទើបទំនាក់ទំនងបែកបាក់ តែនៅប្រទេសប្រេស៊ីល ជនទី៣ ដែលជ្រែកក្នុងជីវិតគូខ្លះ គឺត្រូវបានសាមីខ្លួនម្ខាងទៀត ជួលមកសម្ដែងប៉ុណ្ណោះ។

នៅប្រេស៊ីល អតិថិជនដែលជួលសេវាកម្មចម្លែកនេះ ជាធម្មតាជាសាមីខ្លួនខាងស្រីដែលនាងមានបំណងចង់ឱ្យស្រីស្អាតម្នាក់ចូលទៅចែចង់មិត្តប្រុសរបស់ពួកនាង ដើម្បីសាកល្បងភាពស្មោះត្រង់របស់គាត់។

អ្នកដែលទទួលធ្វើការងារនេះនឹងមានភារកិច្ចប្រមូលភស្តុតាងនៃការផិតក្បត់ផ្ញើទៅអតិថិជន ដោយចំណូលមិនមានស្ថិរភាពទេ អាស្រ័យលើទឹកចិត្តរបស់អតិថិជន ប៉ុន្តែចំណូលជាមធ្យមអាចទទួលបានពី ៨០០-១,០០០ដុល្លារ។

៤. អ្នកថែទាំទីបញ្ចុះសព

នៅក្នុងប្រទេសចិន ​ការងារជាអ្នកថែទាំទីបញ្ចុះសព ហាក់មិនសូវពេញនិយមពិតមែន ប៉ុន្តែចំណូលដែលទទួលបានក៏គួរសមដែរ ​ដែលក្នុងមួយខែ កូនឈ្នួលអាចរកបានជាង ៥០០ដុល្លារ។ ជាទូទៅម៉ោងធ្វើការ​ចាប់ផ្ដើមពី​ម៉ោង ៨:៣០ ព្រឹក ដល់​ម៉ោង ៥:០០ ល្ងាច ប៉ុន្តែគ្មានថ្ងៃសម្រាកចុងសប្ដាហ៍ ឬបុណ្យទានឡើយ។ ទោះជាយ៉ាងណា មិនមែនគ្រប់គ្នាសុទ្ធតែអាចក្លាយជាអ្នកថែទាំទីបញ្ចុះសពបានទេ ព្រោះអ្នកប្រកបរបរនេះ ត្រូវចេះប្រើកុំព្យូទ័រស្ទាត់ និងមានសញ្ញាប័ត្រផ្នែកគ្រប់គ្រងពិធីបុណ្យសពទំនើប ទើបអាចធ្វើការនេះបាន៕

ប្រែសម្រួល៖ សន្យា

ចុចអាន៖ ប្រពៃណីចម្លែក! គាស់សាកសពមករាំដង្ហែ ដើម្បីអបអរដល់អ្នកស្លាប់

ចុចអាន៖ កុលសម្ព័ន្ធព្រៃអាម៉ាហ្សូន បរិភោគធាតុអ្នកស្លាប់ ដោយសារជំនឿម្យ៉ាង