បុណ្យ Famadihana ជាប្រពៃណីទំនៀមទម្លាប់របស់ប្រជាជន ម៉ាដាហ្គាស្កា (Madagascar) អស់ពេលជាង ៣០០ឆ្នាំមកហើយ ដោយអ្នកស្រុកតែងតែគាស់សាកសពមករាំបង្ហែ ដើម្បីអបអរសាទរដល់អ្នកស្លាប់។

ខណៈប្រពៃណីជាច្រើននៅលើលោក តែងតែកាន់ទុក្ខចំពោះការស្លាប់របស់មនុស្សជាទីស្រឡាញ់ កុលសម្ព័ន្ធជនជាតិភាគតិច Merina នៃប្រទេសម៉ាដាហ្គាស្ការ មិនកាន់ទុក្ខនោះទេ តែបែរជានាំគ្នាគាស់ផ្នូរយកសពមករាំព័ទ្ធជុំវិញ ដើម្បីធ្វើពិធីអបអរសាទរ និងរំលឹកដល់អ្នកស្លាប់ទៅវិញ។

បុណ្យ Famadihana ឬ “Turning of the Bones” គឺជាប្រពៃណីបុណ្យសពដែលត្រូវបានប្រារព្ធរៀងរាល់ ៧ឆ្នាំម្តង។ វាចាប់កំណើតតាំងពីសតវត្សទី ១៧ មកម្ល៉េះ។ នៅថ្ងៃបុណ្យមកដល់ ប្រជាជន​បើក​ផ្នូរដូនតា និងញាតិការដែលចែកឋានទៅ យកសាកសព ​ឆ្អឹង ឬ​អដ្ឋិធាតុ មក​រុំ​ក្នុង​ក្រណាត់​ថ្មី ហើយសរសេរឈ្មោះអ្នកស្លាប់ បន្ទាប់មកសាច់ញាតិដែលនៅរស់ត្រូវរាំបង្ហែសាកសព នៅជុំវិញផ្នូរ។ ក្រោយពេលដង្ហែ សពឬឆ្អឹងត្រូវរុំដោយក្រណាត់ស្អាតឱ្យជិតល្អ នៅមុនពេលថ្ងៃលិច ដើម្បីជៀសវាងការប៉ះពាល់នឹងថាមពលអាក្រក់ណាមួយ រួចហើយដាក់ចូលទៅក្នុងផ្នូរវិញ។ ជាមួយគ្នានោះ គេត្រូវកប់អាហារ សម្លៀកបំពាក់ ប្រាក់ ឬទ្រព្យសម្បត្តិនានា ដើម្បីបញ្ជូនឱ្យស្លាប់យកទៅប្រើនៅឋានបរលោក។

ពិធីបុណ្យនេះធ្វើឡើង ដើម្បីអបអរដល់អ្នកស្លាប់ដែលបានចាកផុតទុក្ខ ហើយអាចទៅរស់នៅក្នុងឋានស្ងប់សុខ។ មិនតែប៉ុណ្ណោះការគាស់ឆ្អឹងចេញមក សរសេរឈ្មោះលើក្រណាត់ ​គឺដើម្បីជាការរំលឹក ទុកជាការ​ចងចាំសម្រាប់កូនចៅ។ ប្រជាជនកុលសម្ព័ន្ធ ជឿដែរថា ការប្រារព្ធពិធីនេះ ប្រៀបបីដូចកំពុងបួងសួងសុំឱ្យអ្នកស្លាប់បញ្ជូនសាររបស់ពួកគេទៅកាន់ព្រះ ព្រោះអ្នកស្លាប់គឺជាអន្តរការីរវាងមនុស្ស និងព្រះ។ ក្រៅពីនោះ ការប្រារព្ធពិធីនេះ ក៏ជាឱកាសសម្រាប់ក្រុមគ្រួសារ ឬសាច់ញាតិជិតឆ្ងាយមកជួបជុំគ្នាផងដែរ៕

ប្រែសម្រួល៖ សន្យា

ចុចអាន៖ បច្ចេកទេស​ចម្លែក​ ​រក្សា​ផ្លែឈើ​ក្នុង​ដី​ឥដ្ឋ អាចទុកហូបបានរហូត​មួយ​ឆ្នាំ