មកដឹងកាន់តែច្បាស់ពីមុនកណ្ដាលចិញ្ចើម និងវិធីកម្ចាត់

ការកើតមុនជាបញ្ហាស្បែកទូទៅដែលអាចលេចឡើងនៅគ្រប់ទីកន្លែងនៃស្បែកមិនថាខ្លួនឬមុខឡើយ ។ ចំណែកមុនកណ្ដាលចិញ្ចើម មានច្រើនប្រភេទដែលបណ្ដាលមកពីមូលហេតុទាំង ៣ យ៉ាងខាងក្រោមនេះ ៖

១. ស្ទះរន្ធរោម

មុនភាគច្រើនដែលកើតនៅតំបន់ T-zone (ថ្ងាស ច្រមុះ ចង្កា) បណ្ដាលមកពីស្ទះរន្ធរោមជាចម្បង ហើយមុនទាំងនោះមានបីប្រភេទគឺមុនកន្ទួលក្រហម, មុនខ្ទុះ, និងមុនដុំពក ។ មូលហេតុស្ទះរន្ធរោមមានដូចជា ស្បែកខ្លាញ់ពីធម្មជាតិ បរិស្ថានជុំវិញ គ្រឿងសម្អាង និងរបបអាហារ ពេលខ្លះកាវបករោមចិញ្ចើមក៏អាចបង្កមុនដូចគ្នា ។ 

ដំណោះស្រាយ : សម្អាតស្បែកមុខឲ្យបានស្អាត និងបករោមចិញ្ចើមដោយវិធីធម្មជាតិ (ក្រូចឆ្មារ ទឹក និងស្ករស) ទើបមិនមានបញ្ហាលើស្បែក ។

២. របបអាហារ

រាងកាយមិនប្រក្រតីនឹងផ្ដល់ជាសញ្ញាឲ្យអ្នកដឹងដូចជាមិនស្រួលខ្លួន មានមុនលើស្បែក កន្ទួលរមាស់ ឬរបកស្បែកជាដើម ។ កត្តាសំខាន់បំផុតដែលអ្នកអាចធ្វើបានសម្រាប់សុខភាពគឺរបបអាហារ អាហារផ្អាប់ អាហារខ្វះជីវជាតិសុទ្ធតែបង្កបញ្ហាសុខភាពទាំងអស់ ជាពិសេសរបស់ផ្អែមខ្លាំងធ្វើឲ្យមានមុននិងរីករន្ធរោម ។

ដំណោះស្រាយ : ត្រូវបរិភោគអាហារមានផ្ទុកអាស៊ីតខ្លាញ់អូមេហ្គាបីឲ្យបានគ្រប់គ្រាន់ព្រោះវាជួយទ្រទ្រង់សុខភាពស្បែកល្អបំផុត ។

៣. តំណពូជ

មុនដែលកើតនៅកណ្ដាលចិញ្ចើមភាគច្រើនមកពីខ្លាញ់លើមុខ យោងតាង Healthline ស្បែកមុខខ្លាញ់គឺបានមកពីតំណពូជបូករួមជាមួយការថែរក្សាស្បែកមុខមិនត្រឹមត្រូវ ។

ដំណោះស្រាយ : អ្នកគប្បីពិភាក្សាជាមួយគ្រូពេទ្យជំនាញដើម្បីដឹងពីផលិតផលដែលគួរប្រើឲ្យកាន់តែច្បាស់ និងមានប្រសិទ្ធភាព ។

ចំណុចគួរជៀសវាងធ្វើទៅលើមុនមានដូចជា ញេចដោយគ្មានអនាម័យ កេះលេង ប្រើផលិតផលតាមគេ យកថ្នាំដុសធ្មេញមកបន្តក់ និងលាងមុខមិនស្អាត ៕

ប្រែសម្រួល ៖ វារី

ចុចអាន ៖ មកដឹងពីផលអាក្រក់ពីការបកមុន ៥ ចំណុច