ផ្ដើមពីអ្នកកាត់សក់ប្រាក់ខែ ៥០ ដុល្លារ JB ក្លាយជាជាងដែលមហាសេដ្ឋីដណ្ដើមចង់បាន

JB ឬមានឈ្មោះពិតថា Jamiel Bustos គឺជាជាងកាត់សក់ និងបុគ្គលិកលក្ខណៈប្រព័ន្ធផ្សព្វផ្សាយសង្គមដ៏លេចធ្លោមួយរូបនៅក្នុងប្រទេសកាណាដា ដែលគេស្គាល់ជាចម្បងនៅក្នុងការបង្ហោះវីដេអូពាក់ព័ន្ធនឹងមាតិកាកាត់សក់ និងរបៀបរស់នៅនៅលើគណនី TikTok ផ្ទាល់ខ្លួនដែលមានឈ្មោះថា jbalwaysfresh ដោយសារតែភាពល្បីល្បាញនៃគណនី​ គាត់ប្រមូលអ្នកតាមដានជាង ៨ លាននាក់ និងជាង ១៤៧ លានចូលចិត្តនៅលើវេទិកាមួយនេះ។

យ៉ាងណា រឿងរ៉ាវរបស់ជាងកាត់សក់ជនជាតិហ្វីលីពីនរូបនេះបានក្លាយជាចំណាប់អារម្មណ៍របស់ក្រុមមហាសេដ្ឋីប្រាក់លាននៅទូទាំងពិភពលោក។ ជាពិសេស ក្មេងជំទង់​បានទាក់ទាញការចាប់អារម្មណ៍ដល់អ្នកផ្សេងទៀតដោយសារតែភាពប៉ិនប្រសប់ កំប្លែងរបស់ខ្លួន តាមរយៈវីដេអូនៅក្នុងជំនាញកាត់សក់ឲ្យអ្នកមានៗជាច្រើន។

មិនត្រឹមប៉ុណ្ណឹងទេ តាមរយៈវីដេអឃ្លិបមួយទៀតដែល ​JB​ បានមកដល់ប្រទេសកម្ពុជាកាត់សក់ឲ្យកូនសេដ្ឋីហនុមាន នាប៉ុន្មានថ្ងៃមុន បានកក្រើកពេញបណ្ដាញអ៉ិនធើណេត ជាពិសេស TikTok ដោយរូបលោកទទួលបានប្រាក់៣ម៉ឺនដុល្លារគ្រាន់តែកាត់សក់ប៉ុណ្ណោះ។

តើអ្វីដែលប្រែក្លាយ​ JB ​ពីក្មេងធម្មតាម្នាក់ មកជាជាងកាតសក់ល្បីល្បាញសល់លុយវាល់លានបែបនេះ?

មុនពេលទទួលបានកិត្តិនាមល្បីល្បាញដូចសព្វថ្ងៃ JB​​ ពីមុនត្រឹមជាជាងធម្មតាម្នាក់ ដែលមានជំនាញកាត់សក់នៅពេលមានអាយុ ១៤ ឆ្នាំ ក្នុងឆ្នាំ ២០១៧ ។ ដោយសារតែនិស្ស័យចូលចិត្ត ទើបរូបគេចង់ផ្តល់វាដល់អ្នកដទៃដោយផ្តើមសួរមិត្តភក្តិនៅសាលាថាមានអ្នកណាស័គ្រ្មចិត្តធ្វើជាភ្ញៀវដល់គេបានទេ។ ប៉ុន្តែគ្មានមិត្តម្នាក់ណា​ទុកចិត្តជាមួយនឹងកន្ត្រៃទេ ទើបគេសម្រេចចិត្តកាត់សក់ដោយខ្លួនឯងវិញ។ រៀងរាល់ពីរបីសប្តាហ៍ម្តង JB តែងតែបង្ហាញមុខទៅសាលាជាមួយនឹងការកាត់សក់ចម្លែក ឬមើលទៅគួរឲ្យខ្លាច ហើយក្មេងៗផ្សេងទៀតបានសើចចំអកឲ្យគេ។ នៅ​ចុង​ឆ្នាំ​ដដែល មិត្ត​ម្នាក់​បានឲ្យ ​JB សាកល្បងកាត់សក់ឲ្យ​គាត់ ដោយសារឃើញប្លែកហើយស្អាតជាងមុន ទើបហើយមិត្តរួមថ្នាក់ពីរបីនាក់ទៀតក៏បានឲ្យគេកាត់ដូចគ្នា។

ក្រោយមក នៅអាយុ ១៥ ឆ្នាំ JB ត្រូវបានគេជួលឲ្យធ្វើជាកូនជាងនៅហាងកាត់សក់តាមចិញ្ចើមផ្លូវមួយ ក្បែរកន្លែងធ្វើការឪពុកម្តាយ។ ធ្វើការលើកដំបូងលោកបានត្រឹមតែជាបោសសម្អាតកម្រាលឥដ្ឋ​​ ដោយទទួលបានប្រាក់ប្រហែល ៥០ ដុល្លារ​ក្នុង​មួយខែ។ ប៉ុន្តែលោកបានលួចរៀនល្បិចពីជាងកាត់សក់ចាស់ៗ ដូចជារបៀបចម្លងការកាត់ដ៏ពេញនិយមជាដើម។ ​ក្ដីសង្ឃឹមរបស់​ JB គឺមកទីនេះមិនមែនធ្វើ​ដើម្បី​លុយ​ទេ តែគេមាន​ចិត្ត​ចង់​កាត់សក់ ហើយ​តាំង​ចិត្ត​រៀន​អ្វី​ដែល​ខ្លួនអាច​ធ្វើ​បាន។

ពីរឆ្នាំក្រោយមក នៅពេលដែល JB រៀនថ្នាក់ទី១១ កូវីដ-១៩បានវាយប្រហារ ហាងបានបិទទ្វារ ទើបរូបគេឈប់ទៅកាត់សក់មួយរយៈ។​ យ៉ាងណា JB នៅតែព្យាយាមរកវិធីប្រើប្រាស់ស្ថានភាពដ៏លំបាកនេះ ដើម្បីជាប្រយោជន៍ដល់ខ្លួនគេ។ ប៉ុន្មានខែនៃការរាតត្បាត ទើបលោកបានដឹងថា TikTok គឺជាកន្លែងមួយដែលអាចបង្ហាញមុខឲ្យគេស្គាល់។ នៅខែកក្កដាឆ្នាំ ២០២០ លោកបានបង្កើតគណនីផ្ទាល់ខ្លួន ហើយចាប់ផ្តើមបង្ហោះជារៀងរាល់សប្តាហ៍។ នាពេលនោះលោកបានបង្ហោះរឿងកំប្លែងអំពីការកាត់សក់ចៅហ្វាយពេលគាត់កំពុងដេកលក់ និងរាំលើកៅអីរបស់ជាងកាត់សក់។ ភ្លាមៗ គណនីស្រាប់តែមានការកើនឡើងជាលំដាប់នៅខែធ្នូ រហូតឈានដល់ ៣០ម៉ឺនអ្នកតាមដាន ហើយចាប់​ផ្ដើម​ទទួល​បាន​សារ​ជា​ច្រើន​ពី​អ្នក​ដែល​ចង់​ឲ្យ​គេកាត់​សក់។

ភ្ញៀវដំបូង​គេបង្អស់គឺមិត្តភក្តិ JB បានណែនាំឲ្យស្គាល់ ដែលជាមេធាវីអចលនទ្រព្យរស់ក្នុងវិមានដ៏ធំនៅតូរ៉ុនតូ ហើយគេបានថតវីដេអូរបស់ JB ដើរលើផ្លូវក្រាលថ្មដែលមានរថយន្ត Teslas ចតចោលរាប់រយគ្រឿង។ មិនខុសពីវីដេអូមុនទេ ភ្ញៀវជាសេដ្ធីនោះធ្វើជាដេកលក់ហើយ JB បានមកដាស់គាត់ឲ្យក្រោកឡើង ដោយរូបគេបានដាក់ចំណងជើងវីដេអូថា កាត់សក់អតិថិជនអ្នកមានរបស់ខ្ញុំ។ ឃ្លិបនោះ​ទទួលបានអ្នកទស្សនាជាង ១០លាននៅលើ TikTok ហើយតាមរយៈវីដេអូនោះ ការតាមដានស្រាប់តែបានកើនឡើងដល់មួយលាននៅចុងឆ្នាំ ២០២០។

ចាប់តាំងពីពេលនោះមក JB ត្រូវបានគេទទួលស្គាល់យ៉ាងទូលំទួលាយដោយសារតែចំណងជើង កាត់សក់មហាសេដ្ឋី​ ឬ Cutting a Million ។ ក្រោយៗមកទៀត JB បានទាក់ទងទៅសហគ្រិន តារាល្បីៗ និងមហាសេដ្ឋី ហើយបានស្នើការកាត់សក់របស់ពួកគេជាថ្នូរនឹងការធ្វើវីដេអូ TikTok ។ វាជាឥទ្ធិពលជាមួយនឹងតារាល្បីៗដែលលោកបានបង្ហាញ ហើយក៏កាន់តែងាយស្រួលក្នុងការស្វែងរកភ្ញៀវបន្ទាប់ទៀតដែរ។ ក្នុងរយៈពេលពីរឆ្នាំកន្លះចុងក្រោយនេះ JB បានកាត់សក់ឲ្យ Youtubers ដ៏ល្បីដូចជា Dobre Brothers និង Coby Persin តារាសម្តែងឥណ្ឌា Sonu Sood និងបុគ្គលិកអ៊ីនធឺណិតរបស់ Rashed Belhasa រហូតមាន​វីដេអូ​ជិត ៣០០ នៅ​លើ​គណនី​ រួម​ទាំង​ឈុត​នៃ​ការ​ធ្វើ​ដំណើរផ្ទាល់ខ្លួន ដែលទទួលបានអ្នកតាមដាន TikTok ចំនួន ៦.៧ លាននាក់ឯណោះ។

យ៉ាងណាមិញ មកទល់សព្វថ្ងៃនេះ JB ទទួលបានប្រាក់ចំណូលរាល់លានដុល្លារជារៀងរាល់ឆ្នាំ ពីបណ្តាញប្រព័ន្ធផ្សព្វផ្សាយសង្គម និងការកាត់សក់ឲ្យអ្នកមានៗជាច្រើនដែលគេអាចព្យាករណ៍ថា​ លោកមានទ្រព្យសម្បត្តិចាប់១០ម៉ឺនដុល្លារ ទៅ១លានដុល្លារ ក្នុងវ័យ២០ឆ្នាំ។​ ជាពិសេស គេបានបណ្តាក់ទុនយ៉ាងច្រើនចូលទៅក្នុងអាជីពផ្ទាល់ខ្លួន​ ដោយធ្វើដំណើរទៅកាត់សក់នៅ ទីក្រុងឌូបៃ, ឡូសអេនជឺលេស, វ៉ាន់ខូវើរ និងញូវយ៉ក ដើម្បីជួបតារាល្បីៗដើម្បីប្រមូលខ្លឹមសារនានាយកមកបង្ហោះលើគណនីផ្ទាល់ខ្លួន៕

អត្ថបទ៖ សាង ស្រីល័ក្ខ