ព័ត៌មានជាតិ

កម្ពុជា ប្ដេជ្ញាចិត្តចំពោះកិច្ចខិតខំប្រឹងប្រែងប្រឆាំងសារធាតុហាមឃាត់ ដើម្បីលើកតម្កើង និងការពារគុណតម្លៃ ក្នុងវិស័យកីឡា

បានផុស

៩ ខែ មុន

នៅ

ថ្ងៃអង្គារ ២១ តុលា ២០២៥

ដោយ

លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាប្រធានក្រុមប្រឹក្សាទីភ្នាក់ងារកម្ពុជាប្រឆាំងដូប៉ា(ទ.ក.ប.ដ) បានលើកឡើងថា ប្រទេសកម្ពុជាបានប្ដេជ្ញាចិត្តចំពោះកិច្ចខិតខំប្រឹងប្រែងប្រឆាំងសារធាតុហាមឃាត់ក្នុងវិស័យកីឡា ដើម្បីលើកតម្កើងការពារគុណតម្លៃ សីលធម៌ និងសុចរិតភាព ក្នុងវិស័យកីឡា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្ដេជ្ញារបស់លោកបណ្ឌិតសភាចារ្យ ហង់ជួន ណារ៉ុន នេះ បានធ្វើឡើងនៅព្រឹកថ្ងៃទី ២១ ខែតុលា ឆ្នាំ ២០២៥ ក្នុងសន្និសីទលើកទី ១០ និងខួបលើកទី ២០ នៃអនុសញ្ញាអន្តរជាតិប្រឆាំងដូប៉ា នៅទីក្រុងប៉ារីស ប្រទេសបារាំង ដោយមានការចូលរួមពីសំណាក់រដ្ឋភាគីដែលមកពី អឺរ៉ុប និងអាស៊ី ចំនួន ៦០ ប្រទេស។

លោកបណ្ឌិតសភាចារ្យ ឧបនាយករដ្ឋមន្ត្រី បានបន្តថា «ខ្លឹមសារពិតរបស់កីឡាមិនគួរត្រូវបានកំណត់ត្រឹមតែការបំបែកកំណត់ត្រា និងការឈ្នះមេដាយនោះទេ ប៉ុន្តែត្រូវកំណត់ដោយការលើកតម្កើងគោលការណ៍ និងតម្លៃពិតប្រាកដ នៃការខិតខំប្រឹងប្រែងតស៊ូជម្នះ។ គោលការណ៍ នៃសុចរិតភាព សុខភាព និងយុត្តិធម៌ គួរតែត្រូវបានបង្កប់នៅក្នុងរចនាសម្ព័ន្ធកីឡានៅទូទាំងពិភពលោក ក្នុងន័យនេះ លក្ខន្តិកៈ WADA ថ្មី គឺជាការបង្ហាញនូវការប្ដេជ្ញាចិត្តរួមរបស់យើងទាំងអស់គ្នា ដើម្បីធានាការគោរពនូវគោលការណ៍ និងគុណតម្លៃទាំងនេះ»។

បន្ថែមពីនេះ លោកបណ្ឌិតសភាចារ្យ ឧបនាយករដ្ឋមន្ត្រី បានឱ្យដឹងថា ចាប់តាំងពីការផ្តល់សច្ចាប័នលើអនុសញ្ញានេះនៅឆ្នាំ ២០០៧ មក រាជរដ្ឋាភិបាលកម្ពុជា បានចាត់វិធានការនានា ដើម្បីពង្រឹងស្ថាប័នជាតិប្រឆាំងសារធាតុហាមឃាត់ (CADA) បង្កើតក្របខ័ណ្ឌបទប្បញ្ញត្តិ លើកកម្ពស់ការយល់ដឹង និងអប់រំគ្រប់ភាគីពាក់ព័ន្ធទាំងអស់ អំពីគ្រោះថ្នាក់ នៃការប្រើសារធាតុហាមឃាត់។

លោកបណ្ឌិតសភាចារ្យ ឧបនាយករដ្ឋមន្ត្រី បានបន្ថែមទៀតថា កម្ពុជា គាំទ្រយ៉ាងខ្លាំងចំពោះអនុសញ្ញារបស់អង្គការយូណេស្កូ (UNESCO) លក្ខន្តិកៈ WADA និងស្តង់ដារអន្តរជាតិ ហើយប្ដេជ្ញាចិត្តបង្កើតវេទិកាអនុលោមភាពជាតិ ស្របតាមប្រព័ន្ធអេកូឡូស៊ី សុចរិតភាព។ វេទិកានេះ ត្រូវបានដឹកនាំដោយ លោកបណ្ឌិតសភាចារ្យ ឧបនាយករដ្ឋមន្ត្រី ដោយផ្ទាល់ ក្នុងនាមជារដ្ឋមន្ត្រីក្រសួងអប់រំ យុវជន និងកីឡា និងរួមបញ្ចូលភាគីពាក់ព័ន្ធសំខាន់ៗ ទាំងអស់ ជាពិសេសគណៈកម្មាធិការជាតិអូឡាំពិក និងសហព័ន្ធកីឡាជាតិ។

លោកបណ្ឌិតសភាចារ្យ ឧបនាយករដ្ឋមន្ត្រី បានបន្តទៀតថា «ក្នុងនាមជាប្រទេសភាគី កម្ពុជា សូមគាំទ្រលើលក្ខន្តិកៈ WADA ឆ្នាំ ២០២៧ ដែលត្រូវបានកែសម្រួល ក៏ដូចជាយន្តការដែលបានស្នើឡើងថ្មី នៃប្រព័ន្ធអេកូឡូស៊ីសុចរិតភាពកីឡាសកល និងប្ដេជ្ញាចិត្តយ៉ាងមុតមាំចំពោះកិច្ចខិតខំប្រឹងប្រែងប្រឆាំងសារធាតុហាមឃាត់ ដូចដែលបានណែនាំដោយស្ថាប័នប្រឆាំងសារធាតុហាមឃាត់ពាក់ព័ន្ធ ដោយខិតខំឆ្ពោះទៅរកការប្រកួតកីឡាស្អាតស្អំ និងលេងដោយស្មោះត្រង់ និងសូមថ្លែងអំណរគុណដល់អង្គការ SEARADO, WADA និងទីភ្នាក់ងារតេស្តអន្តរជាតិ (ITA) ចំពោះការគាំទ្រប្រកបដោយការយកចិត្តទុកដាក់ក្នុងការកសាងសមត្ថភាព និងពង្រឹងស្ថាប័នជាតិ CADA របស់កម្ពុជា ដើម្បីបំពេញកាតព្វកិច្ចអនុលោមតាមស្តង់ដារអន្តរជាតិ»៕

អត្ថបទ ៖ សំអឿន