ស្រុក​មុខកំពូល​ បញ្ចប់​ការ​ចុះវាស់វែងដីធ្លីជាប្រព័ន្ធ ក្នុង​ចំណោម​ឃុំទាំង ៧ ទូទាំង​ស្រុក​

អាជ្ញាធរខេត្តកណ្ដាល និងមន្ទីរជំនាញ ចែកប័ណ្ណកម្មសិទ្ធិដីធ្លី ឬវិញ្ញាបនបត្រសម្គាល់ម្ចាស់អចលនវត្ថុចំនួន ៨,៥៥១ ប័ណ្ណ ដល់ប្រជាពលរដ្ឋចំនួន ៦ ភូមិ រួមមាន ៖ ភូមិឈើទាល ក្នុងឃុំព្រែកអញ្ចាញ ភូមិឈើទាលភ្លោះ ភូមិក្រងស្វាយ ភូមិស្វាយអំពារ ភូមិថ្មី ក្នុងឃុំស្វាយអំពារ និងភូមិសាមគ្គី ក្នុងឃុំព្រែកដំបង ស្រុកមុខកំពូល។ 

ពិធីចែកប័ណ្ណកម្មសិទ្ធិដីធ្លីនេះ ធ្វើឡើងក្រោមអធិបតីភាព លោក ចយ សុបិន សមាជិកក្រុមប្រឹក្សាខេត្ត និងលោក តាំង ម៉េងលាន អភិបាលរងខេត្តកណ្ដាល ដោយមានការអញ្ជើញចូលរួមពីសំណាក់អាជ្ញាធរស្រុកមុខកំពូល មន្ទីរជុំវិញខេត្ត និងប្រជាពលរដ្ឋជាច្រើនរូប។

ក្នុងពិធីនេះ លោក តាំង ម៉េងលាន មានប្រសាសន៍ថា ការចែកប័ណ្ណកម្មសិទ្ធិដីធ្លីជូនប្រជាពលរដ្ឋនាពេលនេះ គឺជាការរួមចំណែកយ៉ាងសំខាន់ក្នុងការដោះស្រាយបញ្ហាទំនាស់ដីធ្លី និងជាការផ្ដល់ឱ្យប្រជាពលរដ្ឋមានសិទ្ធិកាន់កាប់ដីធ្លីរបស់ខ្លួនបានត្រឹមត្រូវស្របតាមច្បាប់។

លោក តាំង ម៉េងលាន បានបន្តថា ការទទួលបានប័ណ្ណកម្មសិទ្ធិប្រើប្រាស់ស្របច្បាប់របស់ប្រជាពលរដ្ឋនៅពេលនេះ បានស្ដែងចេញឱ្យឃើញពីការគិតគូរយ៉ាងហ្មត់ចត់របស់រាជរដ្ឋាភិបាល ដែលមាន សម្តេចធិបតី ហ៊ុន ម៉ាណែត ជានាយករដ្ឋមន្រ្តី នៃព្រះរាជាណាចក្រកម្ពុជា ដែលបាននិងកំពុងអនុវត្តយ៉ាងសកម្មលើគោលនយោបាយដីធ្លីជូនដល់ពលរដ្ឋ និងដើម្បីផលប្រយោជន៍របស់ពលរដ្ឋយ៉ាងពិតប្រាកដ។

លោកអភិបាលរង បានផ្ដាំផ្ញើដល់ប្រជាពលរដ្ឋ នៅពេលទទួលបានត្រូវគិតគូរទុកដាក់ថែរក្សាឱ្យបានល្អ ពីព្រោះប័ណ្ណកម្មសិទ្ធដីធ្លី គឺពិតជាមានសារៈសំខាន់ និងមានតម្លៃណាស់ ក្នុងការសម្គាល់សិទ្ធិកាន់កាប់ ការទិញលក់ បញ្ចាំ ដីធ្លីរបស់ខ្លួនស្របតាមច្បាប់ ពិសេសដីមានប័ណ្ណកម្មសិទ្ធិត្រឹមត្រូវគឺបញ្ជាក់បានថា ដីមានសុវត្ថិភាព ទទួលស្គាល់ដោយអាជ្ញាធរ ជៀសផុតពីការរំលោភបំពាន និងកាត់បន្ថយជម្លោះ ហើយថែមទាំងងាយស្រួលក្នុងការទិញលក់ផងដែរ។

លោក យី យ៉េន អភិបាលស្រុកមុខកំពូល បានគូសបញ្ជាក់ថា តាមការចង្អុលបង្ហាញ និងណែនាំដោយផ្ទាល់ពី លោក គួច ចំរើន អភិបាល នៃគណៈអភិបាលខេត្តកណ្តាល លទ្ធផល នៃការងារចុះបញ្ជីដីធ្លីជាលក្ខណៈប្រព័ន្ធ សម្រាប់ស្រុកមុខកំពូល ដែលមានចំនួន ៧ ឃុំ ស្មើនឹង ៣៩ ភូមិ បានបញ្ចប់ការវាស់វែងទាំងស្រុង ស្មើនឹង ១០០% និងបានចុះបញ្ជីចប់ចំនួន ៥ ឃុំ សរុប ៣១ ភូមិ សម្រេចចេញប័ណ្ណចំនួន ៣១ ភូមិ ស្មើនឹង ២១,៧៣០ ក្បាលដី និងចែកប័ណ្ណបានចំនួន ១៣,៧៣១ ក្បាលដី។ ដោយឡែក ក្នុងពិធីចែកប័ណ្ណកម្មសិទ្ធិជូនប្រជាពលរដ្ឋនៅថ្ងៃនេះ សរុបចំនួន ៦ ភូមិ ស្មើនឹងចំនួន ៨,៥៥១ ប័ណ្ណ៕

ដោយ ៖ ម៉េង