ព័ត៌មានជាតិ

មេឃុំតាតោកជាប់ព្រំដែនថៃ ស្នើសាងសង់ផ្លូវមួយខ្សែភ្ជាប់ទៅផ្លូវជាតិលេខ ១០ ដើម្បីសម្រួលធ្វើដំណើររបស់ពលរដ្ឋ

បានផុស

៨ ខែ មុន

នៅ

ថ្ងៃអង្គារ ១១ វិច្ឆិកា ២០២៥

ដោយ

មេឃុំតាតោក ស្រុកសំឡូត ខេត្តបាត់ដំបង បានស្នើសាងសង់ផ្លូវមួយខ្សែតភ្ជាប់ពីឃុំតាតោកទៅដល់ផ្លូវជាតិលេខ ១០ ដើម្បីសម្រួលដល់ការធ្វើដំណើររបស់ពលរដ្ឋក្នុងមូលដ្ឋាន។

មេឃុំតាតោក លោក អ៊ុំ ខែម បានប្រាប់កម្ពុជាថ្មីថា ខណៈដែលផ្លូវបេតុងមួយខ្សែប្រវែងជាង ៥ គីឡូម៉ែត្របានស្ថាបនារួចរាល់ លោកស្នើឲ្យមានការសាងសង់បន្តផ្លូវដែលនៅសល់ប្រវែងជាង ៨ គីឡូម៉ែត្រភ្ជាប់ទៅដល់ផ្លូវជាតិលេខ ១០ ដើម្បីសម្រូលដល់ការធ្វើដំណើរ និងបម្រើផលប្រយោជន៍ពលរដ្ឋនៅក្នុងតំបន់ព្រៃភ្នំដាច់ស្រយាលនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមលោកមេឃុំ ផ្លូវដែលនៅសល់ជាផ្លូវដី ហើយខែវស្សាតែងតែរងការជន់លិចដែលបង្កការពិបាកសម្រាប់ពលរដ្ឋធ្វើដំណើរ។

ឃុំតាតោកជាតំបន់ព្រៃភ្នំជាប់ព្រំដែនថៃ មានចម្ងាយប្រមាណ ២៥ គីឡូម៉ែត្រពីទីរួមស្រុកសំឡូត។ ភូមិសាស្ត្រតំបន់នេះមិនសូវមានផ្ទៃដីធ្វើស្រែច្រើននោះទេ ភាគច្រើនពលរដ្ឋរស់នៅពឹងអាស្រ័យលើការដាំដុះដំណាំកសិកម្មដូចជាពោត ដំឡូង សណ្តែក និងដំណាំឈើហូបផ្លែមួយចំនួន។

ឃុំតាតោកមានសរុបចំនួន ៩ ភូមិ និងមានពលរដ្ឋរស់នៅប្រមាណ ១ ០០០ គ្រួសារ បើរាប់ចំនួនមនុស្សមានប្រមាណ ៤ ០០០ នាក់៕