ការបញ្ជូនកូនទៅសាលារៀន គឺជាការសន្សំទ្រព្យទុកឱ្យកូនៗដ៏ប្រសើរបំផុតសម្រាប់អនាគត

ការបញ្ជូនកូនទៅសាលារៀន គឺជាការសន្សំទ្រព្យទុកឱ្យកូនៗ, ការសិក្សាគឺជាការរៀបចំបម្រុងទុកដ៏ប្រសើរបំផុតសម្រាប់អនាគត កុមារទាំងអស់មានសិទ្ធិចូលរៀនដោយសមធម៌។​ ពាក្យស្លោកទាំងនេះ ត្រូវបានចងនៅលើបដា និងព្យួរនៅតាមបរិវេណ សាលាបឋមសិក្សាទៀមលើ ក្នុងខេត្តរតនគិរី ជាថ្ងៃបើកបវេសនកាលនាថ្ងៃទី ១៤ ខែវិច្ឆិកា ឆ្នាំ ២០២៥​ ។

ពាក្យស្លោកទាំងនេះ ដើម្បីពញ្ញាក់ស្មារតីទៅកាន់មាតាបិតា អាណាព្យាបាលសិស្ស ត្រូវបញ្ជូនកូនៗរបស់ពួកគេទៅកាន់សាលារៀន ដើម្បីទទួលបានការបណ្តុះបណ្តាល និងអប់រំ សម្រាប់កសាងអនាគត។

ពិធីបើកបវេសនកាល រៀបចំឡើងនៅ សាលាបឋមសិក្សាទៀមលើ ស្ថិតនៅភូមិទៀមលើ ឃុំកាចូន ស្រុក វើនសៃ ដោយមានការចូលរួមពី អនុប្រធានអប់រំ ការិយាល័យ អប់រំនិងកីឡា ស្រុក មេឃុំកាចូន លោកគ្រូ អ្នកគ្រូ មកពីមត្តេយ្យសិក្សាភូមិ សាលាបឋមសិក្សា អនុវិទ្យាល័យ គណៈកម្មការសាលា និងម្ចាស់ជំនួយសរុបប្រមាណ ១០០ នាក់ ។

នាឱកាសនេះ លោក សុខ ឯម អនុប្រធានការិយាល័យអប់រំស្រុក បានផ្តាំផ្ញើទៅលោកគ្រូ អ្នកគ្រូ ត្រូវខិតខំបង្រៀនកូនសិស្សឱ្យបានល្អប្រសើរ ដើម្បីឱ្យពួកគេមានចំណេះជំនាញតាំងពីតូច និងជាទំពាំងស្នងឬស្សីសម្រាប់សង្គមជាតិ។ ទន្ទឹមនេះដែរ លោកអំពាវនាវដល់ មាតាបិតា ឬអាណាព្យាបាល ជួយណែនាំកូនៗរបស់ខ្លួនឱ្យមកសាលាដើម្បីទទួលបានការអ​ប់រំ។

លោក ខាំ កាប៊ីន មេឃុំកាចូន បានលើកទឹកចិត្តដល់សិស្សានុសិស្សទាំងអស់ឱ្យខិតខំប្រឹងប្រែងរៀនសូត្រដើម្បីអនាគតខ្លួនឯង ក្រុមគ្រួសារ និងសង្គមជាតិ។ លោកក៏បានជំរុញដល់មាតាបិតា អាណាព្យាបាលសិស្ស ត្រូវជួយបង្រៀនកូនៗ និងតាមដានការសិក្សារបស់ពួកគេ។ លោកបញ្ជាក់ថា៖« ចំណេះវិជ្ជាមានសារសំខាន់សម្រាប់កសាងអនាគត មានការងារធ្វើ ចៀសវាងឈប់រៀន ឬធ្វើជាក្មេងទំនើង នាំឱ្យខូចអនាគត»។បន្ថែមពីនេះ លោកក៏ផ្តាំផ្ញើដល់សិស្សានុសិស្សកុំបរិភោគ​ភេសជ្ជៈផ្អែមខ្លាំង ឬប៉ូវកម្លាំង ដែលនាំប៉ះពាល់ដល់សុខភាព និងកើតជម្ងឺផ្សេងៗ។

លោកបានរំលឹកថា បច្ចុប្បន្នពលរដ្ឋកម្ពុជារស់នៅក្រោមម្លប់សន្តិភាពគួរចាប់យកឱកាសសិក្សា ព្រោះមានសាលារៀននៅជិតផ្ទះ និងគ្រូបង្រៀន ចាំជួយតម្រង់ទិស ខណៈប្រៀបធៀបពីមុនវិញ មិនសូវមានសាលារៀន ហើយធ្វើដំណើរឆ្ងាយទម្រាំដល់សាលា។

ចំណែកលោក សូម ម៉ៅ នាយកសាលាបឋមសិក្សាទៀមលើ អះអាងថា នឹងបន្តអភិវឌ្ឍហេដ្ឋារចនាសម្ព័ន្ធសាលារៀន ដើម្បីឱ្យក្មេងៗជំនាន់ក្រោយទទួលបានការអប់រំខ្ពស់ក្លាយជាយុវជនគំរូ។ ទន្ទឹមនេះ លោកក៏មិនភ្លេចរំលឹកឱ្យសិស្សា​នុសិស្សខំប្រឹងតស៊ូរៀនត្រូវដោយខ្លួនឯងផងដែរ៕

ដោយ៖ ខៀវ ចាប