ព័ត៌មានជាតិ

ក្រសួងការបរទេសជំរុញឱ្យមានការស៊ើបអង្កេតឯករាជ្យលើឧបទ្ទវហេតុទាហានថៃជាន់មីន និងការបាញ់រះលើពលរដ្ឋខ្មែរ

បានផុស

៦ ខែ មុន

នៅ

ថ្ងៃសៅរ៍ ១៥ វិច្ឆិកា ២០២៥

ដោយ

រដ្ឋលេខាធិការប្រចាំកម្ពុជាក្រសួងការបរទេសកម្ពុជាលោកស្រី អ៊ាត សោភា បានអំពាវនាវឱ្យមានការស៊ើបអង្កេតដោយឯករាជ្យលើករណីទាហានថៃជាន់មីនកាលពីថ្ងៃទី១០ និងការបាញ់រះលើពលរដ្ឋខ្មែរនៅភូមិព្រៃចាន់កាលពីថ្ងៃទី១២។ លោកស្រីបានលើកឡើងថា «ឧប្បត្តិហេតុនេះគួរមានការស៊ើបអង្កេតឯករាជ្យ ដោយពុំគួរអនុញ្ញាតឱ្យរឿងនេះ ធ្វើឱ្យខូចដល់ដំណើរការស្ដារសន្តិភាពនោះទេ»។

ថ្លែងក្នុងពេលធ្វើបទបង្ហាញជូនអង្គទូតបរទេសអំពីការវិវត្តថ្មីៗនៃស្ថានការណ៍ព្រំដែនកម្ពុជា-ថៃ នៅក្រសួងការបរទេសកម្ពុជាកាលពីថ្ងៃទី១៣ ខែវិច្ឆិកា លោកស្រី អ៊ាត សោភា បានបដិសេធរាល់ការចោទប្រកាន់ពីទាហានថៃលើកម្ពុជា និងជំរុញឱ្យមានការស៊ើនអង្កេតដោយឯករាជ្យតែម្ដងដើម្បីជម្រះការសង្ស័យ។

ក្នុងឱកាសនោះលោកស្រីក៏បានលើកឡើងពីការបាញ់រះរបស់ទាហានថៃលើពលរដ្ឋខ្មែរនៅភូមិព្រៃចាន់ កាលពីថ្ងៃទី១២ ខែវិច្ឆិកា ថា «ជាការប្រើប្រាស់កម្លាំង ខុសច្បាប់ប្រឆាំងនឹងជនស៊ីវិល ដែលរំលោភលើអធិបតេយ្យរបស់កម្ពុជា ច្បាប់មនុស្សធម៌អន្តរជាតិ និងគោលការណ៍គ្រឹះ នៃធម្មនុញ្ញអង្គការសហប្រជាជាតិ និងធម្មនុញ្ញអាស៊ាន បានជះឥទ្ធិពល អវិជ្ជមានផងដែរ ដល់ការងារកំណត់ព្រំដែនដែលកំពុងដំណើរការ»។

លោកស្រីបញ្ជាក់ថាកម្ពុជាស្វាគមន៍ចំពោះការស៊ើបអង្កេតលើហេតុការណ៍ទាំងពីរនេះ។

គួរឱ្យដឹងផងដែរថាទាហានថៃបានដើរជាន់មីន ក្នុងតំបន់ចម្ការមីនក្នុងទឹកដីកម្ពុជា កាលពីថ្ងៃទី១០ ខែវិច្ឆិកា នៅតំបន់ជិតប្រាសាទព្រះវិហារ បណ្ដាលឱ្យរងរបួស៤នាក់។ ក្រោយហេតុការណ៍នេះថៃបានចោទប្រកាន់កម្ពុជាថាចូលទៅដាក់មីនថ្មី និងប្រកាសផ្អាកកិច្ចព្រមព្រៀងសន្ដិភាពជាមួយកម្ពុជាតែម្ដង បើទោះបីកម្ពុជាបញ្ជាក់ម្ដងហើយម្ដងទៀតថាតាំងពីចូលជាសមាជិកនៃអនុសញ្ញាអូតាវ៉ាមកកម្ពុជាមិនដែលប្រើប្រាស់មីនប្រឆាំងមនុស្សនោះទេ។

នៅថ្ងៃទី១២ ខែវិច្ឆិកា ទាហានថៃបានបើកការបាញ់រះមកលើពលរដ្ឋខ្មែរនៅភូមិព្រៃចាន់ ក្នុងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យបណ្ដាលឱ្យពលរដ្ឋខ្មែរម្នាក់ស្លាប់ និង៣នាក់រងរបួស។

កម្ពុជាបានថ្កោលទោសសកម្មភាពរបស់ទាហានថៃ ខណៈប្រតិកម្មពីអន្តរជាតិបានធ្លាក់មកជាបន្តបន្ទាប់ផងដែរ។

ក្នុងជំនួបតាមទូរស័ព្ទជាមួយនាយករដ្ឋមន្ត្រីកម្ពុជាកាលពីយប់ថ្ងៃទី១៤ ខែវិច្ឆិកា ប្រធានាធិបតីអាមេរិកលោក ដូណាល់ ត្រាំ បានបញ្ជាក់ថាលោកនឹងបន្តតាមដានលើការអនុវត្តកិច្ចព្រមព្រៀងឈប់បាញ់រវាងកម្ពុជានិងថៃ ធ្វើយ៉ាងណាធានានឹងមិនឱ្យមានការផ្ទុះអាវុធឡើងវិញនៅតាមបណ្ដោយព្រំដែនកម្ពុជា-ថៃទៀតទេ៕