ព័ត៌មានជាតិ

មន្ត្រីជាន់ខ្ពស់ការបរទេសកម្ពុជាលើកបញ្ហាព្រំដែនជាមួយថៃប្រាប់ទៅកាន់ឯកអគ្គរដ្ឋទូតអូទ្រីស

បានផុស

៨ ខែ មុន

នៅ

ថ្ងៃអង្គារ ១៨ វិច្ឆិកា ២០២៥

ដោយ

រដ្ឋមន្ត្រីស្ដីទីក្រសួងការបរទេសកម្ពុជា លោកស្រី អ៊ាត សោភា បានលើកឡើងពីបញ្ហាព្រំដែនជាមួយប្រទេសថៃ ប្រាប់ទៅកាន់ឯកអគ្គរដ្ឋទូតអូទ្រីសប្រចាំកម្ពុជា ដែលមាននិវេសនដ្ឋាននៅទីក្រុងបាងកក ដោយលោកស្រី អ៊ាត សោភា បានគូសបញ្ជាក់អំពីស្ថានការណ៍វិវត្តថ្មីៗចុងក្រោយនៅតាមទល់ដែនកម្ពុជា និងថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រីរដ្ឋមន្ត្រីស្តីទី បានសង្កត់ធ្ងន់ជាពិសេសទាក់ទងទៅនឹងការអនុវត្តនូវសេចក្ដីថ្លែងការណ៍រួមដែលជាកិច្ចព្រមព្រៀងសន្តិភាពរវាងកម្ពុជា និងថៃ ហើយដែលបានចុះហត្ថលេខាដោយនាយករដ្ឋមន្ត្រីប្រទេសទាំងពីរ កាលពីថ្ងៃទី២៦ ខែតុលា ឆ្នាំ២០២៥ នៅទីក្រុងគូឡាឡាំពួ។

ការលើកឡើងរបស់លោកស្រី អ៊ាត សោភា ពាក់ព័ន្ធនឹងរឿងព្រំដែនដូច្នេះ ធ្វើឡើងក្នុងជំនួបជាមួយលោក Wihelm Maximilian Donko ឯកអគ្គរដ្ឋទូតអូទ្រីសប្រចាំកម្ពុជា កាលពីថ្ងៃទី១៧ ខែវិច្ឆិកា ឆ្នាំ២០២៥ នៅទីស្តីការក្រសួង ក្នុងរាជធានីភ្នំពេញ។

គួររំលឹកឱ្យដឹងថា ពីទីក្រុងគូឡាឡាំពួ កម្ពុជា និងថៃ បានឈានដល់ការចុះហត្ថលេខាជាផ្លូវការដោយនាយករដ្ឋមន្ត្រីនៃប្រទេសទាំងពីរលើសេចក្ដីថ្លែងការណ៍រួម ដែលជាកិច្ចព្រមព្រៀងសន្តិភាពមួយក្នុងដំណោះស្រាយបញ្ហាជម្លោះព្រំដែន ហើយដែលកិច្ចព្រមព្រៀងសន្តិភាពនេះ ធ្វើឡើងចំពោះមុខប្រធានាធិបតីសហរដ្ឋអាមេរិក លោក ដូណាល់ ត្រាំ និងនាយករដ្ឋមន្រ្តីម៉ាឡេស៊ី លោក អាន់វ៉ា អ៊ីប្រាហ៊ីម ជាសាក្សី។ ប៉ុន្តែប្រមាណពីរសប្ដាហ៍បន្ទាប់ពីការចុះហត្ថលេខា ថៃបានប្រកាសផ្អាកការអនុវត្តកិច្ចព្រមព្រៀងសន្តិភាពនេះ ក្រោមហេតុផលចោទកម្ពុជា ថា ចូលទៅដាក់មីនថ្មី ដែលបណ្ដាលឱ្យទាហានថៃបានដើរជាន់មីនផ្ទុះ នៅតំបន់ជិតតំបន់ប្រាសាទព្រះវិហារ បើទោះបីកម្ពុជាបដិសេធម្ដងហើយម្ដងទៀត ថា កម្ពុជាមិនដែលប្រើប្រាស់មីនប្រឆាំងមនុស្សនោះទេ។

ព្រឹត្តិការណ៍បន្ទាប់ គឺនៅថ្ងៃទី១២ ខែវិច្ឆិកា ទាហានថៃ ក៏បានបើកការបាញ់រះមកលើពលរដ្ឋខ្មែរនៅភូមិព្រៃចាន់ ក្នុងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដែលបណ្ដាលឱ្យពលរដ្ឋខ្មែរម្នាក់ស្លាប់ និង៣នាក់រងរបួស។ កម្ពុជាបានថ្កោលទោសសកម្មភាពរបស់ទាហានថៃ ខណៈប្រតិកម្មពីអន្តរជាតិមានជាបន្តបន្ទាប់។

ថ្លែងក្នុងពេលធ្វើបទបង្ហាញជូនអង្គទូតបរទេសអំពីការវិវត្តថ្មីៗនៃស្ថានការណ៍ព្រំដែនកម្ពុជា និងថៃ នៅក្រសួងការបរទេសកម្ពុជា កាលពីថ្ងៃទី១៣ ខែវិច្ឆិកា លោកស្រី អ៊ាត សោភា ក៏បានលើកឡើងពីការបាញ់រះរបស់ទាហានថៃលើពលរដ្ឋខ្មែរនៅភូមិព្រៃចាន់ កាលពីថ្ងៃទី១២ ខែវិច្ឆិកា ថា «ជាការប្រើប្រាស់កម្លាំងខុសច្បាប់ ប្រឆាំងនឹងជនស៊ីវិល ដែលរំលោភលើអធិបតេយ្យរបស់កម្ពុជា ច្បាប់មនុស្សធម៌អន្តរជាតិ និងគោលការណ៍គ្រឹះនៃធម្មនុញ្ញអង្គការសហប្រជាជាតិ និងធម្មនុញ្ញអាស៊ាន បានជះឥទ្ធិពលអវិជ្ជមានផងដែរដល់ការងារកំណត់ព្រំដែនដែលកំពុងដំណើរការ»។

លោកស្រី អ៊ាត សោភា បានអំពាវនាវឱ្យមានការស៊ើបអង្កេតដោយឯករាជ្យលើករណីទាហានថៃជាន់មីនកាលពីថ្ងៃទី១០ និងការបាញ់រះលើពលរដ្ឋខ្មែរនៅភូមិព្រៃចាន់កាលពីថ្ងៃទី១២។ លោកស្រីបានលើកឡើងថា «ឧប្បត្តិហេតុនេះគួរមានការស៊ើបអង្កេតឯករាជ្យ ដោយពុំគួរអនុញ្ញាតឱ្យរឿងនេះ ធ្វើឱ្យខូចដល់ដំណើរការស្ដារសន្តិភាពនោះទេ»៕

ដោយ៖ ធឿន វ៉ាន់សុង