ព័ត៌មានជាតិ

ឧប. អូន ព័ន្ធមុន្នីរ័ត្ន ថាសម្ពាធនៃការចំណាយក្នុងឆ្នាំ២០២៦កើនឡើងពិសេសលើកិច្ចការការពារអធិបតេយ្យនិងបូរណភាពទឹកដី

បានផុស

៨ ខែ មុន

នៅ

ថ្ងៃអង្គារ ១៨ វិច្ឆិកា ២០២៥

ដោយ

ឧបនាយករដ្ឋមន្ត្រីក្រសួងសេដ្ឋកិច្ចលោក អូន ព័ន្ធមុន្នីរ័ត្ន បានលើកឡើងប្រាប់គណៈកម្មការជំនាញសភាថាក្នុងឆ្នាំ២០២៦ខាងមុខកម្ពុជាមានសម្ពាធនៃការចំណាយកើនឡើង ហើយដែលមុខសញ្ញាខ្លះត្រូវមានកំណើនជាចាំបាច់គឺការការពារអធិបតេយ្យ និងបូរណភាពទឹកដី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងបញ្ជាក់ទៅប្រធានគណៈកម្មការទី២សភា (គណៈកម្មការសេដ្ឋកិច្ច)លោក ឈាង វុន នៅវិមានរដ្ឋសភា ថ្ងៃទី១៧ ខែវិច្ឆិកា លោកឧបនាយករដ្ឋមន្ត្រី អូន ព័ន្ធមុន្នីរ័ត្ន បានឱ្យដឹងថាការរៀបចំច្បាប់ថវិកាឆ្នាំ២០២៦ មានការថ្លឹងថ្លែងដោយផ្តោតលើទិដ្ឋភាព៣គឺ ការថមថយចំណូល ការកើនឡើងសម្ពាធនៃតម្រូវការចំណាយដែលកើនឡើងពិសេសលើកិច្ចការពារជាតិ ប្រាក់សោធន កម្មវិធីគាំពារសង្គម បដិភាគនៃការវិនិយោគសេវាបំណុល និងការស្រកស្រុតនៃប្រាក់សន្សំរបស់រាជរដ្ឋាភិបាលដោយសារផលវិបាកនៃវិបត្តិជំងឺកូវីដ-១៩ និង វិបត្តិផ្សេងទៀតដែលមិនទាន់អាចស្ដារឡើងវិញបាននៅឡើយ។

លោកឧបនាយករដ្ឋមន្ត្រីបានលើកឡើងបន្ថែមថា៖ «ទោះបីជាជួបប្រទះនឹងបញ្ហាប្រឈមយ៉ាងណាក៏ដោយ គម្រោងថវិកាឆ្នាំ ២០២៦ ត្រូវបានរៀបចំ ដោយមានតុល្យភាព ដោយមិនប្រើប្រាស់ប្រាក់សន្សំរបស់រាជរដ្ឋាភិបាល ព្រមទាំង ធានាបាននូវចីរភាព ស្របតាម «ជំហរគោលនយោបាយពង្រឹងស័ក្តិសិទ្ធិភាពថវិកា ដើម្បីទ្រទ្រង់ស្ថិរភាព និងកំណើន ផ្តោតការយកចិត្តទុកដាក់ជាពិសេស លើការពង្រឹងសមត្ថភាពការពារអធិបតេយ្យជាតិ និងបូរណភាពទឹកដី ការអភិវឌ្ឍមូលធនមនុស្ស ការកែទម្រង់រដ្ឋបាលសាធារណៈ និងការកែទម្រង់រចនាសម្ព័ន្ធ ដែលមានអភិបាលកិច្ចជាស្នូល»។

តាមរយៈសេចក្ដីព្រាងច្បាប់ថវិកាឆ្នាំ២០២៦ដែលកំពុងស្ថិតក្នុងដៃគណៈកម្មាធិការជំនាញរដ្ឋសភានេះ ក្នុងឆ្នាំ២០២៦ រដ្ឋាភិបាលមានគម្រោងចំណាយប្រមាណ ១០ពាន់លានដុល្លារអាមេរិកកើនឡើង ៧,៨%បើធៀបនឹងឆ្នាំ២០២៥ ខណៈចំណូលរដ្ឋក្នុងឆ្នាំ២០២៦ ត្រូវបានរំពឹងថារកបានប្រមាណ៧ពាន់៦រយលានដុល្លារ។

ក្នុងច្បាប់នេះក៏បានអនុញ្ញាតឱ្យរដ្ឋាភិបាលខ្ចីលុយបរទេសក្នុងឆ្នាំ២០២៦ប្រមាណ ២ប៊ីលានពីររយហាសិបលានអេសដេអ៊ែ ឬប្រមាណ ៣ពាន់២០០លានដុល្លារផងដែរ។

អ្នកស្រាវជ្រាវការអភិវឌ្ឍន៍សង្គមលោកបណ្ឌិត មាស នី មានប្រសាសន៍ថាបញ្ហាជាច្រើនកើតឡើងជាបន្តបន្ទាប់តាំងពីកូវីដ១៩ បញ្ហាទេសចរណ៍ និងសង្គ្រាមមក ច្បាស់ណាស់ថាចំណូលកម្ពុជាត្រូវថយចុះ។ លោកថាការបង្កើតថវិកាជាតិ និងគម្រោងខ្ចីលុយនេះគឺជាអាទិភាពមួយដែលរដ្ឋាភិបាលត្រូវតែធ្វើស្របពេលដែលមានការគំរាមកំហែងសន្តិសុខពីប្រទេសជិតខាង ទោះជាយ៉ាងណាលោកថារដ្ឋាភិបាលគួរតែគិតគូរពីបញ្ហាបំណុលនេះផងដែរ។

លោកថា៖ «សំខាន់ថាតើយើងអាចមានលទ្ធភាពរកលុយសម្រាប់សងគេវិញបានដែរឬអត់? ជាពិសេសគឺការខ្ចី៣ពាន់លាននេះ។ ការខ្ចីនេះបើមើលទៅវាមិនទាន់ដល់ពិតាននៃការខ្ចីបំណុលសាធារណៈទេ ក៏ប៉ុន្តែនៅពេលដែលយើងមិនទាន់មានលទ្ធភាពសងវាគឺជាបញ្ហាមួយ។ មានប្រទេសខ្លះគឺមិនមែនធ្លាក់ចូលបំណុលសាធារណៈដោយសារការឆ្លងផុតបន្ទាត់ក្រហមនៃកម្រិតកម្ចីទេ តែដោយសារសេដ្ឋកិច្ចខ្លួនឯងហ្នឹងដាបអញ្ចឹងគឺមិនអាចរកលុយសងបំណុលហ្នឹងបានទេ»។

បើតាមលោកបណ្ឌិត មាស នី តាមលទ្ធភាពរបស់កម្ពុជាបច្ចុប្បន្ន លោកមើលឃើញថាអាចរកចំណូលដើម្បីផ្គត់ផ្គង់ដល់ការចំណាយរបស់ខ្លួនប្រចាំឆ្នាំបាន តែបញ្ហានោះថាដោយសារបញ្ហាពុករលួយបានធ្វើឱ្យលុយជាច្រើនបានហូរចេញពីហោប៉ៅរដ្ឋចូលទៅបុគ្គលមួយចំនួនដែលធ្វើឱ្យរដ្ឋបន្តការខ្វះខាតបែបនេះ។ លោកជំរុញដល់រដ្ឋាភិបាលមានវិធានការឱ្យបានម៉ឺងម៉ាត់និងមានចំណាត់ការឱ្យបានខ្លាំងក្លាលើបញ្ហានេះ។

គួរឱ្យដឹងផងដែរច្បាប់ថវិការជាតិឆ្នាំ២០២៦នៅពេលកំពុងស្ថិតក្នុងគណៈកម្មការជំនាញរដ្ឋសភា ខណៈប្រធានគណៈកម្មការសេដ្ឋកិច្ចសភាលោក ឈាង វុន បានបញ្ជាក់ថានឹងធ្វើរបាយការណ៍ជូនគណៈកម្មាធិការអចិន្ត្រៃយ៍ នៃរដ្ឋសភាដើម្បីសម្រេចដាក់បញ្ចូលសេចក្ដីព្រាងច្បាប់ទាំងពីរនៅក្នុងរបៀបវារៈ:នៃសម័យប្រជុំរដ្ឋសភានាពេលខាងមុខ៕

អត្ថបទដោយ ហ៊ុន សិរីវឌ្ឍន៍

Related Topics:ក្រសួងសេដ្ឋកិច្ច និងហិរញ្ញវត្ថុ