ព្រឹកនេះ ព្រះមហាក្សត្រយាងទៅបារាំង ក្នុងព្រះរាជដំណើរចូលរួមកម្មវិធីនៃបណ្ឌិត្យសភាវិទ្យាសាស្ត្រ

ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានយាងចាកចេញពីអាកាសយានដ្ឋានអន្តរជាតិតេជោ នៃព្រះរាជាណាចក្រកម្ពុជា  នៅវេលាម៉ោង៨៖៥នាទី តាមព្រះទីនាំងយន្តហោះពិសេសឆ្ពោះទៅកាន់ទីក្រុងប៉ារីស ប្រទេសបារាំង ដើម្បីយាងចូលរួមក្នុងកម្មវិធីនៃបណ្ឌិត្យសភាវិទ្យាសាស្ត្រ។

មុនយាងចាកចេញ ព្រះមហាក្សត្រ ទ្រង់បានផ្ញើព្រះរាជសារ ដោយមានព្រះរាជចំណារថា៖«ទូលព្រះបង្គំ ខ្ញុំព្រះករុណា ខ្ញុំ សូមព្រះអនុញ្ញាត និងអនុញ្ញាតពីសម្តេចព្រះមហាសង្ឃរាជទាំងពីរគណៈ និងព្រះថេរានុត្ថេរៈគ្រប់ព្រះអង្គ សម្តេច ឯកឧត្តម លោកជំទាវ លោក លោកស្រី លោកតា លោកយាយ មាមីង បងប្អូន ក្មួយៗ ជនរួមជាតិទាំងអស់អវត្តមានពីមាតុប្រទេស ចាប់ពីថ្ងៃទី០១ ខែធ្នូ ឆ្នាំ២០២៥ តទៅ ដើម្បីចូលរួមក្នុងកម្មវិធីនៃបណ្ឌិត្យសភាវិទ្យាសាស្ត្រ នៅទីក្រុងប៉ារីស នៃសាធារណរដ្ឋបារាំង ។ »។

នៅក្នុងឱកាសអវត្តមាន ព្រះករុណាព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃកម្ពុជា ទ្រង់ព្រះរាជទានសិទ្ធិជូន សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា ឱ្យទទួលជួយក្នុងព្រះបរមនាមព្រះមហាក្សត្រ ជាប្រមុខរដ្ឋស្តីទី នៃព្រះរាជាណាចក្រកម្ពុជា។

តាមគម្រោងការដែលគ្រោងទុក ព្រះមហាក្សត្រនឹងយាងនិវត្តន៍មកដល់មាតុប្រទេសវិញនៅវេលារសៀលថ្ងៃទី០៧ ខែធ្នូ ឆ្នាំ២០២៥ ខាងមុខ។

ប្រទេស​កម្ពុជា​ស្ថិត​ក្រោម​អាណានិគម​បារាំងពីឆ្នាំ១៨៦៣ ដល់​ឆ្នាំ១៩៥៣ ហើយ​បារាំង​ក៏​ជា​អ្នក​ដែល​បោះ​បង្គោល​ព្រំដែន​កម្ពុជា​ជា​មួយ​ថៃ​ផងដែរ ​ដែល​មាន​សន្ធិសញ្ញាបារាំង​-សៀម ឆ្នាំ១៩០៤ និង​ឆ្នាំ១៩០៧​ជា​សំអាង និងទទួល​ស្គាល់​ដោយ​អន្តរជាតិ​។ កម្ពុជា និងបារាំង បានចងភ្ជាប់ទំំនាក់ទំនងការទូតជាផ្លូវការជាមួយគ្នានៅក្នុងឆ្នាំ១៩៥២ ដែលគិតមកដល់ឆ្នាំ២០២៥ នេះ ទំនាក់ទំំនងនៃប្រទេសទាំងពីរឈានដល់វ័យ៧៣​ឆ្នាំហើយ៕