ទេសរដ្ឋមន្រ្តី លី ធុជ ប្រាប់អាល្លឺម៉ង់ពីផលប៉ះពាល់នៅតាមព្រំដែនក្រោយថៃប្រើប្រាស់មីនដោយខុសច្បាប់

លោកទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានប្រាប់សមមិត្តភាគីអាល្លឹម៉ង់ថា ទោះបីជាស្ថានការណ៍ក្នុងជម្លោះព្រំដែនកម្ពុជា-ថៃ នាពេលបច្ចុប្បន្នបានធូរស្រាល ប៉ុន្តែការប្រឈមរបស់ប្រជាជនកម្ពុជានៅតាមខ្សែបន្ទាត់ព្រំដែននៅតែមាន ដោយសារថៃប្រើប្រាស់គ្រាប់បែកអំឡុងសង្គ្រាមហើយបន្សល់ទុកនៅពេញដី និងស្រែចម្ការ។

លោកបានលើកឡើងបែបនេះ នៅក្នុងជំនួបពិភាក្សាទ្វេភាគីជាមួយលោក Stefan Delfs នាយកទទួលបន្ទុកផ្នែកសកម្មភាពមីនមនុស្សធម៌ នៃក្រសួងការបរទេសអាល្លឺម៉ង់​ ដើម្បីពង្រឹងភាពជាដៃគូ និងកិច្ចសហប្រតិបត្តិការសកម្មភាពមីនមនុស្សធម៌នៅកម្ពុជា កាលពីថ្ងៃទី ២ ខែធ្នូ ឆ្នាំ ២០២៥ នៅប្រទេសស្វីស។

ក្នុងឱកាសនោះផងដែរ លោកបានលើកឡើងអំពីស្ថានការណ៍នៅតាមបណ្តោយព្រំដែនកម្ពុជា-ថៃ និងផលលំបាករបស់ប្រជាជនកម្ពុជា ក្នុងអំឡុងពេលនៃការភៀសខ្លួនគេចចេញពីការវាយប្រហាររបស់យោធាថៃ ទៅកាន់ទីមានសុវត្ថិភាព ក៏ដូចជាការខូចខាតយ៉ាងធ្ងន់ធ្ងរដល់ហេដ្ឋារចនាសម្ព័ន្ធសាធារណៈ។ លោកបានប្រាប់ភាគីអាល្លឺម៉ង់ថា៖«ទោះជាស្ថាន​ការណ៍​បានធូរស្រាល ការភ័យក្លាយរបស់ប្រជាជននៅតែបន្តមាន ដោយសារសំណល់ជាតិផ្ទុះពីសង្គ្រាមដែលនៅពាសពេញដី និងស្រែចម្ការ ពិសេសគ្រាប់បែកចង្កោម ដែលជាក់ស្តែងថ្មីៗនេះ មានប្រជាជនវ័យក្មេងកម្ពុជាម្នាក់ទទួលរងគ្រោះបាត់បង់ជីវិត ដោយសារគ្រាប់ចង្កោមដែលបន្សល់ទុកដោយការវាយប្រហារនេះ»។

ការថ្លែងប្រាប់នេះ បន្ទាប់ពីមានហេតុការណ៍ផ្ទុះគ្រាប់បែកចង្កោមក្នុងខេត្តព្រះវិហារ ដែលបណ្តាលឱ្យក្មេងប្រុសម្នាក់ស្លាប់ និងឪពុករងរបួសធ្ងន់នោះ កាលពីថ្ងៃទី២៥ ខែតុលា ឆ្នាំ ២០២៥។ គ្រាប់បែបនោះ ត្រូវបានអាជ្ញាធរមីន កំណត់អត្ត​សញ្ញាណថា ជាគ្រាប់បែកដែលថៃបានប្រើប្រាស់អំឡុងពេលមានសង្គ្រាម។

បន្ថែមពីនេះ នៅថ្ងៃទី១-២​ ខែធ្នូ​ ឆ្នាំ២០២៥​ កម្លាំងអង្គភាព CMAC បានបោសសម្អាតតំបន់រងផលប៉ះពាល់ដោយសារសង្គ្រាម​ ២៤-២៨​ ខែកក្កដា​ ឆ្នាំ២០២៥​ ជាតំបន់គ្រាប់បែកចង្កោម​ ស្ថិតនៅភូមិតាមាន់សែនជ័យ​ ឃុំគោកមន ស្រុកបន្ទាយអំពិល ខេត្តឧត្តរមានជ័យ បានរុករកឃើញគ្រាប់បែកចង្កោមចំនួន២៥គ្រាប់ប្រភេទ M46 បាញ់ចេញពីគ្រាប់កាំភ្លើងធំ១៥៥ មម ដែលថៃប្រើប្រាស់ផ្ទុយពីច្បាប់អន្តរជាតិ។

នៅក្នុងជំនួបដដែលខាងលើ តាងនាមឱ្យរាជរដ្ឋាភិបាលកម្ពុជា លោកទេសរដ្ឋមន្រ្តី លី ធុជ បានថ្លែងអំរគុណជូនចំពោះរដ្ឋាភិបាល និងប្រជាជនអាល្លឺម៉ង់ ដែលជួយគាំទ្រដល់ដំណើរការស្វែងរកសន្តិភាព និងការអភិវឌ្ឍនៅកម្ពុជា ក្នុងនោះរួមទាំងគាំទ្រដល់សកម្មភាពមីនមនុស្សធម៌នៅកម្ពុជា។ លើកក៏បានស្នើសុំឱ្យប្រទេសអាល្លឺម៉ង់បន្តគាំទ្រការដោះស្រាយផលប៉ះពាល់ដែលនៅសេសសល់ រហូតដល់កម្ពុជាអាចសម្រេចនូវគោលដៅគ្មានផលប៉ះពាល់ដោយសារមីន និងសំណល់ជាតិផ្ទុះពីសង្រ្គាម៕