ក្រសួងការពារជាតិថាថៃយកលេសបញ្ហាមីនថ្ពឹនភ្នែកអន្តរជាតិ ដើម្បីលាក់បាំងមហិច្ឆតាចង់ឈ្លានពានលើកម្ពុជា

ក្រសួងការពារជាតិកម្ពុជា ថាថៃមានចេតនាយកបញ្ហាមីន ថ្ពឹនភ្នែកអន្តរជាតិ និងបិទបាំងនូវភាពស្រេកឃ្លានការ ឈ្លានពានខុសច្បាប់មកលើទឹកដីកម្ពុជា។ កម្ពុជា ប្រាប់ឱ្យថៃឈប់ភ្លាមចំពោះទង្វើប្រឌិតព័ត៌មានពាក់ព័័ន្ធបញ្ហាមីន ធ្វើជាលេសឈ្លានពាន។  ក្រសួងការពារជាតិវាយតម្លៃបែបនេះ ក្រោយកងទ័ពភូមិភាគទី២ថៃផ្សាយលើទំព័រហ្វេសប៊ុកផ្លូវការ នាព្រឹកថ្ងៃទី៣ ខែធ្នូ នេះ ចោទប្រកាន់កម្ពុជាថា “មីនដែលកម្ពុជាដាក់ បានផ្ទុះមួយគ្រាប់នៅតំបន់ហួយតាម៉ារៀ កាលពីម៉ោង២:២០នាទីរសៀលថ្ងៃទី២ ខែធ្នូ”។

«ក្រសួងការពារជាតិកម្ពុជា សូមបដិសេធ និងច្រានចោលទាំងស្រុង ចំពោះការចោទប្រកាន់របស់កងទ័ពភូមិភាគទី២ថៃ មកលើកម្ពុជាដែលថាកម្ពុជាដាក់មីនថ្មី ក្នុងគោលបំណងបំភ័ន្តសហគមន៍អន្តរជាតិ និងលាក់កំបាំងនូវមហិច្ឆតារំលោភបំពានខុសច្បាប់របស់ខ្លួនចូលមកដែនអធិបតេយ្យស្របច្បាប់របស់កម្ពុជា។»។ នេះគឺជាការឆ្លើយតបរបស់ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិតាមរយៈសេចក្ដីប្រកាសព័ត៌មានចេញនៅរសៀលថ្ងៃទី៣ ខែធ្នូ ។

យោងលើអំណះអំណាងរបស់យោធភូមិភាគទី៤របស់កម្ពុជា ដែលនៅទីតាំងជាក់ស្ដែង អ្នកនាំពាក្យក្រសួងការពារជាតិកម្ពុជា ថាកាលពីវេលាម៉ោង ២:២០នាទីរសៀលថ្ងៃទី២ ខែធ្នូ ពុំមានឮសម្លេងផ្ទុះគ្រាប់មីន ដូចការចោទប្រកាន់របស់កងទ័ពភូមិភាគទី២ថៃឡើយ។

ក្រោយពីបដិសេធការចោទប្រកាន់របស់ភាគីថៃជាច្រើនលើកលើបញ្ហាមីន ក្រសួងការពារជាតិអះអាងយ៉ាងមុតមាំសាជាថ្មីថា ចាប់តាំងពីក្លាយជារដ្ឋភាគីនៃអនុសញ្ញាអូតាវ៉ា កម្ពុជាតែងតែប្រកាន់ខ្ជាប់នូវគោលការណ៍ និងកាតព្វកិច្ចរបស់ខ្លួននៅក្រោមច្បាប់អន្តរជាតិ ដោយមិនដែលដាក់មីនថ្មីដែលគំរាមកំហែងដល់សន្តិសុខ និងសុវត្ថិភាពរបស់មនុស្សជាតិនោះឡើយ។

អ្នកនាំពាក្យ ថា៖«កម្ពុជាក៏សូមអំពាវនាវឱ្យភាគីថៃបញ្ឈប់ជាបន្ទាន់ការយកបញ្ហាមីនដែលជាព័ត៌មានមិនពិត ដើម្បីធ្វើជាលេសរំលោភបំពានមកលើដែនអធិបតេយ្យស្របច្បាប់របស់កម្ពុជា។»។

អ្នកនាំពាក្យ បន្ថែមថា ក្រសួងការពារជាតិកម្ពុជា នៅតែបន្តប្តេជ្ញាចិត្តក្នុងការគោរពយ៉ាងម៉ឺងម៉ាត់សេចក្តីថ្លែងការណ៍រួមស្តីពីសន្តិភាពរវាងកម្ពុជានិងថៃ ដែលត្រូវបានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥  ជាពិសេសពាក់ព័ន្ធនឹងការទប់ស្កាត់ព័ត៌មានក្លែងក្លាយ ឬព័ត៌មានមិនពិត ក្នុងគោលបំណងបន្ធូរបន្ថយភាពតានតឹង និងបង្កើតបរិយាកាសអំណោយផលដល់ការរក្សាសន្តិភាព និងស្ថិរភាពរវាងប្រទេសទាំងពីរ។

ជាការកត់សម្គាល់ កាលពីពេលកន្លងទៅ ថៃបានយកបញ្ហាទាហានខ្លួនដើរចូលជាន់មីនក្នុងចម្ការមីនក្នុងដីខ្មែរដែលសេសសល់ពីសង្គ្រាមស៊ីវិលចោទប្រកាន់ និងបើកការវាយប្រហារឈ្លានពានដោយខុសច្បាប់មកលើកម្ពុជាកាលពីចុងខែកក្កដា​កន្លងទៅ ហើយបន្ទាប់ពីមានបទឈប់បាញ់ និងកិច្ចព្រមព្រៀងសន្តិភាពថៃនៅតែយកបញ្ហាមីនចោទប្រកាន់កម្ពុជាម្ដងទៀតហើយម្ដងទៀត។

អាជ្ញាធរមីនរបស់កម្ពុជា កាលពីព្រឹកថ្ងៃទី៣ ខែធ្នូ បានឆ្លើយតបក្នុងសេចក្ដីប្រកាសព័ត៌មានថា ថៃ​​ប្រើប្រាស់​ឧប្បត្តិហេតុ​ផ្ទុះ​មីន ដើម្បី​បង្វែរ​ចំណាប់​អារម្មណ៍​របស់​សាធារណជន និង​សហគមន៍​អន្តរជាតិ ចេញ​ពី​ការ​បំផ្លិចបំផ្លាញ និង​ការ​ខូចខាត​ដ៏​ធំធេង ដែល​បង្ក​ដោយ​យោធា​ថៃ​មក​លើ​កម្ពុជា ក្នុង​អំឡុង​ពេល​សង្គ្រាម​ប្រាំ​ថ្ងៃ និង​ការ​រំលោភ​បំពាន​លើ​កិច្ច​ព្រមព្រៀង​គួឡាឡាំពួរ និង​សេចក្ដី​ថ្លែង​ការ​រួម​គ្នា៕

ដោយ៖ ង៉ិល ណារ៉ាត់