ព័ត៌មានជាតិ

សហគមន៍ខ្មែរនៅសាធារណរដ្ឋកូរ៉េជាង ៣០០នាក់ បន្តប្រមូលផ្តុំគ្នាសម្តែងមតិថ្កោលទោសថៃ ដែលបានបើកការបាញ់ប្រហារដ៏ឃោរឃៅមិនរើសគោលដៅឈ្លានពានមកលើដែនអធិបតេយ្យភាពកម្ពុជា

បានផុស

៧ ខែ មុន

នៅ

ថ្ងៃអាទិត្យ ២១ ធ្នូ ២០២៥

ដោយ

(កូរ៉េខាងត្បូង)៖ សហគមន៍ខ្មែរដែលកំពុងរស់នៅ និងធ្វើការនៅទីក្រុងឆាំងវ៉ុន សាធារណរដ្ឋកូរ៉េខាងត្បូងប្រមាណជាង ៣០០នាក់ នៅថ្ងៃទី២១ ខែធ្នូ ឆ្នាំ២០២៥នេះ បានប្រមូលផ្តុំគ្នាធ្វើបាតុកម្មសម្តែងមតិ ថ្កោលទោសយ៉ាងដាច់អហង្ការ ចំពោះទង្វើអមនុស្សធម៌ដ៏សាហាវយង់ឃ្នងរបស់រដ្ឋាភិបាលក្រុងបាងកក និងយោធាថៃ ដែលបានបើកការបាញ់ប្រហារទាំងកំរោលមិនរើសគោលដៅ ក្នុងបំណងឈ្លានពានយកដែនអធិបតេយ្យភាពកម្ពុជា។

ការប្រមូលផ្តុំរបស់សហគមន៍ខ្មែរនៅសាធារណរដ្ឋកូរ៉េ លើកនេះ អ្នកចូលរួមទាំងអស់បានស្រែក និងកាន់បដាបង្ហាញពីការរងទុក្ខរបស់ជនភៀសសឹកដែលចាកចេញពីផ្ទះសម្បែង និងបង្ហាញពីការគោរពដឹងគុណដល់វីរកងទ័ពកម្ពុជា ដែលបានការពារទឹកដីពីការឈ្លានពានរបស់ខ្មាំង និងគាំទ្រពេញទំហឹងលើរាជរដ្ឋាភិបាលកម្ពុជា ព្រមទាំងថ្កោលទោស ចំពោះអំពើរំលោភបំពានយ៉ាងសាហាវព្រៃផ្សៃបំផុតរបស់យោធាថៃមកលើដែនអធិបតេយ្យភាព និងបូរណភាពទឹកដីរបស់កម្ពុជា ដោយបានការបំផ្លាញសាលារៀន វត្តអារាម ផ្ទះសម្បែង និងហេដ្ឋារចនាសម្ព័ន្ធផ្សេងៗ ព្រមទាំងធ្វើឱ្យបាត់បង់អាយុជីវិតប្រជាជនស៊ីវិល និងធ្វើឱ្យប្រជាជនជាង ៥០ម៉ឺននាក់ចាកចេញពីផ្ទះសម្បែងធ្លាប់រស់នៅក្លាយជាជនភៀសសឹកយ៉ាងលំបាក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សហគមន៍ខ្មែរនៅសាធារណរដ្ឋកូរ៉េខាងត្បូង បានអំពាវនាវឱ្យប្រទេសមហាអំណាចមានសហរដ្ឋអាម៉េរិក ចិន ជប៉ុនជាដើម ក៏ដូចជា ប្រទេសម៉ាឡេស៊ី និងសហគមន៍អន្តរជាតិ ប្រើប្រាស់បច្ចេកវិទ្យារបស់ខ្លួន ពិនិត្យឱ្យបានច្បាស់ថា អ្នកណាជាអ្នកបើកការបាញ់ប្រហារមុន និងចូលរួមតាមដានស្ថានការណ៍នេះប្រកបដោយភាពយកចិត្តទុកដាក់បំផុត ស្របទៅនឹងការគាំទ្រ និងស្វាគមន៍របស់រាជរដ្ឋាភិបាលកម្ពុជា។

ជាមួយគ្នានោះ សហគមន៍ខ្មែរនៅកូរ៉េខាងត្បូងបានអំពាវនាវដល់សហគមន៍អន្តរជាតិឱ្យមានការថ្កោលទោស ចំពោះអំពើរំលោភបំពានរបស់ថៃ និងចាត់វិធានការជាបន្ទាន់ និងយ៉ាងម៉ឺងម៉ាត់បំផុត ដើម្បីដាក់សម្ពាធលើប្រទេសនេះឱ្យបញ្ឈប់រាល់សកម្មភាពយ៉ាងគឃ្លើនរបស់ខ្លួន និងងាកមកដោះស្រាយបញ្ហាព្រំដែនដោយសន្តិវិធី។

សូមបញ្ជាក់ថា បងប្អូនខ្មែរសាធារណរដ្ឋកូរ៉េ បានប្រមូលផ្តុំគ្នាសម្តែងមតិថ្កោលទោសថៃ នៅទីតាំងជាច្រើន ជាបន្តបន្ទាប់ ចាប់តាំងពីយោធាថៃបានបើកការវាយប្រហារដ៏កំរោលសារជាថ្មី មកលើដែនអធិបតេយ្យភាពកម្ពុជានៅថ្ងៃទី៧ ខែធ្នូ ឆ្នាំ២០២៥៕