ព័ត៌មានជាតិ

រដ្ឋបាលរាជធានី ផ្ដល់អំណោយ ៥ កុងតឺន័រ ជូនកងទ័ពជួរមុខ និងចែកអំណោយដល់កុមារ ក្នុងមណ្ឌលសុវត្ថិភាពខេត្តព្រះវិហារ ជាង ១ ពាន់នាក់

បានផុស

៧ ខែ មុន

នៅ

ថ្ងៃអង្គារ ៣០ ធ្នូ ២០២៥

ដោយ

នៅរសៀលថ្ងៃទី ២៩ និងព្រឹកថ្ងៃទី ៣០ ធ្នូ លោក ឯក ឃុនដឿន អភិបាលរង តំណាង លោក ឃួង ស្រេង អភិបាលរាជធានីភ្នំពេញ បានចុះសួរសុខទុក្ខ និងចែកអំណោយជូនកុមារភៀសសឹករស់នៅក្នុងមណ្ឌលសុវត្ថិភាព ខេត្តព្រះវិហារ ព្រមទាំងផ្តល់អំណោយជាគ្រឿងឧបភោគបរិភោគ និងសម្ភារ ចំនួន ៥ កុងតឺន័រ ជូនកងទ័ពជួរមុខ និងជនភៀសសឹកទិសខេត្តព្រះវិហារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មណ្ឌលសុវត្ថិភាពនេះ មានប្រជាពលរដ្ឋជាជនភៀសសឹកប្រមាណ ១ ៣០០ គ្រួសារ។ នារសៀលថ្ងៃ២៩ ធ្នូ កុមារប្រមាណជាង ១ ០០០ នាក់ នៅមណ្ឌលសុវត្ថិភាព នេះ ត្រូវបានលោក ឯក ឃុនដឿន និងក្រុមការងារ ចែកជូនអំណោយមានដូចជា ៖ នំ ទឹកដោះគោកូនក្មេង មី ស្ករគ្រាប់ និងតុក្កតាជាដើម។ បន្ទាប់មក នៅព្រឹកថ្ងៃទី ៣០ ធ្នូ លោក ឯក ឃុនដឿន បានបន្តប្រគល់អំណោយរាប់សិបមុខ សរុបចំនួន ៥ កុងតឺន័រ ជូនកងទ័ពជួរមុខ និងជនភៀសសឹកខេត្តព្រះវិហារ ដែល ១ កុងតឺន័រ ស្មើនឹង ២៤ មុខ មានដូចជា ៖ ទឹកបរិសុទ្ធ អង្រឹង មី ភេសជ្ជៈចម្រុះ អីវ៉ាន់ចម្រុះ ថ្នាំដុសធ្មេញ ច្រាស់ដុសធ្មេញ ធូបមូស+ថ្នាំបាញ់មូស អំបិល ម៉ាស ត្រីប្រឡាក់+ត្រីងៀត នំ ទឹកដោះគោចម្រុះ សាប៊ូ ស្ករស ប៊ីចេង សាប៊ូលាងចាន ថ្នាំពេទ្យអំបុក ឃីត ត្រីខ អាវរងា ត្រីងៀត និងគោងៀត។ ចំណែក ៤ កុងតឺន័រ ទៀត ដោយ ១ កុងតឺន័រមានចំនួន ១៥ មុខ ដូចជា ៖ ទឹកបរិសុទ្ធ ភេសជ្ជៈចម្រុះមី អំបិលត្រីប្រឡាក់+ត្រីងៀត នំ សាប៊ូ ស្ករស ប៊ីចេងសាប៊ូលាងចាន ថ្នាំពេទ្យ ឃីត សៀង និងប៊ីដុង។ ចំណែក ៣ កុងតឺន័រ ទៀត ជាទឹកបរិសុទ្ធ និងភេសជ្ជៈប្រមាណ ១៥ ០០០ កេស។

ក្នុងឱកាសនោះ តំណាងវីរកងទ័ពជួរមុខ បានគោរពថ្លែងអំណរគុណដ៏ជ្រាលជ្រៅចំពោះ លោក ឃួង ស្រេង ដែលជានិច្ចកាល តែងតែយកចិត្តទុកដាក់ខ្ពស់ក្នុងការជួយឧបត្ថម្ភគាំទ្រដល់វីរកងទ័ពជួរមុខ និងជនភៀសសឹក។

តំណាងឱ្យវីរកងទ័ពជួរមុខទាំងអស់ បានប្ដេជ្ញាចិត្តយ៉ាងមុតមាំក្នុងកិច្ចការពារបូរណភាពទឹកដីកម្ពុជា មិនឱ្យបាត់បង់ដាច់ខាត ក្រោមការដឹកនាំដ៏វៃឆ្លាតរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រី និង សម្តេចតេជោ ហ៊ុន សែន ប្រធានព្រឹទ្ធសភា។

លោក ឯក ឃុនឌឿន ក្នុងឱកាសនោះ បាននាំយកនូវការផ្ដាំផ្ញើសាកសួរសុខទុក្ខពីសំណាក់លោកអភិបាលរាជធានីភ្នំពេញ និងសូមគោរពអរគុណ និងដឹងគុណ ចំពោះវីរកងទ័ពជួរមុខដែលកំពុងឈរជើងយ៉ាងរឹងមាំ ដើម្បីតតាំងជាមួយពួកឈ្លានពានទឹកដីកម្ពុជា ក្រោយពួកឈ្លានពានបានធ្វើឱ្យបាត់បង់អាយុជីវិតពលរដ្ឋស្លូតត្រង់ និងខូចខាតយ៉ាងធ្ងន់ធ្ងរនូវហេដ្ឋារចនាសម្ព័ន្ធ សម្បត្តិបេតិកភណ្ឌ មនុស្សជាតិ ប្រាសាទបុរាណ វត្តអារាម សាលារៀន មន្ទីរពេទ្យ អគារពាណិជ្ជកម្ម ផ្ទះ ស្ពាន ថ្នល់ ជាច្រើនផ្សេងទៀត។