កម្ពុជា–កូរ៉េ បញ្ចប់គម្រោងអភិរក្ស និងជួសជុលក្រុមប្រាសាទព្រះពិធុរ និងព្រះលានជល់ដំរី ដំណាក់កាលទី២

នៅព្រឹកថ្ងៃទី១៦ ខែមករា ឆ្នាំ២០២៦ លោកបណ្ឌិត ហង់ ពៅ អគ្គនាយកនៃអាជ្ញាធរជាតិអប្សរា និងលោក Kim Chang Yong ឯកអគ្គរដ្ឋទូតសាធារណរដ្ឋកូរ៉េប្រចាំព្រះរាជាណាចក្រកម្ពុជា បានអញ្ជើញជាអធិបតីក្នុងសន្និសីទស្តីពីការចែករំលែកលទ្ធផលបញ្ចប់គម្រោងអភិរក្ស និងជួសជុលក្រុមប្រាសាទព្រះពិធុរ និងព្រះលានជល់ដំរី ដំណាក់កាលទី២។

សន្និសីទនេះ មានការចូលរួមពីតំណាងជាន់ខ្ពស់នៃទីភ្នាក់ងារបេតិកភណ្ឌកូរ៉េ (KHA) ទីភ្នាក់ងារកិច្ចសហប្រតិបត្តិការអន្តរជាតិកូរ៉េ (KOICA) ព្រមទាំងថ្នាក់ដឹកនាំ និងអ្នកជំនាញជាតិ-អន្តរជាតិ មកពីស្ថាប័នដៃគូជាច្រើន ដែលពាក់ព័ន្ធនឹងការងារអភិរក្ស និងជួសជុលប្រាសាទបុរាណ។

លោក Kim Chang Yong បានមានប្រសាសន៍ថា លោកបានអញ្ជើញទៅទស្សនាក្រុមប្រាសាទព្រះពិធុរ និងព្រះលានជល់ដំរីដោយផ្ទាល់ ហើយបានសង្កេតឃើញថា លទ្ធផលនៃការអភិរក្ស និងស្តារឡើងវិញអស់រយៈពេលជាច្រើនឆ្នាំមកនេះ មានគុណភាពល្អប្រសើរខ្លាំង។ លោកថា លទ្ធផលដ៏ជោគជ័យនេះ គឺកើតចេញពីកិច្ចខិតខំប្រឹងប្រែងរួមគ្នារវាងអ្នកជំនាញកូរ៉េ និងអាជ្ញាធរជាតិអប្សរា។

ចំណែក លោកបណ្ឌិត ហង់ ពៅ បានមានប្រសាសន៍ថា ការអភិរក្សប្រកបដោយភាពប្រុងប្រយ័ត្ននៅក្រុមប្រាសាទព្រះពិធុរ និងព្រះលានជល់ដំរី ដែលរួមបញ្ចូលទាំងការអនុវត្តផ្នែកវិទ្យាសាស្ត្រ និងការពង្រឹងសមត្ថភាពបច្ចេកទេសដល់ក្រុមការងារជំនាញ បានធ្វើឲ្យគម្រោងនេះទទួលបានជោគជ័យយ៉ាងលេចធ្លោ។ លោកបន្តថា ជោគជ័យនេះ អាចសម្រេចបានដោយសារភាពជឿជាក់ ទំនុកចិត្ត និងមិត្តភាពដ៏រឹងមាំរវាងកម្ពុជា និងសាធារណរដ្ឋកូរ៉េ។ ក្នុងនោះ ទីភ្នាក់ងារបេតិកភណ្ឌកូរ៉េ (KHA) និងអាជ្ញាធរជាតិអប្សរា បានសហការគ្នាចែករំលែកជំនាញ ចក្ខុវិស័យ និងការលះបង់យ៉ាងខ្លាំង ក្នុងនាមជាដៃគូដែលមិនត្រឹមតែមានលក្ខណៈផ្លូវការប៉ុណ្ណោះទេ ប៉ុន្តែថែមទាំងមានលក្ខណៈជាមនុស្សធម៌ផងដែរ។

ក្នុងឱកាសនោះ លោកអគ្គនាយកនៃអាជ្ញាធរជាតិអប្សរា ក៏បានប្រគល់ប័ណ្ណថ្លែងអំណរគុណ និងសរសើរជូនដល់ថ្នាក់ដឹកនាំ និងភាគីកូរ៉េផងដែរ។

គួរបញ្ជាក់ថា រដ្ឋាភិបាលសាធារណរដ្ឋកូរ៉េ បានបន្តកិច្ចសហប្រតិបត្តិការក្នុងវិស័យបេតិកភណ្ឌជាមួយក្រសួងវប្បធម៌ និងវិចិត្រសិល្បៈ និងអាជ្ញាធរជាតិអប្សរា អស់រយៈពេលជាង ១០ឆ្នាំមកហើយ។ ចាប់តាំងពីឆ្នាំ២០១៤ មក រដ្ឋាភិបាលកូរ៉េបានចាប់ផ្តើមអនុវត្តកិច្ចសហប្រតិបត្តិការ ODA តាមរយៈគម្រោងអភិរក្សក្រុមប្រាសាទព្រះពិធុរ ហើយវិសាលភាពនៃកិច្ចសហការនេះ ក៏បានពង្រីកដល់គម្រោងជួសជុលគ្រឹះបាកាននៃប្រាសាទអង្គរវត្តផងដែរ។

គម្រោងអភិរក្ស និងជួសជុលក្រុមប្រាសាទព្រះពិធុរ និងព្រះលានជល់ដំរី ដំណាក់កាលទី២ បានចាប់ផ្តើមអនុវត្តតាំងពីខែតុលា ឆ្នាំ២០១៩ និងបានបញ្ចប់ជាផ្លូវការនៅខែមករា ឆ្នាំ២០២៦៕