ប្រតិបត្តិករទេសចរណ៍៖ជម្លោះរវាងថៃ-កម្ពុជា បានផ្ដល់មេរៀនថ្មី និងឱកាសឱ្យកម្ពុជាពង្រឹងខ្លួនឯង ពិសេសលើវិស័យទេសចរណ៍

ប្រតិបត្តិករទេសចរណ៍ខេត្តសៀមរាប លោក ឌុច សារ៉េត លើកឡើងថា ជម្លោះប្រដាប់អាវុធដែលថៃវាយប្រហារមកលើកម្ពុជា បានផ្ដល់ជាមេរៀនថ្មីមួយ និងឱកាសកម្ពុជាអភិវឌ្ឍ ពង្រឹងខ្លួនឯង ជាពិសេសនៅលើវិស័យទេសចរណ៍ផ្ទាល់។ លោកលើកឡើងដូច្នេះ ក្នុងសន្នីសារព័ត៌មានស្ដីពី«ការវិវត្តន៍នៃទីផ្សារទេសចរណ៍កម្ពុជាក្នុងរយៈពេល៥ឆ្នាំចុងក្រោយ»  នារសៀលថ្ងៃទី១៧ ខែមករា ឆ្នាំ២០២៦ លើទឹកដីខេត្តសៀមរាប។

លោក ឌុច សារ៉េត ពន្យល់ថា ជម្លោះរវាងថៃនិងកម្ពុជា បង្កើតបានជាឱកាសសម្រាប់វិស័យទេសចរណ៍នៅត្រង់ថា ផ្ដល់ឱកាសឱ្យភ្ញៀវជ្រើសរើសវិធីសាស្ត្រធ្វើដំណើរឆ្លងដែនពីប្រទេសមួយទៅប្រទេសមួយធ្វើដំណើរតាមបែបថ្មី គឺប្ដូរពីការធ្វើដំណើរតាមរថយន្តឆ្លងកាត់ព្រំដែន ទៅជាការហោះហើរតាមផ្លូវអាកាសចូលមកកម្ពុជា ដែលនេះបានជួយឱ្យកម្ពុជាទាក់ទាញបានភ្ញៀវទេសចរណ៍។

ប្រតិបត្តិករទេសចរណ៍ខេត្តសៀមរាបមើលឃើញថា ​ជារឿងដ៏ល្អដែលកម្ពុជា បានដាក់ឱ្យដំណើរការអាកាសយានដ្ឋានអន្តរជាតិសៀមរាបកាលពីជាង២ឆ្នាំមុន និងអាកាសយានដ្ឋានអន្តរជាតិតេជោនៅខែតុលា ឆ្នាំ២០២៥ ជាស្ថាពរ អនុញ្ញាតឱ្យមានការផ្សព្វផ្សាយទៅកាន់ភ្ញៀវទេសចរណ៍គ្រប់ទីកន្លែងបានដឹងថា កម្ពុជា មានអាកាសយានដ្ឋានខ្នាតអន្តរជាតិអាចទទួលការចុះចតពីយន្តហោះខ្នាតធំៗមកពីជុំវិញពិភពលោក។

លោក ឌុច សារ៉េត  សង្កត់ធ្ងន់ថា៖«ទាំងអស់នេះហើយ គឺជាឱកាសក្នុងការពង្រឹង និងការពន្លឿនវិស័យទេសចរណ៍កម្ពុជាឱ្យមានតភ្ជាប់វិស័យអាកាសចរណ៍ពីតំបន់មួយទៅតំបន់មួយចូលមកកាន់ប្រទេសកម្ពុជាផ្ទាល់។»។

គូររម្លឹកថា កងទ័ពថៃ នៅថ្ងៃទី៧ ខែមិថុនា គឺជាអ្នកចាប់ផ្ដើមលែងល្បែងបិទច្រកព្រំដែន និងកែប្រែពេលវេលានៃការបិទ-បើកច្រកព្រំដែនរវាងប្រទេសទាំងពីរជាឯកតោភាគី ដោយមិនបានគិតអំពីផលប៉ះពាល់ដល់ការធ្វើដំណើរឆ្លងកាត់របស់ប្រជាជននៃប្រទេសទាំងពីរឡើយ។ បន្ទាប់មកនៅថ្ងៃទី២៣ ខែមិថុនា ឆ្នាំ២០២៥ កងទ័ពថៃ បិទច្រកទ្វារព្រំដែនចេញចូលជាមួយកម្ពុជាទាំងអស់នៅតាមបណ្ដោយព្រំដែននៃប្រទេសទាំងពីរប្រវែងជាង៨០០គីឡូម៉ែត្រ គ្របដណ្ដប់លើខេត្តចំនួន៧របស់កម្ពុជា។ ការបិទច្រកទ្វារព្រំដែនគោកពីសំណាក់កងទ័ពថៃ បានបង្កផលប៉ះពាល់ធ្ងន់ធ្ងរមកលើពលរដ្ឋ សេដ្ឋកិច្ច​ និងវិស័យទេសចរណ៍ដែលធ្លាប់តែធ្វើដំណើរឆ្លងដែនតាមផ្លូវគោក។

កម្ពុជា​ទទួល​បាន​អ្នក​ដំណើរ​ចេញ-ចូល ​តាម​ផ្លូវ​អាកាស​ជិត ៧ ​លាន​នាក់ នៅក្នុងឆ្នាំ ២០២៥ កើនឡើង ១២% ធៀបនឹងឆ្នាំ ២០២៤ ​កំណើននេះ ដោយសារការងើបឡើង​វិញយ៉ាងខ្លាំង​នៃចំនួន​ភ្ញៀវទេស​ចរ​ចិន​។​ បើយោង​តាម​របាយ​ការណ៍​របស់រដ្ឋលេខាធិការដ្ឋាន​អាកាសចរណ៍​ស៊ីវិល​ នៅ​ក្នុងឆ្នាំ ២០២៥ ​ជើង​ហោះហើរចេញ-ចូល (ទ្វេទិស) មាន​ចំនួន ​៦៤ ៨២១ជើង កើនឡើង ១១%, អ្នកដំណើរចេញ-ចូល (ទ្វេទិស) មានចំនួន ៦ ៩៨៨ ២៥៩ នាក់ កើនឡើង ១២% និងទំនិញតាមផ្លូវអាកាសមានចំនួន ​៩៣ ៨៨៩ តោន ​កើន ២១%៕

ដោយ៖ ង៉ិល ណារ៉ាត់