ពាក់កណ្ដាលខែកុម្ភៈនេះ រដ្ឋនឹងដាក់ឱ្យអនុវត្តកម្មវិធីអន្តរាគមន៍ជួយស្ដារជីវភាព និងជួសជុលផ្ទះពលរដ្ឋរងគ្រោះព្រោះថៃឈ្លានពាន

ចាប់ពីពាក់កណ្ដាលខែកុម្ភៈ ឆ្នាំ២០២៦ នេះ រាជរដ្ឋាភិបាលកម្ពុជា នឹងដាក់ឱ្យអនុវត្តន៍កម្មវិធីអន្តរាគមន៍ជួយស្ដារជីវភាព និងការជួសជុលផ្ទះសម្បែងពលរដ្ឋដែលរងគ្រោះព្រោះសង្គ្រាមថៃឈ្លានពានលើកម្ពុជា ដើម្បីឱ្យពលរដ្ឋដែលបានវិលត្រឡប់ទៅលំនៅដ្ឋានវិញ អាចប្រកបរបរចិញ្ចឹមជីវិតជាប្រក្រតីឡើងវិញ  ព្រមទាំងការស្ដារឡើងវិញនូវហេដ្ឋារចនាសម្ព័ន្ធចាំបាច់ដែលរងការខូចខាតក្នុងមូលដ្ឋាននីមួយៗ។  នេះបើតាមការផ្សព្វផ្សាយរបស់អគ្គលេខាធិការក្រុមប្រឹក្សាជាតិគាំពារសង្គម លើបណ្ដាញសង្គមផ្លូវការនាព្រឹកថ្ងៃទី១១ ខែកុម្ភៈ នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសម្រេចនេះ កើតឡើង បន្ទាប់ពីកាលពីថ្ងៃទី៩ និងទី១០ ខែកុម្ភៈ លោក ចន ណារិទ្ធ ប្រធានក្រុមការងារចំពោះកិច្ចរៀបចំ និងគ្រប់គ្រងការស្ដារជីវភាព និងហេដ្ឋារចនាសម្ព័ន្ធដែលខូចខាតពីជម្លោះប្រដាប់អាវុធកម្ពុជា-ថៃ បានជួបប្រជុំពិភាក្សាជាមួយរដ្ឋបាលខេត្តព្រះវិហារ និងឧត្តរមានជ័យ តំណាងគណៈកម្មការជាតិគ្រប់គ្រងគ្រោះមហន្តរាយ,មូលនិធិជាតិជំនួយសង្គម,  ដើម្បីពិនិត្យ និងផ្ទៀងផ្ទាត់ទិន្នន័យចុងក្រោយ សំដៅត្រៀមដាក់ឱ្យអនុវត្តកម្មវិធីអន្តរាគមន៍របស់រាជរដ្ឋាភិបាល សម្រាប់គ្រួសារភៀសសឹកដែលបានវិលត្រលប់ទៅលំនៅឋានវិញ នៅតាមបណ្ដាខេត្តដែលរងផលប៉ះពាល់ពីសង្គ្រាមឈ្លានពានរបស់ថៃនាពេលកន្លងមក ឱ្យបានទាន់ពេលស្របតាមការសម្រេចរបស់សម្តេច ហ៊ុន ម៉ាណែត នាយករដ្ឋមន្ត្រីកម្ពុជា។

ក្នុងពេលកិច្ចប្រជុំនេះ ក៏បានពិភាក្សាពាក់ព័ន្ធនឹងការគិតគូរអំពីអន្តរាគមន៍ចាំបាច់មួយចំនួនសម្រាប់ក្រុមគ្រួសារពលរដ្ឋ ដែលមិនទាន់អាចត្រលប់ទៅលំនៅឋានវិញផងដែរ។​

ស្របពេលជាមួយគ្នានេះ, ក្រុមការងារចំពោះកិច្ច រៀបចំ និងគ្រប់គ្រងការស្ដារជីវភាព និងហេដ្ឋារចនាសម្ព័ន្ធដែលខូចខាតពីជម្លោះព្រំដែនកម្ពុជា-ថៃ ក៏បានចាត់បញ្ជូនក្រុមការងារបច្ចេកទេសរបស់អគ្គលេខាធិការដ្ឋានក្រុមប្រឹក្សាជាតិគាំពារសង្គម ចុះជួបពិភាក្សាការងារជាមួយរដ្ឋបាលក្រុង-ស្រុក នៅតាមបណ្ដាខេត្តផ្សេងទៀតដែលរងផលប៉ះពាល់ ដើម្បីជំរុញការផ្ទៀងផ្ទាត់ទិន្នន័យសម្រាប់ជាមូលដ្ឋានរឹងមាំ ក្នុងការអនុវត្តកម្មវិធីអន្តរាគមន៍នេះ ឱ្យចំគោលដៅ និងមានប្រសិទ្ធភាពខ្ពស់។ នេះបើតាមការបញ្ជាក់របស់អគ្គលេខាធិការក្រុមប្រឹក្សាជាតិគាំពារសង្គមដដែល។

តាមការកត់ត្រារបស់ក្រសួងមហាផ្ទៃកម្ពុជា ត្រឹមថ្ងៃទី១០ ខែកុម្ភៈ មានផ្ទះសម្បែងជិត១ពាន់ខ្នងរបស់ពលរដ្ឋខ្មែរស្លូតត្រង់ សាលារៀនចំនួន២៦ មន្ទីរពេទ្យ/មណ្ឌលសុខភាព១៤ សំណង់អគារ៤២ វត្តអារាម១៩ សាលាឆទាន១ រូបសំណាក២ រថយន្ត១ គ្រឿង ប្រាសាទបុរាណ៤ ស្ពាន៥ ផ្សារ១ ផ្លូវ៨៧ ប្រព័ន្ធផ្គត់ផ្គង់អគ្គិសនី១ទីតាំង និងបណ្តាញបញ្ជូនអគ្គិសនី៣កន្លែង នៅតាមខេត្តជាប់ព្រំដែនកម្ពុជា-ថៃ បានរងការខូចខាតយ៉ាងដំណំចាប់តាំងពីថ្ងៃទី៧ ខែធ្នូ ឆ្នាំ២០២៥ មក ព្រោះទង្វើវាយប្រហារដោយប្រើសព្វាវុធធុនធ្ងន់ និងការទម្លាក់គ្រាប់បែកពីយន្តហោះចម្បាំង ពីសំណាក់កងទ័ពថៃឈ្លាន៕

ដោយ៖ ង៉ិល ណារ៉ាត់