ព័ត៌មានជាតិ

ឆ្នាំ ២០២៥ ខេត្តកំពង់ស្ពឺទទួលបានគម្រោងវិនិយោគច្រើនជាងគេឈរលំដាប់លេខ ១ ខណៈខេត្តស្វាយរៀងឈរលេខរៀងទី ២

បានផុស

៥ ខែ មុន

នៅ

ថ្ងៃអង្គារ ១៧ កុម្ភៈ ២០២៦

ដោយ

របាយការណ៍ពីក្រុមប្រឹក្សាអភិវឌ្ឍន៍កម្ពុជាបានបង្ហាញថា នៅឆ្នាំ ២០២៥ ខេត្តកំពង់ស្ពឺទទួលបានគម្រោងវិនិយោគច្រើនជាងគេ ខណៈខេត្តស្វាយរៀងទទួលបានគម្រោងវិនិយោគឈរនៅលំដាប់លេខរៀងទី ២។

នៅក្នុងឆ្នាំ ២០២៥ ខេត្តកំពង់ស្ពឺទទួលបានគម្រោងវិនិយោគចំនួន ១៤២ គម្រោង បើប្រៀបធៀបខេត្តស្វាយរៀងដែលឈរលេខ ២ ទទួលបានគម្រោងវិនិយោគ ១៣៩ គម្រោង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងរបាយការណ៍ដដែលបានបញ្ជាក់ថា ភ្នំពេញដែលជាមជ្ឍមណ្ឌលសេដ្ឋកិច្ចក៏ទទួលបានគម្រោងវិនិយោគច្រើនចំនួន ៧៦ គម្រោង ខណៈខេត្តតាកែវដែលនៅមិនឆ្ងាយពីរាជធានីភ្នំពេញទទួលបានគម្រោងវិនិយោគ ៦៤ គម្រោងឈរចំណាត់ថ្នាក់ទី ៤។

យ៉ាងណាមិញ ក្នុងរបាយការណ៍បានបង្ហាញថា ក្នុងចំណោម ២៥ រាជធានីខេត្ត មានខេត្តចំនួន ៣ ដែលមិនទទួលបានគម្រោងវិនិយោគគឺខេត្តសៀមរាប ព្រះវិហារ និងខេត្តឧត្តរមានជ័យ។

នៅឆ្នាំ ២០២៥ កម្ពុជាបានបំបែកកំណត់ត្រាប្រវត្តិសាស្ត្រ ជាមួយការអនុម័តគម្រោងវិនិយោគសរុបចំនួន ៦៣០ គម្រោង (ធៀបនឹង ៤១៤ គម្រោងនៅឆ្នាំ២០២៤) ដែលមានទុនវិនិយោគសរុបជិត ១០ ប៊ីលានដុល្លារអាមេរិក និងបានបង្កើតឱកាសការងារបានប្រមាណ ៤០ ម៉ឺនកន្លែង។ មុខសញ្ញាណវិនិយោគសំខាន់ៗមានលើវិស័យឧស្សាហកម្ម, គ្រឿងបន្លាស់, និងការកែច្នៃ។

លោក ស៊ុន ចាន់ថុល អនុប្រធានទី ១ ក្រុមប្រឹក្សាអភិវឌ្ឍន៍កម្ពុជាបានគូសបញ្ជាក់ថា នេះជាសមិទ្ធផលខ្ពស់បំផុតក្នុងរយៈពេលជាង ៣០ ឆ្នាំ ដែលកម្ពុជាអនុម័ត្រគម្រោងវិនិយោគច្រើនបំផុតមិនធ្លាប់មានដែលបញ្ជាក់ពីភាពរឹងមាំនៃសេដ្ឋកិច្ចកម្ពុជា និងការទាក់ទាញវិនិយោគិនបរទេស៕