គិតត្រឹម០២សប្តាហ៍ ក្រសួងមហាផ្ទៃទទួលពាក្យបណ្ដឹងជាង៦០ តាមប្រព័ន្ធអនឡាញ

ក្រោយការដាក់ឲ្យដំណើរការផ្លូវការ នៃការទទួលបណ្ដឹងតាមប្រព័ន្ធអនឡាញ អស់រយៈពេល០២សប្តាហ៍កន្លងមក ក្រសួងមហាផ្ទៃ ទទួលបានបណ្ដឹងជាង៦០បណ្ដឹង ក្នុងក្របខណ្ឌរបស់ខ្លួន ដោយមានទាំងពលរដ្ឋ និងមន្ត្រីរាជការ។

លោកបណ្ឌិត ទូច សុខៈ អ្នកនាំពាក្យរងក្រសួងមហាផ្ទៃ បានឲ្យដឹងថា ៖ បច្ចុប្បន្ននេះបណ្ដឹងទាំងជាង៦០ដែលអគ្គារលេខាធិការដ្ឋានក្រសួងមហាផ្ទៃទទួលបាន មានបណ្ដឹងពីពលរដ្ឋមានប្តឹងពលរដ្ឋដូចគ្នា ចំនួន២៤បណ្ដឹង , ពលរដ្ឋប្ដឹងមន្ត្រីរាជការ នៃក្របខណ្ឌក្រសួងមហាផ្ទៃ ចំនួន០៦បណ្ដឹង , ពលរដ្ឋប្ដឹងអង្គភាពដែលឋិតក្រោមរចនាសម្ព័ន្ធរបស់ក្រសួងមហាផ្ទៃ លើការផ្តល់សេវាធារណៈមិនបានល្អប្រសើរចំនួន០៣បណ្ដឹង , ករណីមន្ត្រីរាជការ ប្ដឹងមន្ត្រីដូចគ្នា ពាក់ព័ន្ធការអនុវត្តតួនាទីភារកិច្ចមិនបានត្រឹមត្រូវ និងរំលោភសិទ្ធិមន្ត្រីដូចគ្នា ចំនួន០៣បណ្ដឹង , បណ្ដឹងស្ទួនគ្នាចំនួន១៧បណ្ដឹង , និងបណ្ដឹងដែលគ្មានប្រភពច្បាស់លាស់ត្រឹមត្រូវ គឺមាន១០បណ្ដឹង

លោកបណ្ឌិត ទូច សុខៈ អ្នកនាំពាក្យរងក្រសួងមហាផ្ទៃ

ប្រជាពលរដ្ឋប្រុសស្រី បានសម្តែងការគាំទ្រ ចំពោះការរៀបចំរបស់ក្រសួងមហាផ្ទៃ ដែលវាជាឱកាសដែលអាចឲ្យពួកគាត់ រាយការណ៍ដល់មន្ត្រីថ្នាក់ជាតិ អំពីបញ្ហាដែលកើតមាន មិនថាជាបញ្ហាជាមួយពលរដ្ឋដូចគ្នា ឬជាមួយមន្ត្រីតាមមូលដ្ឋាន ។ ពលរដ្ឋ បន្ថែមថាការទទួលបណ្តឹងអនឡាញនេះទៀតសោត វាក៏ជាដំណរតភ្ជាប់ភាពស្និទ្ធិស្នាលរវាងមន្ត្រីរដ្ឋបាលថ្នាក់ជាតិ ជាមួយពលរដ្ឋសាមញ្ញបានយ៉ាងល្អប្រសើរ ដោយមិនប្រកាន់និន្នាការមនុស្សគ្រប់ស្រទាប់វណ្ណៈផងដែរ។

គួររំលឹកថា ក្រសួងមហាផ្ទៃ កាលពីថ្ងៃទី១៩ ខែកុម្ភៈ ឆ្នាំ២០២៦ បានចេញសេចក្តីជូនដំណឹងលើការដាក់ឲ្យប្រើប្រាស់ជាផ្លូវការប្រព័ន្ធទទួលបណ្តឹងអនឡាញ ដែលហៅជាភាសាអង់គ្លេសថា Complain Submission System ( CSS ) ដើម្បីបង្ក លក្ខណៈងាយស្រួលក្នុងការជួយពន្លឿននីតិវិធីដោះស្រាយ និងឆ្លើយតបជូនប្រជាពលរដ្ឋបានឆាប់រហ័សសំដៅដល់ការដោះស្រាយបណ្ដឹងតវ៉ា និងបណ្តឹងបរិហារបស់ប្រជាពលរដ្ឋពាក់ព័ន្ធសមត្ថកិច្ចនឹងសកម្មភាព របស់មន្ត្រីរាជការក្របខណ្ឌក្រសួងមហាផ្ទៃ និងដើម្បីអង្កេតស្រាវជ្រាវ ស្វែងរកយុត្តិធម៌ ភាពស្អាតស្អំជូនភាគីពាក់ព័ន្ធ៕ អត្ថបទ៖ សុភា