ព័ត៌មានជាតិ

ឧបនាយករដ្ឋមន្រ្តី ហ៊ុន ម៉ានី៖ យានយន្តអគ្គិសនីមានកំណើនស្ទុះប្រើប្រាស់ខ្លាំងនៅក្នុងប្រទេសកម្ពុជា

បានផុស

៤ ខែ មុន

នៅ

ថ្ងៃសៅរ៍ ៧ មីនា ២០២៦

ដោយ

ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្ត្រីក្រសួងមុខងារសាធារណៈបានមើលឃើញពីកំណើននៃការប្រើប្រាស់យានយន្តអគ្គិសនីនៅក្នុងប្រទេសកម្ពុជា ដែលកំពុងមានតម្រូវការយ៉ាងខ្លាំងនៅប៉ុន្មានឆ្នាំចុងក្រោយនេះ។

ថ្លែងនៅក្នុងកម្មវិធីបើកពិព័រណ៍រថយន្តឆ្នាំ ២០២៦ នៅមជ្ឍមណ្ឌល ដឺ ព្រីមៀ សែនសុខកាលពីម្សិលមិញនេះ ឯកឧត្តម ហ៊ុន ម៉ានីបានថ្លែងថា គិតមកដល់បំណាច់ឆ្នាំ ២០២៥ នេះ យានយន្តអគ្គិសនីដែលបានចុះបញ្ជីបានកើនដល់ ១២ ៩៦៨ ម៉ឺនគ្រឿង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការកើនឡើងនេះស្របពេលដែលរដ្ឋាភិបាលកម្ពុជា បានដាក់ចេញគោលនយោបាយលើកទឹកចិត្តសម្រាប់ការប្រើប្រាស់យានយន្តអគ្គិសនី ដើម្បីកាត់បន្ថយការបំពុលដល់បរិយាកាស។

ទិន្នន័យពីក្រសួងសាធារណការនិងដឹកជញ្ជូន ក៏បានបង្ហាញពីកំណើនការចុះបញ្ជីយានយន្តអគ្គិសនីក្នុងឆ្នាំ ២០២៥ ដែលមានការកើនឡើងយ៉ាងខ្លាំងបើធៀបឆ្នាំ ២០២៤។

របាយការណ៍បូកសរុបលទ្ធផលការងាររបស់ក្រសួងសាធារណការ និងដឹកជញ្ជូនបានបង្ហាញថា នៅក្នុងឆ្នាំ ២០២៥ ក្រសួងបានចុះបញ្ជីយានយន្តដើរដោយថាមពលអគ្គិសនី (EV) មានចំនួន ៧ ៩៧១ គ្រឿង កើនឡើង ១២៧% ធៀបនឹងឆ្នាំ ២០២៤ ដែលមានចំនួន ៣ ៥០៨ គ្រឿង។

គោលនយោបាយជាតិស្តីពីការអភិវឌ្ឍវិស័យយានយន្តអគ្គិសនី ២០២៤-២០៣០ របស់រដ្ឋាភិបាលបានដើរតួនាទីជាផែនទីបង្ហាញផ្លូវ សម្រាប់ការវិនិយោគ និងជំរុញការប្រើប្រាស់និងការអភិវឌ្ឋប្រព័ន្ធអេកូឡូស៊ីយានយន្តអគ្គិសនីជាជំហានៗផ្អែកលើយន្តការទីផ្សារ។

ប្រទេសកម្ពុជាបានចុះបញ្ជីយានយន្តអគ្គិសនីដំបូងក្នុងអំឡុងឆ្នាំ ២០១៨ ដែលកាលណោះមានរថយន្តអគ្គីសនីតែ ១ គ្រឿងគត់ ដែលបានចុះបញ្ជីនៅក្រសួងសាធារណការ និងដឹកជញ្ជូន។ កំណើនការប្រើប្រាស់យានយន្តអគ្គិសនីក្នុងប្រទេសកម្ពុជា ក៏ស្របនិន្នាការកំណើនការប្រើប្រាស់យានយន្តអគ្គិសនីលើសកលលោកផងដែរ។

លោក ផន រឹម មន្រ្តីអ្នកនាំពាក្យក្រសួងសាធារណការ និងដឹកជញ្ជូនបានបញ្ជាក់ថា យានយន្តអគ្គិសនី (Electric Vehicle-EV) សំដៅដល់យានយន្តដើរដោយម៉ូទ័រអគ្គិសនី និងប្រើប្រាស់អាគុយសម្រាប់ស្តុកថាមពល។

យានយន្តអគ្គិសនីបែងចែកជា ៣ ប្រភេទ។ ១/-ប្រភេទប្រើប្រាស់អគ្គិសនីសុទ្ធ (Battery Electric Vehicle-BEV ) ២/-ប្រភេទប្រើប្រាស់ប្រេងឥន្ធនៈ និងអាគុយ (Hybrid Electric Vehicle-HEV) និង ៣/-ប្រភេទប្រើប្រាស់ប្រេងឥន្ធនៈ និងអាគុយ តែអាចបញ្ចូលថាមពលដូចយានយន្តអគ្គិសនីសុទ្ធបាន (Plug-In HEV-PHEV)។

បើតាមមន្រ្តីអ្នកនាំពាក្យក្រសួងសាធារណការ និងដឹកជញ្ជូន យានយន្តអគ្គិសនី (EV) បានក្លាយជាមធ្យោបាយធ្វើដំណើរដ៏ពេញនិយមមួយនាពេលបច្ចុប្បន្ននេះ ខណៈយានយន្តនេះក្រៅពីជួយសន្សំសំចៃថវិកា ក៏ផ្តល់អត្ថប្រយោជន៍ជាច្រើនសម្រាប់បរិស្ថាន៕