ព័ត៌មានជាតិ

រដ្ឋសភាគ្រោងបញ្ចប់ការធ្វើទំនើបកម្មទៅជាសភាឌីជីថលនៅពាក់កណ្ដាលខែមេសា

បានផុស

៤ ខែ មុន

នៅ

ថ្ងៃពុធ ១១ មីនា ២០២៦

ដោយ

ការប្រើប្រាស់ប្រព័ន្ធឌីជីថលសម្រាប់កិច្ចការរដ្ឋបាល និងការដាក់ឱ្យប្រើប្រាស់ App រដ្ឋសភាកម្ពុជា រួមទាំងការប្រើប្រាស់ AI សម្រាប់ធ្វើកំណត់ហេតុកិច្ចប្រជុំសភានឹងដាក់ឱ្យប្រើប្រាស់នៅពាក់កណ្ដាលខែមេសា ដើម្បីសម្រួលដល់ការងារអ្នកតំណាងរាស្ត្រ ក៏ដូចជាផ្ដល់ព័ត៌មានដល់ប្រជាពលរដ្ឋបានទាន់ពេលវេលា។ នេះជាការបញ្ជាក់របស់នាយខុទ្ទកាល័យប្រធានសភា និងជាអគ្គលេខាធិការរងប្រចាំការរដ្ឋសភាលោក កែវ ពិសិដ្ឋ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងប្រាប់ក្រុមអ្នកយកព័ត៌មានកាលពីថ្ងៃទី១០ ខែមីនា ឆ្នាំ២០២៦ លោក កែវ ពិសិដ្ឋ បានឱ្យដឹងថាតាមរយៈជំនួយបច្ចេកទេសពីសភាបារាំង ការកែទម្រង់ទៅជាសភាឌីជីថលរបស់កម្ពុជាគ្រោងនឹងបញ្ចប់នៅពាក់កណ្ដាលខែមេសាខាងមុខ។ លោកបានឱ្យដឹងថាការរៀបចំនឹងសម្រួលដល់ពលរដ្ឋឱ្យទទួលបានព័ត៌មានឆាប់រហ័សពីសភា រួមទាំងផ្ដល់ភាពងាយស្រួលក្នុងការតាមរកឯកសារផ្សេងៗដែលទាក់ទងនឹងសភាតាំងពីបង្កើតដំបូងមកដល់ពេលបច្ចុប្បន្នផងដែរ។

លោកថា៖ «យើងសង្ឃឹមថាដាក់ឱ្យប្រើប្រាស់ជាផ្លូវការនៅពាក់កណ្ដាលខែ៤នេះហើយ»។

លោកក៏បានបន្ថែមផងដែរថាប្រព័ន្ធថ្មីនេះក៏មានផងដែរការប្រើប្រាស់ AI សម្រាប់ធ្វើកំណត់ហេតុនៃកិច្ចប្រជុំសភា ដែលជួយកាត់បន្ថយពេលវេលា និងការប្រើប្រាស់មនុស្សផងដែរ។

ដោយឡែកសម្រាប់ការគ្រប់គ្រងកិច្ចការរដ្ឋបាលវិញសភាជាតិបានដាក់ប្រើប្រាស់រួចហើយដែលមានទាំងការស្កេនវត្តមានបុគ្គលិក ការប្រើប្រាស់ឯកសារឌីជីថល និងប្រព័ន្ធតាមដានការងារបុគ្គលិកផងដែរ។

ជាការកត់សម្គាល់ ក្រោយពីសម្ដេចសភាធិបតី ឃួន សុដារី កាន់ការងារជាប្រធានសភាកាលពីឆ្នាំ២០២៣កន្លងសម្ដេចបានសម្រេចឱ្យធ្វើកំណែទម្រង់សភាកម្ពុជាទៅជាសភាឌីជីថល ដើម្បីឱ្យស្របតាមការរីកចម្រើនរបស់សង្គមជាតិ គោលនយោបាយរាជរដ្ឋាភិបាលនិងបច្ចេកវិទ្យា។

បើតាមលោក កែវ ពិសិដ្ឋ ការចាប់ផ្ដើមធ្វើកំណែទម្រង់ទៅជាសភាឌីជីថលនេះគឺមានគោលដៅដើម្បីលើកកម្ពស់ការងាររបស់អគ្គលេខាធិការដ្ឋានដើម្បីធ្វើជាជំនួយដល់អ្នកតំណាងរាស្ត្រធ្វើយ៉ាងណាផ្ដល់សេវាកម្មជូនប្រជាជនដែលជាម្ចាស់ឆ្នោតកាន់តែមានប្រសិទ្ធភាព៕

អត្ថបទដោយ ហ៊ុន សិរីវឌ្ឍន៍