ព័ត៌មានជាតិ

ខេត្តស្ទឹងត្រែងជាប់ដងទន្លេ មានកោះសក្តានុពលប្រមាណ ១០ ជាគោលដៅទេសចរទៅកម្សាន្ត

បានផុស

៣ ខែ មុន

នៅ

ថ្ងៃសុក្រ ២៧ មីនា ២០២៦

ដោយ

ខេត្តស្ទឹងត្រែងដែលស្ថិតនៅតាមដងទន្លេមេគង្គលើមានកោះសក្តានុពលប្រមាណ ១០ ជាគោលដៅដែលទេសចរអាចទៅកម្សាន្តបាន។

លោក សរ សុពុត្រា អភិបាលនៃគណៈអភិបាលខេត្តស្ទឹងត្រែងបានឲ្យដឹងថា កោះតាមដងទន្លេនៅក្នុងខេត្តស្ទឹងត្រែងមានមិនដល់ ១០ នោះទេ ដែលអាចឲ្យភ្ញៀវទេសចរទៅកម្សាន្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

«កោះមួយចំនួនអាជ្ញាធរមិនអនុញ្ញាតឱ្យប្រជាពលរដ្ឋឬភ្ញៀវទេសចរចូលទៅលេងឡើយ មូលហេតុគឺដោយសារតែកោះទាំងនោះស្ថិតនៅចំលំហូរនៃទំនប់វារីអគ្គិសនី ដែលមានស្ថានភាពទឹកឡើងចុះប្រែប្រួលខ្លាំងនិងមិនទៀងទាត់»។

លោកអភិបាលខេត្តថា នៅពេលមានការបង្ហើបទ្វារទឹក ទឹកនឹងបុកមកខ្លាំងដែលអាចបង្កគ្រោះថ្នាក់ដល់អ្នកដែលកំពុងសម្រាក ឬបោះតង់នៅលើកោះ។

ពាក់ព័ន្ធតួលេខកោះតាមដងទន្លេក្នុងខេត្តស្ទឹងត្រែង លោក សរ សុពុត្រា ឆ្លើយតបថា មិនមានតួលេខជាផ្លូវការនោះទេ។

តាមការស្រាវជ្រាវរបស់ក្រុមការងារជំនាញមកពីមន្ទីរទេសចរណ៍ មន្ទីរធនធានទឹក និងមន្ទីរសាធារណការបានបង្ហាញថា កោះមួយចំនួនមានលក្ខណៈមិនទៀងទាត់។

«កោះខ្លះអាចមើលឃើញនៅឆ្នាំនេះ ប៉ុន្តែនៅឆ្នាំក្រោយអាចនឹងបាត់ទៅវិញ ឬចល័តផ្លាស់ទីកន្លែងដូចជាប្រភេទកោះត្រឹប។ កត្តានេះហើយដែលធ្វើឱ្យគេមិនអាចកំណត់ចំនួនកោះឱ្យបានច្បាស់លាស់ និងប្រាកដប្រជា»។ លោក សរ សុពុត្រា បញ្ជាក់។

ខេត្តស្ទឹងត្រែងនៅភាគឦសានមានលក្ខណៈភូមិសាស្ត្រអំណោយផលល្អមានភូមិសាស្ត្រជាប់ដងទន្លេចំនួន ៤ គឺទន្លេមេគង្គ ទន្លេសាន ទន្លេស្រែពក និងទន្លេកុង។

ខេត្តស្ទឹងត្រែងមានសហគមន៍អេកូទេសចរណ៍ចំនួន ០៦ កន្លែង មានសហគមន៍អេកូទេសចរណ៍បូរីអូរស្វាយ សហគមន៍អេកូទេសចរណ៍ព្រះរំកិល សហគមន៍អេកូទេសចរណ៍សម្រស់កោះហាន សហគមន៍អេកូទេសចរណ៍អូរឫស្សីកណ្តាល សហគមន៍អេកូទេសចរណ៍កោះព្រះ និងសហគមន៍អេកូទេសចរណ៍ភ្នំជម្រកសត្វ។

ក្រៅពីនេះក៏មានរមណីយដ្ឋានទេសចរណ៍ធម្មជាតិ និងកែច្នៃជាច្រើនកន្លែងទៀតជាគោលដៅទេសចរមកកម្សាន្តគ្រប់រដូវកាល៕