បុណ្យទន្លេ​ខេត្ត​ក្រចេះ មានពិធីដាំ​ដើមធ្នង់​ជា​ផ្នែក​គាំទ្រ​បរិស្ថាន និងអេកូឡូស៊ីក្នុងវិស័យទេសចរណ៍

ដើមឈើធ្នង់ត្រូវ​បាន​ដាំ​ ដើម្បីទុកជាអនុស្សាវរីយ៍ក្នុងព្រឹត្តិការណ៍បុណ្យទន្លេលើកទី១០ នៅក្នុងខេត្តក្រចេះ ក្រោមអធិបតីលោក ហួត ហាក់ រដ្ឋមន្ត្រីក្រសួងទេសចរណ៍ និងលោកជំទាវ លោក វ៉ា ថន អភិបាលខេត្តនៅទីតាំងខាងមុខពហុកីឡដ្ឋាន​​ខេត្តក្រចេះ នាព្រឹកថ្ងៃទី២៩ ខែមិនា ឆ្នាំ២០២៦នេះ។

ជាមួយគ្នានេះ ​ពលរដ្ឋ​និង​សិស្សានុសិស្ស​រស់នៅក្នុងក្រុងក្រចេះយល់ឃើញ​ថា ការដាំដើឈើគឺមានអត្ថប្រយោជន៍ដើម្បីបង្កើតជាតំបន់អេកូទេសរចណ៍នៅក្នុងខេត្តក្រចេះ។

យុវជន យុវនារី សិស្សានុសិស្សបានបង្ហាញការយល់ដឹងអំពីសារៈប្រយោជន៍នៃការដាំដើមឈើយ៉ាងដូច្នេះថា ដោយសារផែនដីសព្វថ្ងៃមានបញ្ហាកង្វះព្រៃឈើ បង្កជាបញ្ហាកើនឡើងកម្ដៅ ការប្រែប្រួល​អាកាសធាតុ កម្តៅ​ស្ងួត​ នៅពេលដាំដើមឈើឡើងវិញនៅតាមទីសាធារណៈ តាម​ដងផ្លូវក្នុងសហគមន៍ និងនៅតាមលំនៅដ្ឋានធ្វើ​​ឲ្យ​​បរិយាកាសសំបូរដោយឧស្ម័នអុកស៊ីសែន ងាយស្រួលដកដង្ហើម ផ្ដល់ជាម្លប់ត្រជាក់ បង្កើនសោភណ្ឌ័ភាពតាមដងផ្លូវពោរពេញដោយពណ៏បៃតង។

ពាក់ព័ន្ធ​ការរៀបចំឲ្យមានព្រឹត្តិការណ៍បុណ្យទន្លេលើកទី ១០ នៅខេត្តក្រចេះ ធ្វើឲ្យពលរដ្ឋក្នុងខេត្តក្រចេះក៏ដូចជានៅបណ្តាខេត្តនានាក្នុងប្រទេសកម្ពុជាបានចូលរួម​សប្បាយរីករាយ ពីព្រោះខេត្តក្រចេះជាខេត្តមួយដ៏តូចនិងពុំសូវមានប្រជាប្រិយភាពដូចខេត្តមួយ​ចំនួនទៀតនោះទេ នៅពេលខេត្តក្រចេះមានព្រឹត្តិការណ៍បុណ្យទន្លេនេះឡើង បានស្រូបយកនឹងទាក់ទាញភ្ញៀវទេសចរណ៍​ជាតិ និងអន្តរជាតិមកទស្សនា​កម្សាន្ត​ដោយភាពសប្បាយរីករាយយ៉ាងច្រើន។

ទន្ទឹមនឹងនេះ តាម​រយៈការ​រៀបចំ​ព្រឹត្តិការណ៍​នេះ​ក៏​បាន​ចូលរួមផ្សព្វផ្សាយពីវប្បធម៌ ធនធាន ម្ហូបអាហារប្រពៃណី របាំប្រពៃណី និងកន្លែងទេសចរណ៍ប្រចាំខេត្តក្រចេះ​កាន់​ផុលផុសថែមទៀត៕

អត្ថបទ៖ ប្រុញ វិធិន