កូនដំរី “ណូអែល”អាយុទើប៤ឆ្នាំ ត្រូវជនអនាមិកបាញ់ព្រួញប៉ុនប៉ងសម្លាប់ នៅខេត្តរតនគិរី

ខេត្តរតនគិរី៖ កូនដំរីស្រុកឈ្មោះ “ណូអែល” អាយុ ៤ឆ្នាំ ដែលស្ថិតក្រោមការគ្រប់គ្រងរបស់សមាគមអៃរាវត្តា ត្រូវបានជនអនាមិកបាញ់ព្រួញប៉ុនប៉ងសម្លាប់ ដោយបាញ់ចំរាងកាយចំនួន ២កន្លែង ខណៈកំពុងស៊ីចំណីនៅក្នុងព្រៃសហគមន៍។

តាមការបញ្ជាក់ពីអ្នកស្រី ខៃ ចិន្តា ប្រធានសមាគមអៃរាវត្តា ហេតុការណ៍នេះបានកើតឡើងកាលពីថ្ងៃទី៣១ ខែមីនា ឆ្នាំ២០២៦ ប្រហែលម៉ោង ៤:៣០ នាទីរសៀល នៅក្នុងព្រៃសហគមន៍ ស្ថិតក្នុងភូមិកាទៀង ឃុំល្បាំងពីរ ស្រុកលំផាត់ ខណៈហ្មដំរីឈ្មោះ លោក អ៊ិលអេន បាននាំមេដំរី “អ៊ីកែវ” និងកូនដំរី “ណូអែល” ទៅរកស៊ីចំណី។ លុះដល់ព្រឹកថ្ងៃទី១ ខែមេសា ឆ្នាំ២០២៦ ពេលហ្មដំរី (អ្នកថែទាំដំរី)ត្រឡប់ទៅយកដំរីវិញ បានប្រទះឃើញកូនដំរី “ណូអែល” មានព្រួញជាប់នៅតំបន់ពោះ បង្ហាញពីសកម្មភាពបាញ់ប៉ុនប៉ងសម្លាប់ពីជនមិនស្គាល់អត្តសញ្ញាណ។

ភ្លាមៗនោះ ហ្នដំរី អ៊ិលអេន បានប្រញាប់ដកគ្រាប់ព្រួញនោះចេញ ប៉ុន្តែវាមិនមែនជាព្រួយឈើធម្មតាទេ គឺជាព្រួញចំនួន ២ ដើម ដែលត្រូវបានបាញ់ដោយជនអនាមិក។ បន្ទាប់មក ក្រុមការងារបានចូលរួមសង្គ្រោះបឋម និងនាំយកមេដំរី អ៊ីកែវ និងកូនដំរី ណូអែល ទៅកាន់ដែនជម្រកដំរី អៃរាវត្តា។ យ៉ាងណាមិញ ហេតុការណ៍បាញ់ប្រហារនេះមិនបានបណ្ដាលឱ្យដំរីស្លាប់នោះទេ ព្រោះក្រុមការងារបានជួយសង្គ្រោះទាន់ពេលវេលា។

បន្ទាប់ពីបញ្ចប់ការសង្គ្រោះ អ្នកស្រី ខៃ ចិន្តា និងលោក ព្យែរ យុគន្ធរ អនុប្រធានទទួលបន្ទុកផ្នែកប្រតិបត្តិ បានដាក់ពាក្យបណ្តឹងនៅប៉ុស្តិ៍នគរបាលរដ្ឋបាល ឃុំល្បាំង ស្រុកលំផាត់  ភ្ជាប់ទៅជាមួយភស្តុតាងឃ្លីបវីដេអូដែលបានថតទុក និងរបាយការណ៍ពាក់ព័ន្ធ។ ក្នុងពាក្យបណ្តឹងនោះ សំណូមពរសមត្ថកិច្ចវែកមុខជនបង្កយកមកអប់រំ និងធ្វើកិច្ចសន្យាចំពោះមុខច្បាប់និងទាមទារសំណងតាមផ្លូវច្បាប់។

ក្រោយជួបហេតុការណ៍នេះ អ្នកស្រី ខៃ ចិន្តា សម្រេចមិនអនុញ្ញាតឱ្យហ្មដំរី នាំដំរីទាំង៤ទៅដើរលេងស៊ីចំណីក្នុងព្រៃសហគមន៍ជាបណ្តោះអាសន្ន ប្តូរដោយម៉ៅចំការចេករបស់បងប្អូនប្រជាពលរដ្ឋដើម្បីបំប៉ន និងតាមដានស្ថានការណ៍ ក្រែងមានហេតុការណ៍អ្វីមិនស្រួលកើតឡើងទៀត៕

ដោយ៖ ខៀវ ចាប