ព័ត៌មានជាតិ

គោលនយោបាយពន្ធគយ លើកទឹកចិត្តសហគ្រាសនាំគ្រឿងចក្រទំនើបៗ រុញច្រានតម្លៃផលិតផលលក់ធូរថ្លៃ ប្រកួតប្រជែងលើទីផ្សារ

បានផុស

១ ថ្ងៃ មុន

នៅ

ថ្ងៃអង្គារ ១៤ កក្កដា ២០២៦

ដោយ

ក្នុងក្របខ័ណ្ឌការងារគយ ពាក្យថាគោលនយោបាយពន្ធអាករ (Tariff Policy) គឺសំដៅលើការដំឡើងឬការបន្ថយអត្រាពន្ធលើការនាំចូល។

ការលើកទឹកចិត្តផ្នែកគយជាកញ្ចប់វិធានការផ្នែកសារពើពន្ធ ដែលធ្វើឡើងក្នុងន័យសម្រាលបន្ទុកពន្ធ ដើម្បីគាំទ្រ និងជំរុញការអភិវឌ្ឍវិស័យផលិតកម្មក្នុងស្រុក ជាពិសេសគឺសហគ្រាសធុនតូច និងមធ្យម (SMEs)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហោ ស៊ីណាត

នៅក្នុងកម្មវិធីវេទិកាគយ និងសម្ព័ន្ធសមាគមហ៍សហគ្រាសធុនតូចនិងមធ្យមកម្ពុជា លោក ហោ ស៊ីណាត ជំនួយការនាយកដ្ឋានរដ្ឋាករនៃអគ្គនាយកដ្ឋានគយ និងរដ្ឋាករកម្ពុជាបានពន្យល់ពីដំណើរការការអនុវត្តគោលនយោបាយពន្ធអាករ ដើម្បីគាំទ្រសហគ្រាសក្នុងស្រុក តាមរយៈការអនុគ្រោះនិងសម្រាលបន្ទុកពន្ធនាំចូលវត្ថុធាតុដើម ឬសម្ភារៈបរិក្ខារទំនើបៗ ដើម្បីជួយសហគ្រាសអាចបង្កើនផលិតភាពផលិតកម្ម ធានាបានតម្លៃផលិតផលសមរម្យ សម្រាប់ប្រកួតប្រជែងលើទីផ្សារ។

វិធានការលើកទឹកចិត្តនេះមានគោលបំណងធំៗចំនួន ៣៖

-កាត់បន្ថយថ្លៃដើមផលិតកម្ម៖ តាមរយៈការលើកលែង ឬបន្ធូរបន្ថយពន្ធលើការនាំចូលវត្ថុធាតុដើម និងគ្រឿងម៉ាស៊ីន។
-ជំរុញការប្រើប្រាស់បច្ចេកវិទ្យា និងគ្រឿងចក្រ៖ នៅពេលពន្ធគយមានកម្រិតទាប សហគ្រាស (SMEs) មានលទ្ធភាពទិញគ្រឿងចក្រ និងបច្ចេកវិទ្យាទំនើបៗមកប្រើប្រាស់។
-បង្កើនលទ្ធភាពប្រកួតប្រជែង៖ នៅពេលថ្លៃដើមថោក និងមានបច្ចេកវិទ្យាគ្រប់គ្រាន់ វានឹងជួយបង្កើនទាំងផលិតភាព និងគុណភាពផលិតផលសម្រាប់ប្រកួតប្រជែងលើទីផ្សារ។

យ៉ាងណាមិញ គោលនយោបាយពន្ធគយ ត្រូវធ្វើការថ្លឹងថ្លែងឱ្យបានហ្មត់ចត់ រវាងការចង់បានពន្ធ 0% របស់អ្នកផលិតដើម្បីបានវត្ថុធាតុដើមថោក និងការចង់បានការការពារពន្ធគយរបស់អ្នកដាំដុះក្នុងស្រុកដើម្បីកុំឱ្យទំនិញនាំចូលមកប្រកួតប្រជែង។ ដូច្នេះហើយទើបគេបង្កើត «យន្តការលើកទឹកចិត្តផ្នែកគយ» នេះឡើង ដើម្បីផ្តល់ការអនុគ្រោះឲ្យចំគោលដៅ។

យន្តការគាំទ្ររបស់រាជរដ្ឋាភិបាល

រាជរដ្ឋាភិបាលបានគិតគូរ និងជួយជ្រោមជ្រែងវិស័យផលិតកម្ម និងកសិកម្មជាហូរហែ តាមរយៈការទម្លាក់ពន្ធ ឬការដាក់ជាបន្ទុករដ្ឋលើទំនិញចាំបាច់ដូចជា ពូជ និងជី ជាដើម។

នៅក្នុងវេទិការាជរដ្ឋាភិបាល-ផ្នែកឯកជន លើកទី ១៨ ក្នុងឆ្នាំ២០១៩ រដ្ឋាភិបាលបានប្រកាសដាក់ឱ្យអនុវត្តជាផ្លូវការនូវយន្តការលើកទឹកចិត្តផ្នែកគយសម្រាប់ SMEs។ យន្តការលើកទឹកចិត្តផ្នែកគយនេះ ដើម្បីផ្តល់ការអនុគ្រោះចំគោលដៅ សម្រាប់តែអ្នកណាដែលយកទៅផលិតពិតប្រាកដ។

ការលើកទឹកចិត្តផ្នែកគយត្រូវបានបែងចែកជា ២ យន្តការផ្សេងគ្នា៖

ក. យន្តការក្រោមអនុក្រឹត្យលេខ ៥០ និងប្រកាស ៥៨០ របស់ក្រសួងសេដ្ឋកិច្ច និងហិរញ្ញវត្ថុ

-ការអនុវត្ត៖ សម្រាប់តែសហគ្រាសធុនតូច និងមធ្យម (SMEs) ប៉ុណ្ណោះ។
-អត្ថប្រយោជន៍៖ ផ្តល់ការអនុគ្រោះ ឬលើកលែងពន្ធគយតែមួយមុខ ដោយសម្រេចផ្ទាល់ដោយអគ្គនាយកដ្ឋានគយ និងរដ្ឋាករកម្ពុជា។

ខ. យន្តការក្រោមច្បាប់វិនិយោគ (គម្រោង QIP)

-ការអនុវត្ត៖ មិនកំណត់ទំហំសហគ្រាសឡើយ (ធំ ឬតូច គឺផ្អែកលើវិស័យនិងលក្ខខណ្ឌច្បាប់)។
-អត្ថប្រយោជន៍៖ កញ្ចប់លើកទឹកចិត្តរួមបញ្ចូលទាំងពន្ធគយ និងពន្ធដារ ហើយត្រូវបានសម្រេចដោយក្រុមប្រឹក្សាអភិវឌ្ឍន៍កម្ពុជា (CDC) ឬអនុគណៈកម្មាធិការវិនិយោគរាជធានី-ខេត្ត។

លក្ខខណ្ឌសម្រាប់ SMEs ដើម្បីទទួលបានការលើកទឹកចិត្ត

ដើម្បីទទួលបានការលើកទឹកចិត្តផ្នែកគយ សហគ្រាសត្រូវបំពេញលក្ខខណ្ឌដូចខាងក្រោម៖

-ត្រូវតែចុះបញ្ជីពាណិជ្ជកម្ម និងចុះបញ្ជីពន្ធដារជាដាច់ខាត។
-ត្រូវតែស្ថិតក្នុងវិស័យអាទិភាព។ ផ្អែកតាមអនុក្រឹត្យលេខ ៥០ មានវិស័យអាទិភាពចំនួន ៨ ខុសពីខាងពន្ធដារដែលមានតែ ៦ រួមមាន៖

1/សហគ្រាសផលិត និងផ្គត់ផ្គង់ទឹកស្អាត
2/ការផលិតទំនិញសម្រាប់បម្រើឱ្យការនាំចេញ (កាត់ដេរ និងវាយនភណ្ឌជាដើម)។
3/សហគ្រាសបម្រើឱ្យទីផ្សារក្នុងស្រុក (ផលិតទំនិញប្រើប្រាស់ គ្រឿងឧបភោគបរិភោគ)។
4/ផ្នែកអភិវឌ្ឍន៍តំបន់ប្រមូលផ្តុំ SMEs (SME Cluster)។
5/ផ្នែកស្រាវជ្រាវ និងអភិវឌ្ឍន៍ (R&D) បច្ចេកវិទ្យា និងវិស័យផលិតកម្មអាទិភាពផ្សេងទៀត។

ការលើកទឹកចិត្តមិនផ្តល់ជូនដោយស្វ័យប្រវត្តិនោះទេ សហគ្រាសត្រូវដាក់ពាក្យស្នើសុំមុខទំនិញដែលចង់បានការអនុគ្រោះ តាមរយៈសាខាគយរាជធានី-ខេត្ត។

ក្រុមមុខទំនិញដែលទទួលបានការអនុគ្រោះពន្ធ៖

-ក្រុមទី១ សម្ភារបរិក្ខារផលិតកម្ម៖ គ្រឿងម៉ាស៊ីនដែលប្រើក្នុងខ្សែសង្វាក់ផលិតកម្ម។
-ក្រុមទី២ សម្ភារសំណង់៖ សម្រាប់សាងសង់ទីតាំង ឬសំណង់បម្រើឱ្យការផលិត។
-ក្រុមទី៣ ធាតុចូលផលិតកម្ម៖ វត្ថុធាតុដើម ឬពាក់កណ្តាលសម្រេចដែលយកមកកែច្នៃ។

ការបែងចែកអត្ថប្រយោជន៍តាមសកម្មភាពរបស់ SMEs ៖

១/ SMEs ផលិតទឹកស្អាត និងផលិតសម្រាប់នាំចេញ៖ ទទួលបានការលើកទឹកចិត្តលើមុខទំនិញទាំង ៣ ក្រុម (សម្ភារបរិក្ខារ សម្ភារសំណង់ ធាតុចូលកសិកម្ម។
២/ SMEs ផលិតសម្រាប់ទីផ្សារក្នុងស្រុក និង អ្នកអភិវឌ្ឍតំបន់ប្រមូលផ្តុំ (SME Cluster)៖ ទទួលបានការលើកទឹកចិត្តលើសម្ភារបរិក្ខារផលិតកម្ម និង សម្ភារសំណង់។
៣/ SMEs ផ្នែកស្រាវជ្រាវ និងអភិវឌ្ឍន៍ (R&D)៖ ទទួលបានលើសម្ភារបរិក្ខារផលិតកម្ម។
៤/ SMEs ប្រភេទគាំទ្រ (បន្តសង្វាក់ផលិតកម្មឱ្យសហគ្រាសផ្សេង)៖ ផ្អែកលើសហគ្រាសដែលទិញបន្ត បើយកទៅផលិតសម្រាប់នាំចេញទទួលបានការលើកទឹកចិត្តទាំង ៣ ក្រុម។ បើផ្គត់ផ្គង់ឱ្យសហគ្រាសលក់ក្នុងស្រុកទទួលបាន ២ ក្រុម (បរិក្ខារផលិតកម្ម និងសម្ភារសំណង់)។

នីតិវិធីនៃការស្នើសុំ

ការដាក់ពាក្យស្នើសុំ បច្ចុប្បន្នកំពុងអនុវត្តជាទម្រង់ឯកសារក្រដាសស្នាម (Manual) ប៉ុន្តែគយគ្រោងដាក់ឱ្យប្រើប្រាស់ប្រព័ន្ធស្វ័យប្រវត្តកម្មនៅចុងត្រីមាសទី៣ ឬដើមត្រីមាសទី ៤ ឆ្នាំ ២០២៦។

រយៈពេលពិនិត្យ តាមច្បាប់គឺយ៉ាងយូរ ១០ ថ្ងៃ ប៉ុន្តែការអនុវត្តជាក់ស្តែងប្រើពេលតែ ២ ទៅ ៣ ថ្ងៃប៉ុណ្ណោះ។ SMEs អាចដាក់ពាក្យតាមរយៈសាខាគយរាជធានី-ខេត្តដែលខ្លួនស្ថិតនៅ។

កាតព្វកិច្ចរបស់សហគ្រាស

ដើម្បីធានាតម្លាភាពនិងទប់ស្កាត់ការកេងបន្លំ សហគ្រាសដែលទទួលបានការអនុគ្រោះពន្ធមានកាតព្វកិច្ច៖

-ត្រូវកាន់កាប់បញ្ជីស្នាម និងឯកសារនាំចូលឱ្យបានត្រឹមត្រូវ។
-មិនត្រូវយកទំនិញដែលរួចពន្ធទៅលក់បន្ត ឬប្រើប្រាស់ខុសគោលដៅផលិតកម្មដោយចិត្តឯងបានឡើយ។ ករណីចង់ធ្វើការផ្ទេរ ឬលក់គ្រឿងចក្រ សម្ភារដែលបាននាំចូលដោយរួចពន្ធទាំងនោះ ត្រូវតែសុំការអនុញ្ញាតជាមុនពីអគ្គនាយកដ្ឋានគយ និងរដ្ឋាករកម្ពុជាជាដាច់ខាត៕