សាលាដំបូងរាជធានី​ បន្តការសាកសួរកញ្ញា មាន ពេជ្ររីតា នៅព្រឹកនេះ

ប្រភពព័ត៌មានពីសាលាដំបូងបានបញ្ជាក់ឲ្យដឹងថា ចៅក្រមសើបសួរលោក កូយ សៅ បានបន្តនីតិវិធីសាកសួរបន្ថែមទៀតលើកញ្ញា មាន ពេជ្ររីតា ពាក់ព័ន្ធនឹងបណ្ដឹងព្រហ្មទណ្ឌ ប្ដឹងទៅ ប្ដឹងមក ជាមួយលោកឧកញ៉ា ហេង សៀ ដែលកំពង់ព្យាបាលរបួសនៅមន្ទីរពេទ្យ ។

កញ្ញា ជាជនជាប់ចោទផង និងជាដើមបណ្ដឹងផង ត្រូវបានអនុរ័ក្សពន្ធនាគារដឹកបញ្ជូនមកកាន់តុលាការតាំងពីម៉ោង៦​ព្រឹកថ្ងៃទី១៣ ខែឧសភា ឆ្នាំ២០២១ ប្រគល់ឲ្យចៅក្រមសើបសួរបន្តនីតិវិធី ។ ក្នុងនោះផងដែរគេបានឃើញម្ដាយរបស់ជនជាប់ចោទបានមកតុលាការលើកទឹកចិត្តកូនដើម្បីកុំឲ្យភិតភ័យផងដែរ ។

ការបន្តសាកសួរនេះធ្វើឡើងក្រោយពីចៅក្រមសើបសួរបានផ្អាកការសើបសួរកាលពីយប់មិញ ហើយបង្គាប់ឲ្យអនុរ័ក្សពន្ធនាគារនាំយកកញ្ញាជាជនជាប់ចោទទៅឃុំខ្លួនវិញ លុះព្រឹកឡើងទើបបញ្ជូនមកតុលាការវិញ ។
រហូតមកដល់ថ្មើនេះនៅពុំទាន់មានការសម្រេចជាផ្លូវការលើជោគវាសនា កញ្ញា មាន ពេជ្ររីតា ពីសំណាក់ចៅក្រមសើបសួរនៅឡើយ ៕

អត្ថបទ ៖ មករា