ព័ត៌មានជាតិ

កម្ពុជានិងអាស៊ានរួមគ្នារកដំណោះស្រាយទប់ស្កាត់ការឆ្លងរាលដាលនៃជំងឺកូវីដ ១៩នៅកន្លែងធ្វើការ

បានផុស

៥ years មុន

នៅ

ថ្ងៃសុក្រ ២៨ ឧសភា ២០២១

ដោយ

ភ្នំពេញ ៖ ប្រទេសកម្ពុជានិងបណ្តាប្រទេសអាស៊ាន៩ប្រទេសផ្សេងទៀតបានរួមគ្នារិះរកមធ្យោបាយនិងដំណោះស្រាយដើម្បីទប់ស្កាត់ការឆ្លងរីករាលដាលនៃជំងឺកូវីដ ១៩នៅកន្លែងធ្វើការ។

កិច្ចពិភាក្សានេះបានធ្វើឡើងនៅក្នុងសន្និសីទអាស៊ានលើកទី៩ ស្ដីពីអធិការកិច្ចការងារក្រោមប្រធានបទ “ពង្រឹងសមត្ថភាពអធិការកិច្ចការងារក្រោយជំងឺរាតត្បាតកូវីដ-១៩” តាមរយៈប្រព័ន្ធអនឡាញ រៀបចំឡើងដោយក្រសួងការងារ នៃប្រទេសសឹង្ហបូរី និងលេខាធិការដ្ឋានអាស៊ាន រយៈពេល ២ថ្ងៃ ចាប់ពីថ្ងៃទី២៧-២៨ ខែឧសភា ឆ្នាំ២០២១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សន្និសីទនេះមានការចូលរួមពីតំណាងសមាជិកអាស៊ានទាំង ១០ប្រទេស តំណាងសហព័ន្ធនិយោជកអាស៊ាន តំណាងក្រុមប្រឹក្សាសហជីពពាណិជ្ជកម្មអាស៊ាន តំណាងអង្គការអន្តរជាតិខាងការងារ (ILO) តំណាងអង្គការសុខភាពពិភពលោក (WHO) តំណាងសមាគមអធិការកិច្ចការងារអន្តរជាតិ (IALI) តំណាងក្រុមប្រឹក្សាសុវត្ថិភាព និងសុខភាពការងារប្រទេសសឹង្ហបូរី (WSH) និងទីភ្នាក់ងារសុវត្ថិភាព និងសុខភាពការងារកូរ៉េ (KOSHA)។

បើតាមលោក ឡេង តុង ប្រធាននាយកដ្ឋានពេទ្យការងារ និងជាតំណាងអង្គភាពជំនាញរបស់ក្រសួងបានឲ្យដឹងថាសន្និសីទនេះ ត្រូវបានរៀបចំឡើងជារៀងរាល់ឆ្នាំ ដែលនេះជាលើកទី៩ហើយ ក្នុងគោលបំណងដើម្បីចែករំលែកបទពិសោធន៍ និងការអនុវត្តល្អៗ លើប្រព័ន្ធអធិការកិច្ចការងារដែលរួមមានមុខងារ និងសកម្មភាពរបស់អធិការកិច្ចការងារ ក្នុងការបង្ការ និងទប់ស្កាត់ជំងឺរាតត្បាត ជាពិសេសជំងឺកូវីដ-១៩ នៅកន្លែងធ្វើការ។

លោក ឡេង តុងបានបន្តទៀតថា នៅក្នុងសន្និសីទនេះដែរក៏បានធ្វើការពិភាក្សា ចែករំលែកលើការពង្រឹងយុទ្ធសាស្ត្រ និងវិធានការណ៍ក្នុងការពង្រឹងប្រព័ន្ធអធិការកិច្ចការងារក្នុងយុគសម័យនៃការរីករាលដាលជំងឺកូវីដ-១៩ នៅកន្លែងធ្វើការ ការពង្រឹងកិច្ចសហប្រតិបត្តិការអន្តរជាតិ និងការដាក់ចេញនូវអនុសាសន៍ ដើម្បីឆ្លើយតប និងអនុវត្តឱ្យមានប្រសិទ្ធភាពលើការងារអធិការកិច្ចការងារនៅក្នុងតំបន់អាស៊ាន៕

ដោយ ៖សំអឿន