លោក ហេង វ៉ាន់ដា៖គ្រឹះស្ថានសិក្សាឯកជនមិនមានលទ្ធភាពរៀបចំប្រឡងបាក់ឌុបដោយខ្លួនឯងទេ

លោក ហេង វ៉ាន់ដា ប្រធាន សមាគមគ្រឹះស្ថានឧត្តមសិក្សាកម្ពុជា បានមានប្រសាសន៍នៅព្រឹកថ្ងៃទី​១៨ មិថុនាថា គ្រឹះ ស្ថានសិក្សាឯកជនមិនមានលទ្ធភាពរៀបចំការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប ដោយខ្លួនឯងទេដោយសុខចិត្តចូលរួមប្រឡងជាមួយសាលារដ្ឋដែរ។

លោក ហេង វ៉ាន់ដា បានមានប្រសាសន៍ទៀតថា «បើទោះបីជាក្រសួងអប់រំបានអនុញ្ញាតឱ្យគ្រឹះស្ថានឯកជនរៀបចំប្រឡង​បាក់ឌុប ដោយខ្លួនឯងនៅថ្ងៃទី២៥ ខែតុលាឆ្នាំ២០២១ក៏ដោយក៏គ្រឹះស្ថានសិក្សាឯកជនមិនមានលទ្ធភាពរៀបចំធ្វើដែរ ព្រោះត្រូវចំណាយថវិកាអស់ច្រើនណាស់»។

លោកបានបន្តថា ឆ្នាំមុនក្រសួងអប់រំក៏បានឱ្យសាលាឯកជនប្រឡង ដោយខ្លួនឯងដែរ តែមិនមានសាលាណាមួយធ្វើទេដោយពួកគេសុខចិត្តចូលរួមប្រឡងជាមួយសាលារដ្ឋដែរ។ លោក បានបន្តទៀតថា ការចូលរួមប្រឡងបាក់ឌុបជាមួយសាលារដ្ឋនេះគឺគ្រឹះស្ថានឯកជនចង់ឱ្យសិស្សសាលាឯកជននិងសាលារដ្ឋមាននិទ្ទេសដូចៗគ្នា ដើម្បីឱ្យសិស្សអាចជ្រើស​រើសសាលាចូលរៀនក្នុងពេលតែមួយផងដែរ។

យ៉ាងណាក៏ដោយ លោក បានបន្តទៀតថា គ្រឹះស្ថានសិក្សាឯកជននីមួយៗបានយល់ព្រមរៀបចំការប្រឡងសញ្ញាបត្រមធ្យមសិក្សាមឋមភូមិឬឌីប្លូមដោយខ្លួនឯងរៀងៗខ្លួន ដែលនឹងប្រព្រឹត្តិទៅនៅថ្ងៃទី១១ខែតុលាឆ្នាំ២០២១ខាងមុខនេះ។
បើតាមក្រសួងអប់រំយុវជននិងកីឡាបានកំណត់កាលបរិច្ឆេទប្រឡងសញ្ញាបត្រមធ្យមសិក្សាមធ្យមសិក្សាបឋមភូមិឬ​ឌីប្លូមនៅថ្ងៃទី១៥ខែវិច្ឆិកានិងប្រកាសលទ្ធផលប្រឡងនៅថ្ងៃទី២២ខែវិច្ឆិកាឆ្នាំ២០២១ និងប្រឡងសញ្ញាបត្រមធ្យមសិក្សាទុតិយភូមិឬបាក់ឌុប នៅថ្ងៃទី០៦ ខែធ្នូនិងប្រកាសលទ្ធផលប្រឡងនៅថ្ងៃទី២៨និង២៩ខែធ្នូឆ្នាំ២០២១។

គួរបញ្ជាក់ថា កាលពីឆ្នាំ២០២០កន្លងទៅដោយសារតែវិបត្តិជំងឺកូវីដ១៩ ប្រមុខរដ្ឋាភិបាលកម្ពុជាសម្តេចតេជោ ហ៊ុន សែន បានសម្រេចឲ្យបេក្ខជនប្រឡងឌីប្លូម ដែលមិនបានចូលប្រឡងនិងបេក្ខជនប្រឡងធ្លាក់ និងបេក្ខជនដែលបានដាក់ពាក្យប្រឡងបាក់ឌុបទាំងអស់ឲ្យជាប់ ដោយស្វ័យប្រវត្តិដោយមិនចាំបាច់ឆ្លងកាត់ការប្រឡងឡើយ៕

អត្ថបទ៖ សំអឿន