អ្នកនាំពាក្យ ៖ ការឃោសនាបោះឆ្នោត ជ្រើសរើសក្រុមប្រឹក្សាក្រុងបូកគោ បានប្រព្រឹត្តទៅដោយរលូន និងមានសណ្តា​ប់​ធ្នាប់

ការឃោសនាបោះឆ្នោតលើកទី១ ដើម្បីជ្រើសរើសក្រុមប្រឹក្សាក្រុងបូកគោ នៃខេត្តកំពត នឹងត្រូវបិទបញ្ចប់នៅ​ថ្ងៃ​ទី​២៣ ខែកក្កដានេះ។ លោកបណ្ឌិត ហង្ស ពុទ្ធា សមាជិក និងជាអ្នកនាំពាក្យគណៈកម្មាធិការជាតិ​រៀបចំការបោះឆ្នោ​ត (គ.ជ.ប) បានថ្លែងប្រាប់អ្នកសារព័ត៌មានកម្ពុជាថ្មី នាព្រឹកថ្ងៃទី២៣ ខែកក្កដានេះថា ការឃោសនាបោះឆ្នោត ជ្រើសរើសក្រុមប្រឹក្សាក្រុងបូកគោ ដែលបានដំណើរការចាប់ពីថ្ងៃទី១៦ ដល់ថ្ងៃទី២៣ ខែកក្កដា ឆ្នាំ២០២១នេះ​ បាន​​ប្រព្រឹត្តទៅដោយរលូន និងមានសណ្តាប់ធ្នាប់ ដោយគណបក្សទាំងអស់ អនុវត្តបានយ៉ាងត្រឹមត្រូវ តាមការណែ​នាំ​របស់ គ.ជ.ប។

លោកបណ្ឌិត ហង្ស ពុទ្ធា បានថ្លែងយ៉ាងដូច្នេះថា «បាទ! អ្វីៗគឺប្រព្រឹត្តទៅជាប្រក្រតី ហើយក្នុងនោះគណបក្ស​ន​យោ​បាយ ដែលបានឈរឈ្មោះហ្នឹង គឺលោកមានការត្រៀមខ្លួន និងមានការប្រុងប្រយ័ត្ន ចំពោះបញ្ហាកូវីដ-១៩ ហើយ គ.ជ.ប មានការណែនាំអំពីបញ្ហានេះដែរ»។ លោកថា គណបក្សនយោបាយទាំង៤ ដែលបានឈ​រ​ចូល​រួមការបោះឆ្នោតលើកទី១ ដើម្បីជ្រើសរើសក្រុមប្រឹក្សាក្រុងបូកគោ គឺបានអនុវត្តល្អប្រសើរនូវអ្វីដែល គ.ជ.ប បានដាក់ចេញ។

សូមជម្រាបថា ការឃោសនាបោះឆ្នោត ជ្រើសរើសក្រុមប្រឹក្សាក្រុងបូកគោ មានរយៈពេល៨ថ្ងៃ គឺចាប់ផ្តើមពីថ្ងៃទី១៦ ដល់ថ្ងៃទី២៣ ខែកក្កដា ឆ្នាំ២០២១ ចាប់ពីម៉ោង៦ និង០០ព្រឹក ដល់ម៉ោង១០ និង០០យប់។ គ្រប់សកម្មភាពឃោសនាបោះឆ្នោត ត្រូវបញ្ចប់២៤ម៉ោង មុនថ្ងៃបោះឆ្នោត។ ចំណែកការបោះឆ្នោត នឹងប្រព្រឹត្តទៅនៅថ្ងៃអាទិត្យ ទី២៥ ខែកក្កដា ឆ្នាំ២០២១ខាងមុខនេះ។ គណបក្សនយោ​បាយចំនួន៤ នឹងចូលរួមប្រកួតប្រជែង ក្នុងការបោះឆ្នោតនេះ រួមមាន៖ គណបក្សប្រជាជនកម្ពុជា, គណបក្សយុវជនកម្ពុជា, គណបក្សហ៊្វុនស៊ិនប៉ិច, និងគណបក្សសញ្ជាតិកម្ពុជា។

គួរឲ្យដឹងថា ក្រុងបូកគោក នៃខេត្តកំពត ត្រូវបានបង្កើតឡើង ដោយកាត់យកឃុំចំនួន៣ ពីស្រុកទឹកឈូគឺ ឃុំបឹងទូក ឃុំកោះតូច និងឃុំព្រែកត្នោត។ ការរៀបចំរចនាសម្ព័ន្ធ និងប្រព័ន្ធគ្រប់គ្រងរដ្ឋបាលក្រុងបូកគោ ត្រូវអនុលោមតាមច្បាប់ ស្ដីពី ការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ៕ (ដោយ)៖ ឃួន សុភ័ក្រ