សម្ដេចតេជោ មានមោទនភាពបានរក្សាសុខដុមរមនា នៃគ្រប់ជំនឿសាសនានៅ កម្ពុជា

ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាបានលើកឡើងថា ក្នុងនាមរាជរដ្ឋាភិបាលកម្ពុជា សម្តេចពិតជាមានមោទនភាពចំពោះការរក្សាបាននូវភាពសុខដុមរមនានៃគ្រប់ជំនឿសាសនានៅក្នុងព្រះរាជាណាចក្រកម្ពុជា តាមរយៈកិច្ចសហការយ៉ាងសកម្មជាពិសេសការអនុវត្តបានយ៉ាងខ្ជាប់ខ្ជួននូវវប្បធម៌ចែករំលែកពុំចេះរីងស្ងួតជាមួយនឹងស្មារតីទទួលខុសត្រូវខ្ពស់ក្នុងគ្រាដ៏លំបាកនេះ។

សម្តេចអគ្គមហាសេនាបតីតេជោ ហ៊ុន សែន បានថ្លែងបែបនេះនៅក្នុងសុន្ទរកថាថ្លែងបើកពិធីអន្តរសាសនាប្រឆាំងការជួញដូរមនុស្ស និងជំងឺរាតត្បាតសាកលកូវីដ-១៩ ឆ្នាំ២០២១ ដែលនឹងប្រព្រឹត្តទៅនៅល្ងាចថ្ងៃទី ២០ ខែសីហា នេះតាមរយៈការថតជាវីដេអូ សម្រាប់ការចាក់ផ្សាយនៅតាមបណ្តាញទូរទ្សន៍នានា។

សម្តេចតេជោ ហ៊ុន សែន មានប្រសាសន៍ថា៖ “ក្នុងនាមរាជរដ្ឋាភិបាលកម្ពុជា ទូលបង្គំ ខ្ញុំព្រះករុណាខ្ញុំ មានមោទនាភាពចំពោះការរក្សាបាននូវភាពសុខដុមរមនានៃគ្រប់ជំនឿសាសនា នៅក្នុងព្រះរាជាណាចក្រកម្ពុជាតាមរយៈកិច្ចសហការយ៉ាងសកម្មជាពិសេសការអនុវត្តបានយ៉ាងខ្ជាប់ខ្ជួននូវវប្បធម៌ចែករំលែកពុំចេះរីងស្ងួតជាមួយ​នឹង ស្មារតីទទួលខុសត្រូវខ្ពស់ក្នុងគ្រាដ៏លំបាកនេះ”។

សម្តេចតេជោ ហ៊ុន សែន បានបន្តថា កម្ពុជាបានផ្អាកការជួបជុំទ្រង់ទ្រាយធំកាលពីឆ្នាំ២០២០កន្លងទៅដើម្បីអនុវត្តនូវវិធានការបង្ការទប់ស្កាត់ និងដោះស្រាយបញ្ហានៃការរាតត្បាតជំងឺកូវីង-១៩ចូលក្នុងសហគមន៍។ នៅឆ្នាំ២០២១ វិបត្តិកូវីដ-១៩ នៅតែបន្តធ្លងរាតត្បាត ចំណែកការជួញដូរមនុស្ស និងឧក្រិដ្ឋកម្មឆ្លងដែននានាក៏កំពុងត្រូវបានជនឆ្លៀតឱកាសប្រើគ្រប់មធ្យោបាយទាញយកផលចំណេញពីស្ថានភាពដ៏លំបាកនេះ។

សម្តេចតេជោ ហ៊ុន សែន បានបន្តថា៖ “វេទិកាអន្តរសាសនាត្រូវតែរៀបចំតាមគន្លងថ្មីដើម្បីក្រើនរំលឹកផ្នែកស្មារតីដល់ប្រជាជនគ្រប់ជាតិសាសន៍ និងជំនឿសាសនាក្នុងព្រះរាជាណាចក្រកម្ពុជាក៏ដូចជាប្រជាជនទៅបើពិភពលោក ដើម្បីផ្លាស់ប្តូរហើយសម្របខ្លួមតាមគន្លងថ្មីក្នុងសម័យកូវីដ ជាមួយនឹងការប្រកាន់ខ្ជាប់ស្មារតីមនុស្សធម៌ សណ្តោសប្រណីយកចិត្តទុកដាក់ដល់អាយុជីវិត និងសេចក្តីថ្លៃថ្នូររបស់មនុស្សជាតិគ្រប់ជាតិសាសន៍ និងជំនឿសាសនា។

គួរបញ្ជាក់ថា ចាប់តាំងពីឆ្នាំ២០១៧ ជារៀងរាល់ឆ្នាំ ព្រះរាជាណាចក្រកម្ពុជាតែងប្រារព្ធពិពីអន្តរសាសនាប្រឆាំងការជួញដូរមនុស្សយ៉ាងអធិកអធម។ នៅក្នុងវេទិកានេះ រាជរដ្ឋាភិបាលកម្ពុជារួមជាមួយសម្តេចព្រះសង្ឃរាជទាំងពីរគណៈ ព្រះថេវានុត្ថេរៈគ្រប់ព្រះអង្គ មេដឹកនាំគ្រប់និកាយសាសនា អស់លោក លោកស្រី មន្ត្រីរាជការពីក្រសួង ស្ថាប័ន អង្គការមិនមែនរដ្ឋាភិបាលជាតិ និងអន្តរជាតិ សង្គមស៊ីវិល វិស័យឯកជនរាប់ពាន់នាក់តែងជួបជុំគ្នាធ្វើពិធីបួងសួងតាមបែបសាសនា និងប្តេជ្ញាចិត្តរួមគ្នាលុបបំបាត់ អំពើជួញដូរមនុស្សក្នុងគ្រប់រូបភាព។

វេទិកាអន្តរសាសនាក្រោមប្រធានបទ “សូមពិភពលោករួចផុតពីគ្រោះនៃជំងឺរាតត្បាតសកលកូរីដ-១៩ និងអំពើជួញដូរមនុស្ស” ក្នុងនាមរាជរដ្ឋាភិបាលកម្ពុជាសម្តេចតេជោ ហ៊ុន សែន បានសម្តែងនូវការអបអរសាទរ និងវាយតម្លៃខ្ពស់ចំពោះស្មារតីសាមគ្គីភាព និងសុខដុមនីយកម្មគ្រប់ជាតិសាសន៍ និងជំនឿសាសនានៅក្នុងព្រះរាជាណាចក្រកម្ពុជា ជាពិសេសស្មារតីជួយគាំទ្ររាជរដ្ឋាភិបាលកម្ពុជានៅក្នុងគ្រប់កាលៈទេស:ក៏ដូចជាពិភពលោកដើម្បីេសចក្តីសុខក្សេមក្សាន្តនៃមនុស្សជាតិ៕

អត្ថបទ៖ ណារី