ត្រឹម៣ថ្ងៃ​​​កម្ពុជា​​មានអ្នកឆ្លង​វីរុសកូវីដ១៩​​ បំប្លែងថ្មី Delta​ ជិត ៧០០ នាក់​ មានតែខេត្តកែបមួយ​មិនទាន់ឆ្លង​

ត្រឹមរយៈពេល៣ថ្ងៃគឺចាប់ពីថ្ងៃទី៤ដល់ថ្ងៃទី ៧ ខែកញ្ញាឆ្នាំ២០២១ កម្ពុជាមានអ្នកឆ្លងវីរុសកូវីដ១៩ បំប្លែងថ្មី «ដែលតា» ជិត៧០០នាក់ ដែលធ្វើឱ្យចំនួនអ្នកឆ្លងជំងឺនេះកើនឡើងជាង ៣៣០០នាក់នៅតាមរាជធានីខេត្តចំនួន២៤នៅសល់ខេត្តកែបនៅមិនទាន់មានឆ្លងជំងឺនេះនៅឡើយទេ។

យោងតាមសេចក្តីជូនដំណឹងរបស់ក្រសួងសុខាភិបាលចុះនៅយប់ថ្ងៃទី៨កញ្ញា បានឱ្យដឹងថា គិតចាប់ពីថ្ងៃទី៣១ ខែមីនា រហូតមកដល់ថ្ងៃទី៧ ខែកញ្ញាឆ្នាំ២០២១នេះ កម្ពុជាមានអ្នកឆ្លងកូវីដ១៩ប្រភេទដែលតា ចំនួន ៣៣២៣នាក់ ស្ត្រីមានចំនួន១៦៩៥នាក់ក្នុងនោះភាគច្រើននៅរាជធានីភ្នំពេញ។

ក្រសួងបានបន្តថារាជធានីខេត្តដែលឆ្លងច្រើនជាងគេគឺ រាជធានីភ្នំពេញមានចំនួន ១១១៣នាក់ បន្ទាប់មកទៀតខេត្តបន្ទាយមានជ័យ៧៣៨នាក់ ឧត្តរមានជ័យ២៧៦នាក់ សៀមរាប២២០នាក់ ស្ទឹងត្រែង១៣៧នាក់ខេត្តកណ្តាល១៣៤នាក់ព្រះវិហារ១១៧នាក់ ត្បូងឃ្មុំ១១៥ ហើយក្រៅពីនេះខេត្តផ្សេងទៀតមានក្រោម ១០០នាក់។

ក្រសួងសុខាភិបាល បានបង្ហាញថាករណីឆ្លងជំងឺដែលតា នៅប្រទេសកម្ពុជាភាគច្រើនជាអ្នកដំណើរមកពីបរទេស តាមជើងហោះហើរ ពលករខ្មែរត្រលប់ពីប្រទេសថៃ ពីប្រទេសវៀតណាម ប្រជាជនអ្នកភូមិនៅក្នុង សហគមន៍ ក្រុមហ៊ុនឯកជន បុគ្គលិកសុខាភិបាល អាជីវករ មន្ត្រីរាជការ យោធា ពិរុទ្ធជន អ្នកបកប ភាសាជនជាតិបរទេស បុគ្គលិករោងចក្រកាត់ដេរ បុគ្គលិកធនាគារ ដូនជីនៅវត្ត និង សិស្សជាដើម។

ក្រសួងសុខាភិបាល បានកត់សម្គាល់ផងដែរថា ការចម្លងមេរោគនាបច្ចុប្បន្ននេះ មានសន្ទុះកើនឡើងលើ យុវវ័យ ដែលក្រុមនេះបានដើរចេញក្រៅផ្ទះច្រើន ឬមានការជួបជុំមិត្តភ័ក្ដិ៕

អត្ថបទៈ សំអឿន